റിയാദ്: സൗദി അറേബ്യയില്‍ പ്രവാസി നിക്ഷേപകരെ ആകര്‍ഷിക്കുന്നതിനായി പ്രീമിയം റെസിഡന്‍സി പ്രോഗ്രാമുകളുടെ ഫീസുകളും നടപടിക്രമങ്ങളും അന്താരാഷ്ട്ര നിലവാരത്തില്‍ പുതുക്കാന്‍ ശൂറ കൗണ്‍സില്‍ നിര്‍ണായക ഉത്തരവ് പുറപ്പെടുവിച്ചു. രാജ്യത്തിന്റെ വിവിധ പ്രവിശ്യകളിലും ഗവര്‍ണറേറ്റുകളിലും വലിയ തോതില്‍ നിക്ഷേപം നടത്തുന്ന പ്രീമിയം റെസിഡന്‍സി ഉടമകള്‍ക്ക് പ്രത്യേക ആനുകൂല്യങ്ങള്‍ നല്‍കാനും കൗണ്‍സില്‍ ആവശ്യപ്പെട്ടു. വൈസ് പ്രസിഡന്റ് ഡോ. മിഷാല്‍ അല്‍-സുലാമിയുടെ അധ്യക്ഷതയില്‍ ചേര്‍ന്ന ശൂറ കൗണ്‍സിലിന്റെ മുപ്പത്തിയൊന്നാം പതിവ് സമ്മേളനത്തിലാണ് രാജ്യത്തിന്റെ സാമ്പത്തിക-ഭരണ മേഖലകളില്‍ ദൂരവ്യാപകമായ സ്വാധീനമുണ്ടാക്കുന്ന തീരുമാനങ്ങള്‍ കൈക്കൊണ്ടത്.
പ്രീമിയം റെസിഡന്‍സി സെന്ററിന്റെ വാര്‍ഷിക റിപ്പോര്‍ട്ട് ചര്‍ച്ച ചെയ്ത കൗണ്‍സില്‍, ആഗോള തലത്തിലെ മറ്റ് സമാന പദ്ധതികളുമായി താരതമ്യം ചെയ്യുമ്പോള്‍ സൗദിയിലെ പ്രോഗ്രാം എത്രത്തോളം മത്സരക്ഷമമാണെന്ന് കൃത്യമായി വിലയിരുത്താന്‍ ആവശ്യപ്പെട്ടിട്ടുണ്ട്. വിഷന്‍ 2030-ന്റെ ഭാഗമായി വിദേശ നിക്ഷേപം രാജ്യത്തിന്റെ എല്ലാ മേഖലകളിലേക്കും വ്യാപിപ്പിക്കുക എന്ന ലക്ഷ്യത്തോടെയാണ് പുതിയ നീക്കം.
രാജ്യത്തെ സര്‍ക്കാര്‍ ഉടമസ്ഥതയിലുള്ള ഭൂമിയും കെട്ടിടങ്ങളും ഉള്‍പ്പെടെയുള്ള ആസ്തികള്‍ കൃത്യമായി വിനിയോഗിക്കുന്നുണ്ടെന്ന് ഉറപ്പാക്കാന്‍ കൗണ്‍സില്‍ നിര്‍ദേശിച്ചു. നിലവില്‍ ഉപയോഗിക്കാതെ കിടക്കുന്ന സര്‍ക്കാര്‍ ആസ്തികള്‍ മറ്റേതെങ്കിലും ആവശ്യത്തിനായി മാറ്റിസ്ഥാപിച്ചതിന് ശേഷം മാത്രമേ പുതിയതായി വാടകക്ക് നല്‍കാവൂ എന്ന് കൗണ്‍സില്‍ കര്‍ശനമായി ആവശ്യപ്പെട്ടു. സര്‍ക്കാര്‍ പ്രോപ്പര്‍ട്ടികളുടെ കാര്യക്ഷമതയും അവയില്‍ നിന്നുള്ള വരുമാനവും കൃത്യമായി അളക്കുന്നതിനായി ഒരു 'ദേശീയ സൂചിക' വികസിപ്പിക്കാന്‍ സ്റ്റേറ്റ് പ്രോപ്പര്‍ട്ടീസ് ജനറല്‍ അതോറിറ്റിയോട് ശൂറ കൗണ്‍സില്‍ ആവശ്യപ്പെട്ടിട്ടുണ്ട്.
