മക്ക: ഹജ്ജ് കര്മ്മങ്ങള്ക്കായി പുണ്യഭൂമിയിലെത്തിയ രണ്ട് മലയാളി തീര്ത്ഥാടകര് മക്കയില് മരിച്ചു. കോഴിക്കോട് സ്വദേശിയായ പ്രമുഖ പണ്ഡിതന് പി.സി. മാമു മൗലവി (80), കൊച്ചി എംബാര്ക്കേഷന് വഴി ഹജ്ജിനെത്തിയ ഖദീജ (58) എന്നിവരാണ് മരിച്ചത്.
വാര്ധക്യസഹജമായ ബുദ്ധിമുട്ടുകള്ക്കിടയിലും 80-ാം വയസ്സില് ഹജ്ജ് എന്ന വലിയ ആഗ്രഹം നെഞ്ചിലേറ്റി മക്കയിലെത്തിയതായിരുന്നു പ്രമുഖ പണ്ഡിതനും ഇമാമുമായിരുന്ന പി.സി. മാമു മൗലവി. വാഴയൂര്, പെരുമണ്ണ, കായലം, മാഹി, വടകര തുടങ്ങിയ വിവിധ പ്രദേശങ്ങളില് ദീര്ഘകാലം ഇമാമായി അദ്ദേഹം സേവനമനുഷ്ഠിച്ചിട്ടുണ്ട്. നൂറുകണക്കിന് വിശ്വാസികള്ക്ക് നമസ്കാരത്തിന് നേതൃത്വം നല്കുകയും ഖുര്ആന് അധ്യാപനത്തിലും മതപ്രഭാഷണ രംഗത്തും സജീവമായി നിലകൊള്ളുകയും ചെയ്ത ഉസ്താദായിരുന്നു അദ്ദേഹം. ഭാര്യ: ഫാത്തിമ. മക്കള്: നൗഷാദ്, അഫ്സല്, നൗഫല്, ബുഷ്റ, ഫസീല, റാഹില.
കൊച്ചി എംബാര്ക്കേഷന് വഴി മക്കയിലെത്തിയ ഖദീജ ഹജ്ജുമ്മ (58) മക്കയിലെ സൗദി നാഷണല് ഹോസ്പിറ്റലില് വെച്ചാണ് മരിച്ചത്. ഭര്ത്താവ് അസീസുമൊരുമിച്ചാണ് ഹജ്ജ് നിര്വഹിക്കാനെത്തിയത്.
തീര്ത്ഥാടകയുടെ മരണാനന്തര നിയമനടപടികള് സ്റ്റേറ്റ് ഹജ്ജ് ഇന്സ്പെക്ടര്മാരുടെ നേതൃത്വത്തില് മക്കയില് പുരോഗമിക്കുകയാണ്. മൃതദേഹങ്ങള് മക്കയില് തന്നെ മറവു ചെയ്യാനുള്ള നടപടികളാണ് ഹജ്ജ് മിഷന്റെ സഹായത്തോടെ നടന്നുവരുന്നത്.
.jpg)
Related News
