വാഷിംഗ്ടൺ / റിയാദ്: ഇറാനെതിരായ പുതിയ സൈനിക നീക്കങ്ങൾ തൽക്കാലം നിർത്തിവെക്കാൻ യു.എസ്. പ്രസിഡന്റ് ഡൊണാൾഡ് ട്രംപ് ആലോചിക്കുന്നതായി റിപ്പോർട്ട്. ടെഹ്റാനിൽ നിന്നോ യെമനിലെ ഹൂതി വിമതരിൽ നിന്നോ പുതിയ പ്രകോപനങ്ങളില്ലെങ്കിൽ ആക്രമണം ഒഴിവാക്കാമെന്ന നിലപാടിലാണ് ട്രംപ്. മുതിർന്ന ഉപദേഷ്ടാക്കളുമായുള്ള കൂടിക്കാഴ്ചയിലാണ് അദ്ദേഹം ഇക്കാര്യം വ്യക്തമാക്കിയതെന്ന് ഉന്നത വൃത്തങ്ങളെ ഉദ്ധരിച്ച് റോയിട്ടേഴ്സ് റിപ്പോർട്ട് ചെയ്തു.

കഴിഞ്ഞ ഫെബ്രുവരിയിൽ ഇസ്രയേലിനൊപ്പം ചേർന്ന് ആരംഭിച്ച യുദ്ധം എങ്ങനെ അവസാനിപ്പിക്കണമെന്ന കാര്യത്തിൽ ട്രംപ് ഇതുവരെ അന്തിമ തീരുമാനമെടുത്തിട്ടില്ല. യുദ്ധം കടുപ്പിക്കുമെന്ന ഭീഷണിക്കും സംഘർഷം ലഘൂകരിക്കുന്നതിനും ഇടയിൽ ചാഞ്ചാടുന്ന നിലപാടാണ് അദ്ദേഹം സ്വീകരിക്കുന്നത്. എന്നാൽ, പൂർണ്ണ തോതിലുള്ള യുദ്ധത്തിലേക്ക് മടങ്ങരുതെന്ന മേഖലയിലെ സഖ്യകക്ഷികളുടെ അഭ്യർത്ഥന ട്രംപ് ഗൗരവമായി പരിഗണിക്കുന്നുണ്ട്.

'എനിക്കിത് ഉടൻ അവസാനിപ്പിക്കാൻ കഴിയും. പക്ഷേ, ഞാൻ സംരക്ഷിക്കാൻ ആഗ്രഹിക്കുന്ന രാജ്യങ്ങളുടെ അഭ്യർത്ഥന മാനിച്ച് കുറച്ചുകൂടി സാവധാനത്തിലും മാന്യമായുമാണ് ഞങ്ങൾ നീങ്ങുന്നത്,' വ്യാഴാഴ്ച നൽകിയ അഭിമുഖത്തിൽ ട്രംപ് വ്യക്തമാക്കി.

തിരഞ്ഞെടുപ്പ് തിരിച്ചടിയും ഇന്ധനവിലയും

യുദ്ധം മൂലം ആഗോളതലത്തിൽ ഇന്ധനവില കുതിച്ചുയർന്നത് അമേരിക്കൻ വോട്ടർമാർക്കിടയിൽ വലിയ പ്രതിഷേധത്തിന് ഇടയാക്കിയിരുന്നു. കഴിഞ്ഞ ആഴ്ച നടന്ന ഇടക്കാല തിരഞ്ഞെടുപ്പിൽ കോൺഗ്രസിന്റെ നിയന്ത്രണം റിപ്പബ്ലിക്കൻ പാർട്ടിക്ക് നഷ്ടമാകാൻ പ്രധാന കാരണം ഈ യുദ്ധമാണെന്ന് വൈസ് പ്രസിഡന്റ് ജെ.ഡി. വാൻസ് തന്നെ സമ്മതിച്ചിട്ടുണ്ട്. തിരഞ്ഞെടുപ്പിന് മുൻപ് നടന്ന സർവേയിൽ 55 ശതമാനം അമേരിക്കക്കാരും യുദ്ധത്തിനെതിരെ നിലപാടെടുത്തിരുന്നു. ഈ സാഹചര്യത്തിൽ, വലിയൊരു യുദ്ധം പുനരാരംഭിക്കാനുള്ള സാധ്യത കുറവാണെന്ന സൂചനയാണ് ട്രംപ് നൽകുന്നത്.

