ഗാസ: ഗാസ മുനമ്പിലെ വെടിനിര്‍ത്തല്‍ കരാര്‍ ലംഘിച്ച് ഇസ്രായേല്‍ സൈന്യം ആക്രമണം തുടരുന്നു. ഫലസ്തീന്‍ ഇന്‍ഫര്‍മേഷന്‍ സെന്ററിന്റെ റിപ്പോര്‍ട്ട് പ്രകാരം ഖാന്‍ യൂനുസ് തീരത്ത് ഇസ്രായേല്‍ യുദ്ധക്കപ്പലുകള്‍ നടത്തിയ വെടിവെപ്പില്‍ ഒരു ഫലസ്തീനി മീന്‍പിടുത്തക്കാരന് പരിക്കേറ്റു. ആക്രമണത്തില്‍ രണ്ട് മീന്‍പിടുത്ത ബോട്ടുകള്‍ പൂര്‍ണ്ണമായി തകര്‍ന്നു.

ഖാന്‍ യൂനുസിന് കിഴക്ക് ഇസ്രായേല്‍ സൈന്യം ഷെല്ലാക്രമണവും വെടിവെപ്പും തുടരുകയാണ്. നഗരത്തിന് തെക്കുഭാഗത്ത് വലിയ തോതില്‍ പുക ഉയര്‍ന്നതായി റിപ്പോര്‍ട്ടുണ്ട്. മധ്യ ഗാസയിലെ ദൈര്‍ അല്‍-ബലാഹിന് കിഴക്കുള്ള പ്രദേശങ്ങളിലേക്കും ഇസ്രായേല്‍ പീരങ്കി ആക്രമണം നടത്തി. കഴിഞ്ഞ തിങ്കളാഴ്ച ഇസ്രായേല്‍ നടത്തിയ ഡ്രോണ്‍ ആക്രമണങ്ങളിലും വെടിവെപ്പിലും ഒരു ഫലസ്തീനി കൊല്ലപ്പെടുകയും 14 പേര്‍ക്ക് പരിക്കേല്‍ക്കുകയും ചെയ്തിരുന്നു.

ഫലസ്തീന്‍ ആരോഗ്യ മന്ത്രാലയത്തിന്റെ ഏറ്റവും പുതിയ വിവരങ്ങള്‍ പ്രകാരം പ്രധാന കണക്കുകള്‍ താഴെ പറയുന്നവയാണ്: 2025 ഒക്ടോബര്‍ 10 വെടിനിര്‍ത്തല്‍ കരാറിന് ശേഷം കൊല്ലപ്പെട്ടവരുടെ എണ്ണം 1,613 ആയി ഉയര്‍ന്നു. 5,833 പേര്‍ക്ക് പരിക്കേറ്റു. 849 പേരുടെ മൃതദേഹങ്ങള്‍ ഇക്കാലയളവില്‍ കെട്ടിടാവശിഷ്ടങ്ങള്‍ക്കിടയില്‍ നിന്ന് വീണ്ടെടുത്തു.
2023 ഒക്ടോബര്‍ 7 ന് ഇസ്രായേല്‍ ആക്രമണം ആരംഭിച്ചത് മുതല്‍ ഇതുവരെ കൊല്ലപ്പെട്ടവരുടെ ആകെ എണ്ണം 74,643 ആയി ഉയര്‍ന്നു. പരിക്കേറ്റവരുടെ എണ്ണം 1,75,962ല്‍ എത്തിനില്‍ക്കുന്നു.