ബൗദ്ധിക സ്വത്തവകാശ രംഗത്തും വലിയ മാറ്റങ്ങള്‍ക്കാണ് കൗണ്‍സില്‍ വഴിയൊരുക്കുന്നത്. സര്‍ക്കാര്‍ സ്ഥാപനങ്ങള്‍ നല്‍കുന്ന ഇന്റലക്ച്വല്‍ പ്രോപ്പര്‍ട്ടി അപേക്ഷകളുടെ ഗുണനിലവാരം അന്താരാഷ്ട്ര തലത്തില്‍ ഫയല്‍ ചെയ്യുന്നതിന് മുന്‍പ് പരിശോധിക്കുന്നതിനായി പുതിയ ടൂളുകള്‍ വികസിപ്പിക്കാന്‍ സൗദി അതോറിറ്റി ഫോര്‍ ഇന്റലക്ച്വല്‍ പ്രോപ്പര്‍ട്ടിയോട് കൗണ്‍സില്‍ ആവശ്യപ്പെട്ടു.
ഗാര്‍ഹിക തൊഴിലാളി ക്ഷാമം പരിഹരിക്കണം
സൗദിയിലെ തൊഴില്‍ വിപണി നേരിടുന്ന പ്രശ്‌നങ്ങള്‍ പരിഹരിക്കാന്‍ ശക്തമായ ഇടപെടലുകളാണ് കൗണ്‍സില്‍ അംഗങ്ങള്‍ നിര്‍ദേശിച്ചത്. രാജ്യത്ത് നിലവിലുള്ള സ്വകാര്യ റിക്രൂട്ട്മെന്റ് ഓഫീസുകളുമായി സഹകരിച്ച്, 51% സര്‍ക്കാര്‍ മൂലധന പങ്കാളിത്തത്തോടെ പുതിയ റിക്രൂട്ട്മെന്റ് കമ്പനികള്‍ സ്ഥാപിക്കണമെന്ന് ഡോ. മുഹമ്മദ് അല്‍-ജര്‍ബ നിര്‍ദ്ദേശിച്ചു. ഗാര്‍ഹിക തൊഴിലാളികളുടെ റിക്രൂട്ട്മെന്റുമായി ബന്ധപ്പെട്ട നിലവിലെ പ്രതിസന്ധികള്‍ക്ക് ഇത് ശാശ്വത പരിഹാരമാകുമെന്നാണ് വിലയിരുത്തല്‍.
തൊഴില്‍ രംഗത്തെ സ്വദേശിവല്‍ക്കരണം (തൗതീന്‍) നേരിടുന്ന വെല്ലുവിളികളെക്കുറിച്ച് പഠിക്കാന്‍ ഒരു പ്രത്യേക ഗവേഷണ സംഘത്തെ നിയോഗിക്കാന്‍ കൗണ്‍സില്‍ അംഗം ഹസ്സന്‍ അല്‍-ഹസ്മി ആവശ്യപ്പെട്ടു. കൂടാതെ, സ്വകാര്യ വിദ്യാഭ്യാസ മേഖലയിലെ ജീവനക്കാരുടെ തൊഴില്‍ സ്ഥിരത ഉറപ്പാക്കാനുള്ള പ്രത്യേക പദ്ധതിക്കായി വിദ്യാഭ്യാസ മന്ത്രാലയവും മാനവവിഭവശേഷി മന്ത്രാലയവും സംയുക്തമായി പ്രവര്‍ത്തിക്കണമെന്നും കൗണ്‍സില്‍ നിര്‍ദേശിച്ചു.
