വാഷിംഗ്ടണ്‍: യുഎസും ഇറാനും തമ്മിലുള്ള താല്‍ക്കാലിക വെടിനിര്‍ത്തല്‍ 60 ദിവസത്തേക്ക് കൂടി നീട്ടുന്ന കാര്യത്തില്‍ ഇരുരാജ്യങ്ങളും തമ്മില്‍ ധാരണയിലെത്തി. യുഎസ് പ്രസിഡന്റ് ഡൊണാള്‍ഡ് ട്രംപിന്റെ അന്തിമ അനുമതി ലഭിക്കുന്നതോടെ കരാര്‍ നിലവില്‍ വരും. ഇറാന്റെ ഡ്രോണ്‍ വിന്യാസത്തിന് നേരെ അമേരിക്ക നടത്തിയ ആക്രമണത്തിന് പിന്നാലെ, കുവൈറ്റിലെ യുഎസ് വ്യോമതാവളത്തിന് നേരെ ഇറാന്‍ തിരിച്ചടിച്ചിരുന്നു. ഈ പശ്ചാത്തലത്തിലാണ് പുതിയ നീക്കം.

ഇതുസംബന്ധിച്ച ഔദ്യോഗിക ധാരണാപത്രത്തില്‍ ഇരുപക്ഷവും ഒപ്പുവെച്ചതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. ഇറാന്റെ പക്കലുള്ള സമ്പുഷ്ടീകരിച്ച യുറേനിയം ശേഖരം സംബന്ധിച്ച തര്‍ക്കങ്ങള്‍ പരിഹരിക്കുക എന്നതായിരിക്കും ഈ 60 ദിവസത്തെ കാലാവധിക്കുള്ളില്‍ ഇരുരാജ്യങ്ങളും ആദ്യം ചര്‍ച്ച ചെയ്യുകയെന്ന് ആക്‌സിയോസ് റിപ്പോര്‍ട്ട് ചെയ്യുന്നു. വാര്‍ത്ത പുറത്തുവന്നതോടെ ആഗോള വിപണിയില്‍ എണ്ണവിലയില്‍ ഇടിവ് രേഖപ്പെടുത്തി. ലോകത്തെ പ്രധാന എണ്ണക്കടത്തു പാതയായ ഹോര്‍മുസ് കടലിടുക്ക് വീണ്ടും തുറക്കുമെന്ന പ്രതീക്ഷയിലാണ് വിപണി.

വെടിനിര്‍ത്തല്‍ നീട്ടാന്‍ ധാരണയായെങ്കിലും ഇറാനെതിരെയുള്ള ഉപരോധങ്ങള്‍ പിന്‍വലിക്കുന്ന കാര്യത്തില്‍ ഇപ്പോള്‍ ചര്‍ച്ചകള്‍ നടക്കുന്നില്ലെന്ന് പ്രസിഡന്റ് ട്രംപ് വ്യക്തമാക്കി. അതേസമയം, മൂന്ന് മാസം നീണ്ടുനിന്ന യുദ്ധം അവസാനിപ്പിക്കാനുള്ള സമാധാന ചര്‍ച്ചകള്‍ക്കിടയിലും ഇരുരാജ്യങ്ങളും തമ്മിലുള്ള അക്രമങ്ങള്‍ തുടരുന്നത് ആശങ്ക പരത്തുന്നുണ്ട്. കഴിഞ്ഞ ദിവസം ഇറാന്റെ അഞ്ച് അറ്റാക്ക് ഡ്രോണുകള്‍ യുഎസ് വെടിവെച്ചിട്ടിരുന്നു. ഇതിന് പിന്നാലെ കുവൈറ്റിലെ യുഎസ് താവളത്തിന് നേരെ ഇറാന്‍ ബാലിസ്റ്റിക് മിസൈല്‍ തൊടുത്തുവിട്ടെങ്കിലും കുവൈറ്റ് സൈന്യം ഇത് തടഞ്ഞു. ആക്രമണത്തെ കുവൈറ്റ് ശക്തമായി അപലപിച്ചു.

ബലിപെരുന്നാള്‍ ആഘോഷങ്ങള്‍ക്കിടയിലാണ് മേഖലയില്‍ വീണ്ടും സംഘര്‍ഷം കടുക്കുന്നത്. ഫെബ്രുവരി 28-ന് ഇറാനുനേരെ യുഎസും ഇസ്രായേലും നടത്തിയ ആക്രമണത്തോടെയാണ് നിലവിലെ യുദ്ധത്തിന് തുടക്കമായത്. സമാധാന ചര്‍ച്ചകള്‍ക്കായി മധ്യസ്ഥത വഹിക്കുന്ന പാകിസ്ഥാന്റെ വിദേശകാര്യമന്ത്രി ഇഷാഖ് ദാര്‍ വെള്ളിയാഴ്ച വാഷിംഗ്ടണില്‍ യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോയുമായി കൂടിക്കാഴ്ച നടത്തും. ഇതിനിടെ, ലെബനനിലെ ഹെസ്ബുള്ള കേന്ദ്രങ്ങള്‍ക്ക് നേരെ ഇസ്രായേല്‍ ആക്രമണം ശക്തമാക്കിയിട്ടുണ്ട്. തെക്കന്‍ നഗരമായ ടൈറിലും തലസ്ഥാനമായ ബെയ്‌റൂട്ടിലും ഇസ്രായേല്‍ നടത്തിയ വ്യോമാക്രമണത്തില്‍ ഒരു ലെബനീസ് സൈനികന്‍ കൊല്ലപ്പെട്ടതായും റിപ്പോര്‍ട്ടുകളുണ്ട്.