ജിദ്ദ- ബലിമൃഗങ്ങളുടെ വിലക്കയറ്റത്തെക്കുറിച്ച് തുടര്‍ച്ചയായി ഉയരുന്ന വിമര്‍ശനങ്ങള്‍ക്കു മറുപടിയുമായി പ്രമുഖ കന്നുകാലി വ്യാപാരിയായ ഫഹദ് അല്‍-ഹമൂദി രംഗത്ത്. പ്രാദേശിക സാഹചര്യത്തില്‍ കന്നുകാലികളെ വളര്‍ത്തുന്നത് വലിയ ചിലവുള്ള കാര്യമാണെന്ന് അദ്ദേഹം വിശദീകരിച്ചു. രാജ്യത്ത് പച്ചപ്പിന്റെ കുറവും മഴയുടെ ദൗര്‍ലഭ്യവും കാരണം കര്‍ഷകര്‍ക്ക് വലിയ തുക ചിലവഴിച്ചുള്ള കാര്‍ഷിക, ജല പദ്ധതികളെ ആശ്രയിക്കേണ്ടി വരുന്നു. ഇതാണ് വിപണിയില്‍ വില വര്‍ദ്ധിക്കാന്‍ പ്രധാന കാരണമെന്ന് അദ്ദേഹം വ്യക്തമാക്കി.

തലസ്ഥാനമായ റിയാദിന് വടക്കുപടിഞ്ഞാറുള്ള മറാത്ത് ഗവര്‍ണറേറ്റിലെ തന്റെ ഫാമില്‍ നിന്ന് സംസാരിച്ച അല്‍-ഹമൂദി, കന്നുകാലി വളര്‍ത്തലിന് പിന്നിലെ കഠിനമായ യാഥാര്‍ത്ഥ്യങ്ങള്‍ പങ്കുവെച്ചു. ജലസേചനത്തിനായി കര്‍ഷകര്‍ 200 മുതല്‍ 300 മീറ്റര്‍ വരെ ആഴമുള്ള കിണറുകള്‍ കുഴിക്കാന്‍ നിര്‍ബന്ധിതരാകുകയാണ്. ഒരു കിണര്‍ നിര്‍മ്മിക്കുന്നതിന് മാത്രം 4 മുതല്‍ 6 ലക്ഷം റിയാല്‍ വരെ ചിലവ് വരുന്നുണ്ട്. ഇതിനുപുറമേ കാര്‍ഷിക പദ്ധതികളില്‍ ഉണ്ടാകുന്ന പെട്ടെന്നുള്ള തകരാറുകള്‍ കര്‍ഷകര്‍ക്ക് വന്‍ സാമ്പത്തിക ബാധ്യതയാണ് വരുത്തിവെക്കുന്നത്.

കിണറുകളുടെ പൈപ്പുകള്‍ മാറ്റുന്നതിനായി ക്രെയിനുകള്‍ എത്തിക്കുന്നതിന് മാത്രമായി അറ്റകുറ്റപ്പണികള്‍ തുടങ്ങുന്നതിന് മുന്‍പ് തന്നെ 5,000 റിയാലോളം ചിലവാകുന്നു. ഇത്തരം കടുത്ത സാമ്പത്തിക സമ്മര്‍ദ്ദങ്ങളും കടബാധ്യതകളും കാരണം പല കന്നുകാലി വളര്‍ത്തലുകാര്‍ക്കും പക്ഷാഘാതം വരെ സംഭവിച്ചിട്ടുണ്ടെന്ന് അദ്ദേഹം ആശങ്കയോടെ ചൂണ്ടിക്കാട്ടി.

ഇത്തവണ വിപണിയിലെ ബലിമൃഗങ്ങളുടെ വിലവിവരങ്ങളെക്കുറിച്ചും അദ്ദേഹം വ്യക്തമാക്കി. 65 മുതല്‍ 75 കിലോഗ്രാം വരെ തൂക്കമുള്ള നജ്ദി, നഈമി ഇനത്തില്‍പ്പെട്ട മൃഗങ്ങള്‍ക്ക് 2200 റിയാലോളമാണ് വില. അതേസമയം, ഹാരി ഇനത്തില്‍പ്പെട്ട മൃഗങ്ങള്‍ക്ക് വിപണിയില്‍ ഏകദേശം 2000 റിയാലോളം വിലവരുന്നുണ്ടെന്ന് അദ്ദേഹം പറഞ്ഞു.

കന്നുകാലികള്‍ക്കുള്ള തീറ്റപ്പുല്ല് ഉത്പാദിപ്പിക്കുന്നതിനും വന്‍ തുകയാണ് ചിലവാകുന്നത്. വിത്തുകള്‍, വളം, ഗോതമ്പ്-ബാര്‍ലി സീസണുകളിലെ വാട്ടര്‍ സ്പ്രിംഗ്ലര്‍ പ്രവര്‍ത്തനങ്ങള്‍ എന്നിവയ്ക്കായി ഒരു വിളവെടുപ്പ് ഘട്ടത്തില്‍ മാത്രം (വിസ്തീര്‍ണ്ണത്തെ ആശ്രയിച്ച്) ഒന്നര ലക്ഷം റിയാലോളം വരും. വര്‍ഷത്തില്‍ എട്ട് തവണയോളമാണ് വിളവെടുപ്പ് നടത്തുന്നത്. ഇതില്‍ ഓരോ വിളവെടുപ്പ് സമയത്തും 15,000 മുതല്‍ 30,000 റിയാല്‍ വരെ വളത്തിന് മാത്രമായി മാറ്റിവെക്കേണ്ടി വരുന്നു.

തന്റെ ഫാമില്‍ വളര്‍ത്തുന്ന മൃഗങ്ങളുടെ ഇനങ്ങളെക്കുറിച്ചും അല്‍-ഹമൂദി സംസാരിച്ചു. അറേബ്യന്‍ ഉപദ്വീപില്‍ ഏറെ പ്രശസ്തമായ ഹാരി, നഈമി, നജ്ദി എന്നീ മൂന്ന് തരം ആടുകളെയാണ് അദ്ദേഹം പ്രധാനമായും വളര്‍ത്തുന്നത്. ഇതില്‍ നജ്ദി ഇനങ്ങള്‍ സമീപവര്‍ഷങ്ങളില്‍ വളരെ അപൂര്‍വമായി മാറിയിട്ടുണ്ടെന്നും, ഇവയ്ക്ക് പ്രത്യേക പരിചരണവും വിപുലമായ ഫാമുകളിലെ മികച്ച മേല്‍നോട്ടവും ആവശ്യമാണെന്നും അദ്ദേഹം കൂട്ടിച്ചേര്‍ത്തു.