ആര്‍ട്ടിഫിഷ്യല്‍ ഇന്റലിജന്‍സ് അധിഷ്ഠിത സ്മാര്‍ട്ട് പവര്‍ ഗ്രിഡും കാലാവസ്ഥാ വ്യതിയാനവും
രാജ്യത്തെ ഭാവി ഊര്‍ജ്ജ പ്രതിസന്ധികള്‍ മുന്‍കൂട്ടി പ്രവചിക്കുന്നതിനായി നിര്‍മ്മിത ബുദ്ധിയും ബിഗ് ഡാറ്റയും ഉപയോഗിച്ചുള്ള 'സ്മാര്‍ട്ട് നാഷണല്‍ പ്ലാറ്റ്ഫോം' ആരംഭിക്കാന്‍ സൗദി ഇലക്ട്രിസിറ്റി റെഗുലേറ്ററി അതോറിറ്റിയോട് കൗണ്‍സില്‍ ആവശ്യപ്പെട്ടു. ഈ പ്ലാറ്റ്ഫോം വഴി രാജ്യത്ത് വൈദ്യുതി സമ്മര്‍ദ്ദം അനുഭവപ്പെടാന്‍ സാധ്യതയുള്ള മേഖലകള്‍ മുന്‍കൂട്ടി കണ്ടെത്താനും വികസന പദ്ധതികളെ കൃത്യമായി ഊര്‍ജ്ജ പ്ലാനുകളുമായി ബന്ധിപ്പിക്കാനും സാധിക്കും. ഉയര്‍ന്ന ജനസാന്ദ്രതയുള്ള തുറന്ന സ്ഥലങ്ങളില്‍ സ്മാര്‍ട്ട് സോളാര്‍ പാനലുകള്‍ സ്ഥാപിക്കുന്നതിനെക്കുറിച്ചും, വീടുകളില്‍ സോളാര്‍ പ്ലാന്റുകള്‍ സ്ഥാപിക്കുന്നവര്‍ക്ക് ആനുകൂല്യങ്ങള്‍ നല്‍കുന്നതിനെക്കുറിച്ചും പഠിക്കാന്‍ അതോറിറ്റിയോട് ആവശ്യപ്പെട്ടിട്ടുണ്ട്.
കാലാവസ്ഥാ നിരീക്ഷണ കേന്ദ്രത്തിന് സര്‍ക്കാര്‍ ബജറ്റിനെ ആശ്രയിക്കുന്നത് കുറയ്ക്കാന്‍ സ്വകാര്യ മേഖലയുമായി വരുമാനം പങ്കിടുന്ന രീതി നടപ്പിലാക്കാനും കൗണ്‍സില്‍ നിര്‍ദേശിച്ചു. വരുമാന സ്രോതസ്സുകള്‍ വൈവിധ്യവത്കരിക്കാനും സാമ്പത്തിക അച്ചടക്കം ഉറപ്പാക്കാനും ഇത് സഹായിക്കും.
കാര്‍ഷിക മേഖലയില്‍ വിപ്ലവകരമായ മാറ്റങ്ങള്‍ക്കാണ് ശൂറ കൗണ്‍സില്‍ അംഗീകാരം നല്‍കിയത്. രാജ്യത്തെ ഈന്തപ്പന കൃഷിയിടങ്ങളിലേക്കുള്ള സന്ദര്‍ശനവും ഈന്തപ്പഴ വിളവെടുപ്പും ഉള്‍പ്പെടുത്തി വിനോദസഞ്ചാരികള്‍ക്കായി പ്രത്യേക 'ടൂറിസം പാക്കേജുകള്‍' ഒരുക്കാന്‍ നാഷണല്‍ സെന്റര്‍ ഫോര്‍ പാംസ് ആന്‍ഡ് ഡേറ്റ്‌സിനോട് ആവശ്യപ്പെട്ടു. വംശനാശഭീഷണി നേരിടുന്ന വിശിഷ്ടമായ സൗദി ഈന്തപ്പഴ ഇനങ്ങളെ സംരക്ഷിക്കുന്നതിനായി രാജ്യവ്യാപകമായി പ്രത്യേക പ്രോഗ്രാം ആരംഭിക്കാനും കൗണ്‍സില്‍ പ്രമേയത്തിലൂടെ ആവശ്യപ്പെട്ടിട്ടുണ്ട്.
സൗദിയുടെ കാര്‍ബണ്‍ രഹിത ലക്ഷ്യങ്ങള്‍ കൈവരിക്കുന്നതിനായി ബഹുമുഖ ഉപയോഗങ്ങളുള്ള മരങ്ങളുടെ കൃഷി വ്യാപിപ്പിക്കുന്നതിനെക്കുറിച്ച് പഠിക്കാന്‍ സുസ്ഥിര കാര്‍ഷിക ഗവേഷണ വികസന കേന്ദ്രത്തോട് കൗണ്‍സില്‍ ആവശ്യപ്പെട്ടു. അതോടൊപ്പം, കര്‍ഷകര്‍ പുതിയ സാങ്കേതികവിദ്യകള്‍ സ്വീകരിക്കുന്നതിന് നേരിടുന്ന തടസ്സങ്ങള്‍ കണ്ടെത്തി പരിഹരിക്കാനും കൗണ്‍സില്‍ നിര്‍ദ്ദേശിച്ചു.
Related News
