തിരുവനന്തപുരം: കേരള നിയമസഭയിലെ ഡെപ്യൂട്ടി സ്പീക്കറായി ഷാനിമോള്‍ ഉസ്മാന്‍ തെരഞ്ഞെടുക്കപ്പെട്ടു. 99 വോട്ടുകളാണ് ഷാനിമോള്‍ക്ക് ലഭിച്ചത്. എല്‍.ഡി.എഫിന് വേണ്ടി മത്സരിച്ച മുഹമ്മദ് മുഹ്‌സിന്‍ 34 വോട്ടും ലഭിച്ചു. നാലു പേര്‍ വോട്ട് ചെയ്തില്ല. ബി.ജെ.പി എം.എല്‍.എമാര്‍ വോട്ടെടുപ്പില്‍ നിന്നു വിട്ടുനിന്നു. സ്പീക്കറും വോട്ട് രേഖപ്പെടുത്തിയില്ല. 35 വര്‍ഷത്തിന് ശേഷമാണ് ഡെപ്യൂട്ടി സ്പീക്കര്‍ പദവിയിലേക്ക് വനിത എത്തുന്നത്. അരൂരില്‍ നിന്നുള്ള എം.എല്‍.എയാണ് ഷാനിമോള്‍.

ഈ പദവില്‍ എത്തുന്ന നാലാമത്തെ വനിതയാണ് ഷാനിമോള്‍. കെ.ഒ ഐഷാബീവി, നഫീസത്ത് ബീവി, ഭാര്‍ഗവി തങ്കപ്പന്‍ എന്നിവരാണ് നേരത്തെ ഈ പദവിയിലിരുന്നിട്ടുള്ളത്. അരൂരിലെ സിറ്റിങ് എം.എല്‍.എ ദലീമ ജോജോയെ 9,324 വോട്ടുകള്‍ക്ക് പരാജയപ്പെടുത്തിയാണ് ഇത്തവണ ഷാനിമോള്‍ നിയമസഭയിലെത്തിയത്. 2019ല്‍ അരൂരില്‍ നടന്ന ഉപതെരഞ്ഞെടുപ്പിലൂടെയായിരുന്നു ഷാനിമോള്‍ ആദ്യം സഭയിലെത്തിയത്. 2021ല്‍ വീണ്ടും അരൂരില്‍ മത്സരിച്ചെങ്കിലും ദലീമയോട് തോറ്റു.