റിയാദ്: സൗദി അറേബ്യന്‍ തലസ്ഥാനമായ റിയാദിനെ ലക്ഷ്യമിട്ട് യമനിലെ ഹൂതി വിമതര്‍ വിക്ഷേപിച്ച രണ്ട് ബാലിസ്റ്റിക് മിസൈലുകള്‍ സൗദി വ്യോമപ്രതിരോധ സേന തടഞ്ഞ് തകര്‍ത്തു. സൗദി നേതൃത്വത്തിലുള്ള സഖ്യസേനയുടെ വക്താവ് മേജര്‍ ജനറല്‍ തുര്‍ക്കി അല്‍ മാലിക്കിയാണ് എക്‌സിലൂടെ ഇക്കാര്യം അറിയിച്ചത്.
സൗദി അറേബ്യയുടെ കിഴക്കന്‍ മേഖലയില്‍ ഹൂതികള്‍ അയച്ച നിരവധി ഡ്രോണുകളും സഖ്യസേന തകര്‍ത്തതായി അല്‍ മാലിക്കി അറിയിച്ചു. ഒരേ മേഖലയില്‍ ഡ്രോണ്‍ തകര്‍ത്തതായി അറിയിച്ചുകൊണ്ടുള്ള രണ്ട് സന്ദേശങ്ങള്‍ ഒരു മണിക്കൂറിനുള്ളില്‍ അദ്ദേഹം എക്‌സില്‍ പ്രസിദ്ധീകരിച്ചു. റിയാദിനും തെക്കന്‍ മേഖലകള്‍ക്കും നേരെ അയച്ച രണ്ട് ഡ്രോണുകള്‍ നേരത്തേ തടഞ്ഞതായും സഖ്യസേന വ്യക്തമാക്കിയിരുന്നു.
റിയാദില്‍ സൗദി സിവില്‍ ഡിഫന്‍സ് അടിയന്തര മുന്നറിയിപ്പ് പുറപ്പെടുവിക്കുകയും പിന്നീട് പിന്‍വലിക്കുകയും ചെയ്തു. അപകടസാധ്യതയുണ്ടെന്ന് ആദ്യം അറിയിച്ച അധികൃതര്‍ പിന്നീട് ഭീഷണി ഒഴിഞ്ഞതായി വ്യക്തമാക്കി. സുരക്ഷാ നിര്‍ദേശങ്ങള്‍ പാലിക്കണമെന്നും കൂട്ടംകൂടുന്നത് ഒഴിവാക്കണമെന്നും സംഭവങ്ങള്‍ ചിത്രീകരിക്കാനോ ദൃശ്യങ്ങള്‍ പകര്‍ത്താനോ ശ്രമിക്കരുതെന്നും ജനങ്ങളോട് നിര്‍ദേശിച്ചു.
അയല്‍രാജ്യമായ ബഹ്‌റൈനിലും സുരക്ഷാ മുന്നറിയിപ്പ് പുറപ്പെടുവിച്ചിട്ടുണ്ട്. രാജ്യത്ത് ഭീഷണിയുണ്ടാകാന്‍ സാധ്യതയുണ്ടെന്ന് ചൂണ്ടിക്കാട്ടി ആഭ്യന്തര മന്ത്രാലയമാണ് ജാഗ്രതാ നിര്‍ദേശം നല്‍കിയത്. പരിഭ്രാന്തരാകാതെ സമീപത്തെ സുരക്ഷിതമായ സ്ഥലങ്ങളിലേക്ക് മാറണമെന്നും ഔദ്യോഗിക മാധ്യമങ്ങളിലൂടെ മാത്രം വിവരങ്ങള്‍ അറിയണമെന്നും മന്ത്രാലയം എക്‌സിലൂടെ അറിയിച്ചു.
Related News