ഹോർമുസ് കടലിടുക്കിന്റെ നിയന്ത്രണവും കടുത്ത സാമ്പത്തിക-നാവിക ഉപരോധങ്ങളും ഇറാന്റെ സമ്പദ്വ്യവസ്ഥയെ തകർത്തതായാണ് യു.എസ്. ഇന്റലിജൻസ് വിലയിരുത്തൽ. കടൽ മാർഗ്ഗമുള്ള ഉപരോധത്തിന് പുറമെ, കരമാർഗ്ഗവും കാസ്പിയൻ കടൽ വഴിയും ഇറാനിലേക്ക് ആയുധങ്ങളെത്തുന്നത് തടയാനും യു.എസ്. സൈന്യം നീക്കം തുടങ്ങിയിട്ടുണ്ട്.

അതേസമയം, ആവശ്യമെങ്കിൽ തിരിച്ചടിക്കാൻ സൈന്യം പൂർണ്ണ സജ്ജമാണെന്ന് പ്രതിരോധ വൃത്തങ്ങൾ അറിയിച്ചു. മിഡിൽ ഈസ്റ്റിലുള്ള രണ്ട് വിമാനവാഹിനിക്കപ്പലുകൾക്ക് പുറമെ മൂന്നാമതൊരു കപ്പൽ കൂടി വരും ദിവസങ്ങളിൽ മേഖലയിലെത്തും. ഇറാന്റെ ഭൂഗർഭ ആണവ കേന്ദ്രങ്ങളിൽ വീണ്ടും ബോംബിടുന്ന കാര്യം പരിഗണനയിലുണ്ടെങ്കിലും, അത് ഇറാനെ ചർച്ചകളിൽ വഴങ്ങാൻ പ്രേരിപ്പിക്കില്ലെന്നാണ് ഇന്റലിജൻസ് റിപ്പോർട്ട്.

ആയുധക്ഷാമവും ഇസ്രയേൽ സമ്മർദ്ദവും

അമേരിക്കയുടെ ദീർഘദൂര കൃത്യതയുള്ള ആയുധങ്ങളുടെ ശേഖരം ആശങ്കാജനകമാംവിധം കുറഞ്ഞതായി ട്രംപിന് ഇന്റലിജൻസ് മുന്നറിയിപ്പ് ലഭിച്ചിട്ടുണ്ട്. എന്നാൽ, ഏത് സാഹചര്യത്തെയും നേരിടാനുള്ള ആയുധശേഖരം സൈന്യത്തിനുണ്ടെന്നാണ് വൈറ്റ് ഹൗസിന്റെ വിശദീകരണം.

മറുവശത്ത്, ഇറാനെതിരെ വീണ്ടും സൈനിക നീക്കം നടത്താൻ ഇസ്രയേൽ ട്രംപ് ഭരണകൂടത്തിന് മേൽ കടുത്ത സമ്മർദ്ദം ചെലുത്തുന്നുണ്ട്. എന്നാൽ ഇറാനുമായി ഇനി ഒരു കരാറിന്റെ ആവശ്യമില്ലെന്നാണ് ട്രംപിന്റെ നിലപാട്. 'അവരുടെ നൂറുകണക്കിന് ബില്യൺ ഡോളർ പണവും കടലിടുക്കും ഞങ്ങളുടെ കൈവശമുണ്ട്,' ട്രംപ് സമൂഹമാധ്യമത്തിൽ കുറിച്ചു.