റിയാദ്: പുണ്യമാസമായ ദുല്‍ഹജ്ജ് തുടക്കം കുറിക്കുന്ന മാസപ്പിറവി നാളെ (ഞായറാഴ്ച - മേയ് 17) വൈകുന്നേരം നിരീക്ഷിക്കാന്‍ സൗദി അറേബ്യയിലെ മുഴുവന്‍ മുസ്ലിങ്ങളോടും രാജ്യത്തെ സുപ്രീം കോടതി ആഹ്വാനം ചെയ്തു. വെള്ളിയാഴ്ച പുറപ്പെടുവിച്ച ഔദ്യോഗിക പ്രസ്താവനയിലാണ് കോടതി ഇക്കാര്യം ആവശ്യപ്പെട്ടത്.

വെറുംകണ്ണാലോ ദൂരദര്‍ശിനി വഴിയോ മാസപ്പിറവി ദര്‍ശിക്കുന്നവര്‍ അടുത്തുള്ള കോടതിയില്‍ വിവരമറിയിച്ച് സാക്ഷ്യം രേഖപ്പെടുത്തണം. അല്ലെങ്കില്‍ കോടതിയുമായി ബന്ധപ്പെടാന്‍ സഹായിക്കുന്ന ഏറ്റവും അടുത്തുള്ള കേന്ദ്രങ്ങളിലോ അധികൃതരെയോ വിവരമറിയിക്കണമെന്നും സുപ്രീം കോടതി പ്രസ്താവനയില്‍ വ്യക്തമാക്കി.

കഴിഞ്ഞ ശവ്വാല്‍ മാസം 30 പൂര്‍ത്തിയാക്കി ഏപ്രില്‍ 19 ഞായറാഴ്ച ദുല്‍ഖഅദ് ഒന്നായി പ്രഖ്യാപിച്ച മുന്‍ സുപ്രീം കോടതി വിധിയുടെ അടിസ്ഥാനത്തിലാണ് ഈ പുതിയ നടപടി. കോടതിയുടെ കലണ്ടര്‍ നിശ്ചയപ്രകാരം ദുല്‍ഖഅദ് 29-ഉം, ഉമ്മുല്‍ ഖുറാ കലണ്ടര്‍ കണക്കുകൂട്ടലുകള്‍ അനുസരിച്ച് ദുല്‍ഖഅദ് 30-ഉം ഒത്തുവരുന്ന മേയ് 17 ഞായറാഴ്ചയാണ് മാസപ്പിറവി നിരീക്ഷിക്കാനുള്ള ഔദ്യോഗിക തീയതിയായി നിശ്ചയിച്ചിരിക്കുന്നത്.

മാസപ്പിറവി നിരീക്ഷിക്കാന്‍ പ്രാപ്തിയുള്ളവര്‍ അതത് പ്രദേശങ്ങളിലെ ചന്ദ്രദര്‍ശന സമിതികളില്‍ പങ്കാളികളാകണമെന്നും, മുസ്ലിം സമൂഹത്തിന് പൊതുവെ ഗുണം ചെയ്യുന്ന ഈ പുണ്യപ്രവര്‍ത്തിയില്‍ പങ്കുചേരേണ്ടത് പ്രധാനമാണെന്നും സുപ്രീം കോടതി ഓര്‍മ്മിപ്പിച്ചു. വിശുദ്ധ ഹജ്ജ് തീര്‍ത്ഥാടനത്തിന്റെ തീയതികളും ലോകമെമ്പാടുമുള്ള മുസ്ലിങ്ങളുടെ വലിയ പെരുന്നാള്‍ (ഈദുല്‍ അദ്ഹ) ആഘോഷങ്ങളും നിശ്ചയിക്കുന്നത് ദുല്‍ഹജ്ജ് മാസപ്പിറവിയുടെ അടിസ്ഥാനത്തിലാണ്.