ജിദ്ദ: സൗദി ദേശീയ ദിനാഘോഷങ്ങളുടെ ഭാഗമായി ലുലു ഹൈപ്പര്‍മാര്‍ക്കറ്റ് ബഗ്ദാദിയയും Bangeesham മാപ്പിള ടീമും സംയുക്തമായി സംഘടിപ്പിക്കുന്ന 'ഫര്‍ഹത് വതന്‍' അറേബ്യന്‍ മ്യൂസിക്കല്‍ നൈറ്റ് സെപ്റ്റംബര്‍ 24 വ്യാഴാഴ്ച വൈകുന്നേരം 4 മണി മുതല്‍ ലുലു ഹൈപ്പര്‍മാര്‍ക്കറ്റ് ബഗ്ദാദിയയില്‍ നടക്കും.

അറബ് സംസ്‌കാരത്തിന്റെ പൈതൃകവും സംഗീതത്തിന്റെ മാധുര്യവും ആധുനിക വേദിയുടെ ആവേശവും ഒരുമിക്കുന്ന ഈ സംഗീതസായാഹ്നത്തില്‍ പ്രശസ്ത വനിതാ ഗായിക ദിക്രിയുടെ പ്രത്യേക സംഗീതാവതരണം പ്രധാന ആകര്‍ഷണമാകും. ജിദ്ദയിലെ ശ്രദ്ധേയ ഗായകന്‍ ഷബീറും സംഘവും വേദിയിലെത്തുന്നതോടെ സംഗീതരാവ് കൂടുതല്‍ ആവേശകരമാകും.

മനോഹരമായ അറബിക് ഗാനങ്ങള്‍ക്കൊപ്പം അറേബ്യന്‍ ലൈവ് ഫ്യൂഷന്‍ സംഗീതവും വിവിധ സംഗീതാവതരണങ്ങളും പരിപാടിയുടെ പ്രത്യേകതയായിരിക്കും. സംഗീതവിരുന്നിനൊപ്പം പുതിയ കലാപ്രതിഭകളെ കണ്ടെത്തുന്നതിനായി ടാലന്റ് ഹണ്ട് മത്സരങ്ങളും സംഘടിപ്പിച്ചിട്ടുണ്ട്.

അറബിക് സോംഗ്, സൂപ്പര്‍ സിംഗിംഗ്, കളറിംഗ്, പെയിന്റിംഗ്, ഡ്രോയിംഗ്, മെഹന്തി, ഫേസ് പെയിന്റിംഗ് തുടങ്ങി വിവിധ മത്സരങ്ങള്‍ പരിപാടിയുടെ ഭാഗമായി നടക്കും. മത്സരങ്ങളില്‍ പങ്കെടുക്കാന്‍ ആഗ്രഹിക്കുന്നവര്‍ക്ക് സെപ്റ്റംബര്‍ 24 വ്യാഴാഴ്ച വൈകുന്നേരം 4 മണിക്ക് ലുലു ഹൈപ്പര്‍മാര്‍ക്കറ്റ് ബഗ്ദാദിയയില്‍ നേരിട്ട് രജിസ്റ്റര്‍ ചെയ്യാം.

അറബ് സംഗീതത്തിന്റെ ഹൃദയസ്പര്‍ശിയായ ഈണങ്ങളും ജിദ്ദയിലെ ഗായകരുടെ ശബ്ദമാധുരിയും കലാപ്രതിഭകളുടെ പ്രകടനങ്ങളും ഒരേ വേദിയില്‍ സംഗമിക്കുന്ന 'ഫര്‍ഹത് വതന്‍' സംഗീതത്തിന്റെയും സംസ്‌കാരത്തിന്റെയും സൗഹൃദത്തിന്റെയും മനോഹര ആഘോഷമായി മാറും. സംഗീതത്തിന്റെ ഈണങ്ങളില്‍ ഹൃദയങ്ങള്‍ ഒന്നിക്കുകയും അറബ് പൈതൃകത്തിന്റെ വര്‍ണങ്ങള്‍ വേദിയില്‍ വിരിയുകയും ചെയ്യുന്ന ഈ ആഘോഷരാവിലേക്ക് കുടുംബസമേതം എല്ലാവരെയും സംഘാടകര്‍ സ്വാഗതം ചെയ്തു.