റിയാദ്- ഇറാഖ് വ്യോമാതിര്‍ത്തിയില്‍ നിന്ന് സൗദി അറേബ്യയുടെ വ്യോമാതിര്‍ത്തിയിലേക്ക് കടന്നുകയറിയ മൂന്ന് ഡ്രോണുകള്‍ തടസ്സപ്പെടുത്തുകയും വിജയകരമായി തകര്‍ക്കുകയും ചെയ്തതായി സൗദി പ്രതിരോധ മന്ത്രാലയ വക്താവ് മേജര്‍ ജനറല്‍ തുര്‍ക്കി അല്‍ മാലിക്കി അറിയിച്ചു. 2026 മെയ് 17 ഞായറാഴ്ച പുലര്‍ച്ചെയായിരുന്നു സംഭവം. രാജ്യത്തിന്റെ പരമാധികാരത്തിന് നേര്‍ക്കുണ്ടാകുന്ന ഇത്തരം വ്യോമാക്രമണങ്ങളെ പ്രതിരോധ മന്ത്രാലയം അതീവ ഗൗരവത്തോടെയാണ് കാണുന്നതെന്നും സൗദി പ്രസ് ഏജന്‍സി പുറത്തുവിട്ട ഔദ്യോഗിക പ്രസ്താവനയില്‍ അദ്ദേഹം വ്യക്തമാക്കി. ശത്രുക്കളുടെ ഇത്തരം നീക്കങ്ങള്‍ക്ക് അനുയോജ്യമായ സമയത്തും സ്ഥലത്തും ശക്തമായി തിരിച്ചടിക്കാന്‍ സൗദി അറേബ്യക്ക് പൂര്‍ണ്ണ അവകാശമുണ്ടെന്ന് മേജര്‍ ജനറല്‍ അല്‍ മാലിക്കി ഊന്നിപ്പറഞ്ഞു. രാജ്യത്തിന്റെ പരമാധികാരത്തെയും സുരക്ഷയെയും വെല്ലുവിളിക്കാനും, ജനങ്ങളുടെയും വിദേശ താമസക്കാരുടെയും ജീവന് ഭീഷണിയുയര്‍ത്താനുമുള്ള ഏതൊരു ശ്രമത്തെയും പ്രതിരോധിക്കാന്‍ ആവശ്യമായ എല്ലാ സൈനിക-പ്രവര്‍ത്തന നടപടികളും സ്വീകരിക്കുമെന്നും നടപ്പിലാക്കുമെന്നും അദ്ദേഹം പ്രസ്താവനയിലൂടെ മുന്നറിയിപ്പ് നല്‍കി.