ഫിലിപ്പീന്‍സ്: ഇന്ത്യന്‍ ചെസ്സ് ചരിത്രത്തില്‍ നാഴികക്കല്ല് കുറിച്ച് 22-കാരനായ അനുജ് ശ്രീവാത്രി രാജ്യത്തിന്റെ 100-ാം ഗ്രാന്‍ഡ്മാസ്റ്ററായി. ഫിലിപ്പീന്‍സിലെ ഓസാമിസ് സിറ്റിയില്‍ നടന്ന ഏഴാമത് 'ആസിയാന്‍ പ്ലസ് ഇന്‍ഡിവിജ്വല്‍ ഓപ്പണ്‍ ചെസ് ചാമ്പ്യന്‍ഷിപ്പ്' ജയിച്ചാണ് മധ്യപ്രദേശ് സ്വദേശിയായ അനുജ് ഈ നേട്ടത്തിലെത്തിയത്. 1988-ല്‍ വിശ്വനാഥന്‍ ആനന്ദിലൂടെ ആരംഭിച്ച ഇന്ത്യയുടെ ഗ്രാന്‍ഡ്മാസ്റ്റര്‍ പ്രയാണത്തിലാണ് ഇതോടെ നൂറ് തികയുന്നത്.
തുടക്കത്തില്‍ തിരിച്ചടി നേരിട്ടെങ്കിലും ഒന്‍പത് റൗണ്ടുകളില്‍ നിന്ന് ഏഴ് പോയിന്റ് നേടി വിയറ്റ്നാമിന്റെ ന്യൂയെന്‍ ഡുക് ഹോയെ പിന്നിലാക്കിയാണ് അനുജ് കിരീടം സ്വന്തമാക്കിയത്. ഈ വിജയത്തോടെ മധ്യപ്രദേശില്‍നിന്നുള്ള ആദ്യ ഗ്രാന്‍ഡ്മാസ്റ്റര്‍ എന്ന റെക്കോര്‍ഡും അനുജ് ശ്രീവാത്രി നേടി.
2004-ല്‍ ജനിച്ച അനുജ് 2019-ലാണ് ഇന്റര്‍നാഷണല്‍ മാസ്റ്റര്‍ പദവി നേടുന്നത്. കോവിഡ് പ്രതിസന്ധിയെ തുടര്‍ന്ന് പഠനത്തിലേക്ക് ശ്രദ്ധ തിരിച്ച അദ്ദേഹം ലൗലി പ്രൊഫഷണല്‍ യൂണിവേഴ്സിറ്റിയില്‍ നിന്ന് ബി.ടെക് പൂര്‍ത്തിയാക്കുകയും ജര്‍മ്മന്‍ കമ്പനിയില്‍ സോഫ്റ്റ്വെയര്‍ എഞ്ചിനീയറായി ജോലിയെടുക്കുകയും ചെയ്തിരുന്നു. എന്നാല്‍ ചെസ്സിലെ വലിയ ലക്ഷ്യങ്ങള്‍ക്കായി ജോലി ഉപേക്ഷിച്ച് വീണ്ടും കളിക്കളത്തിലേക്ക് തിരിച്ചെത്തുകയായിരുന്നു. അനുജിന്റെ ചരിത്രനേട്ടത്തെ പ്രധാനമന്ത്രി നരേന്ദ്ര മോദി അഭിനന്ദിച്ചു. ഇന്ത്യയില്‍ ചെസ്സ് കായികരംഗത്തിനുണ്ടാകുന്ന വലിയ വളര്‍ച്ചയുടെ തെളിവാണ് ഈ നേട്ടമെന്നും കൂടുതല്‍ യുവാക്കള്‍ക്ക് ഇത് പ്രചോദനമാകുമെന്നും പ്രധാനമന്ത്രി എക്‌സില്‍ കുറിച്ചു.
Related News
