മനാമ/റിയാദ്: മിഡില്‍ ഈസ്റ്റില്‍ യുദ്ധസമാനമായ സാഹചര്യം അതിരൂക്ഷമാകുന്നതിനിടെ ബഹ്റൈനിലെ അമേരിക്കന്‍ സൈനിക താവളത്തിന് നേരെ ഇറാന്റെ ഇസ്ലാമിക് റെവല്യൂഷണറി ഗാര്‍ഡ് കോര്‍പ്‌സ് ഡ്രോണ്‍ ആക്രമണം നടത്തിയതായി അവകാശപ്പെട്ടു. ബഹ്റൈനിലെ അല്‍-റിഫ ഹെലികോപ്റ്റര്‍ താവളത്തിലുള്ള യു.എസ് വ്യോമപ്രതിരോധ റഡാര്‍ സംവിധാനത്തെ ലക്ഷ്യമിട്ട് ആറ് ഡ്രോണുകള്‍ ഉപയോഗിച്ചാണ് ആക്രമണം നടത്തിയതെന്ന് ഇറാന്‍ ഔദ്യോഗിക മാധ്യമം ഞായറാഴ്ച പുലര്‍ച്ചെ റിപ്പോര്‍ട്ട് ചെയ്തു.
അമേരിക്കയുടെ ശത്രുതാപരമായ നടപടികള്‍ക്കുള്ള തിരിച്ചടിയാണിതെന്ന് റെവല്യൂഷണറി ഗാര്‍ഡ്സ് പ്രസ്താവനയില്‍ വ്യക്തമാക്കി. ആക്രമണ റിപ്പോര്‍ട്ടുകള്‍ക്ക് പിന്നാലെ ബഹ്റൈന്‍ ആഭ്യന്തര മന്ത്രാലയം ഞായറാഴ്ച രാവിലെ രണ്ട് തവണ രാജ്യത്ത് സുരക്ഷാ ഭീഷണി മുന്നറിയിപ്പ് പുറപ്പെടുവിച്ചു. പൗരന്മാരും താമസക്കാരും പരിഭ്രാന്തരാകാതെ അടുത്തുള്ള സുരക്ഷിത കേന്ദ്രങ്ങളിലേക്ക് മാറണമെന്നും ഔദ്യോഗിക നിര്‍ദ്ദേശങ്ങള്‍ പാലിക്കണമെന്നും മന്ത്രാലയം അഭ്യര്‍ത്ഥിച്ചു.
അതേസമയം, സൗദി അറേബ്യയുടെ തലസ്ഥാനമായ റിയാദിന് നേരെയും എണ്ണസമ്പന്നമായ കിഴക്കന്‍ പ്രവിശ്യയ്ക്ക് നേരെയും യെമനിലെ ഹൂതി മിലിഷ്യകള്‍ നടത്തിയ മിസൈല്‍-ഡ്രോണ്‍ ആക്രമണ ശ്രമങ്ങളെ സൗദി സഖ്യസേന വിജയകരമായി പരാജയപ്പെടുത്തി. റിയാദിനെ ലക്ഷ്യമിട്ട് ഹൂതികള്‍ തൊടുത്തുവിട്ട രണ്ട് ബാലിസ്റ്റിക് മിസൈലുകളും കിഴക്കന്‍ പ്രവിശ്യയിലേക്ക് അയച്ച മൂന്ന് ഡ്രോണുകളും സൗദി വ്യോമപ്രതിരോധ സേന ആകാശത്തുവെച്ച് തന്നെ തകര്‍ത്തതായി സഖ്യസേനാ വക്താവ് കേണല്‍ തുര്‍ക്കി അല്‍-മാലിക്കി അറിയിച്ചു. കഴിഞ്ഞ ഏതാനും ആഴ്ചകളായി സൗദിയുടെ സാമ്പത്തിക കേന്ദ്രമായ കിഴക്കന്‍ പ്രവിശ്യയെയും വിമാനത്താവളങ്ങളെയും ലക്ഷ്യമിട്ട് ഹൂതികള്‍ ആക്രമണങ്ങള്‍ ശക്തമാക്കിയിരിക്കുകയാണ്. ശനിയാഴ്ചയും റിയാദ് മേഖലയിലേക്കും രാജ്യത്തിന്റെ തെക്കന്‍ പ്രവിശ്യയിലേക്കും ഹൂതികള്‍ അയച്ച രണ്ട് ഡ്രോണുകള്‍ സഖ്യസേന വെടിവെച്ചിട്ടിരുന്നു.
സമുദ്രഗതാഗത മേഖലയിലും സംഘര്‍ഷം പടരുകയാണ്. തന്ത്രപ്രധാനമായ ഹോര്‍മുസ് കടലിടുക്കില്‍ നാവിക മൈനുകളില്‍ തട്ടി മൂന്ന് എണ്ണക്കപ്പലുകള്‍ക്ക് തീപിടിച്ചതായി ഇറാന്‍ നാവികസേനയും റെവല്യൂഷണറി ഗാര്‍ഡ്സും ശനിയാഴ്ച അറിയിച്ചിരുന്നു. ഫെബ്രുവരിയില്‍ യു.എസുമായുള്ള സംഘര്‍ഷം ആരംഭിച്ചതുമുതല്‍ ഹോര്‍മുസ് കടലിടുക്കിലൂടെ സഞ്ചരിക്കുന്ന കപ്പലുകള്‍ക്ക് ഇറാന്‍ കര്‍ശന നിയന്ത്രണങ്ങള്‍ ഏര്‍പ്പെടുത്തിയിരിക്കുകയാണ്. അനുമതിയില്ലാതെ നിരോധിത പാതയിലൂടെ സഞ്ചരിക്കാന്‍ ശ്രമിച്ച രണ്ട് എണ്ണക്കപ്പലുകള്‍ റഡാര്‍, പൊസിഷനിംഗ് സംവിധാനങ്ങള്‍ ഓഫാക്കിയ ശേഷമാണ് കടലിടുക്ക് കടക്കാന്‍ ശ്രമിച്ചതെന്നും തുടര്‍ന്ന് മൈനില്‍ തട്ടി പൊട്ടിത്തെറിച്ച് തീപിടിക്കുകയായിരുന്നുവെന്നും ഇറാന്‍ ആരോപിച്ചു.
മേഖലയിലെ യുദ്ധഭീതിക്കിടെ ഇസ്രായേലില്‍ രാഷ്ട്രീയ നീക്കങ്ങളും സജീവമായിട്ടുണ്ട്. ഇറാന്‍ ഉയര്‍ത്തുന്ന ഭീഷണിയെ പൂര്‍ണ്ണമായി ഇല്ലാതാക്കുമെന്ന പ്രതിജ്ഞ ആവര്‍ത്തിച്ച ഇസ്രായേല്‍ കാവല്‍ പ്രധാനമന്ത്രി ബെഞ്ചമിന്‍ നെതന്യാഹു, രാഷ്ട്രീയ എതിരാളിയായ ഗാഡി ഐസന്‍കോട്ടുമായി ചേര്‍ന്ന് ദേശീയ ഐക്യസര്‍ക്കാര്‍ രൂപീകരിക്കാനുള്ള ആഹ്വാനം ശനിയാഴ്ച വീണ്ടും മുന്നോട്ടുവെച്ചു.
Related News
