റിയാദ്: റിയാദില്‍ ഹൂതി ഭീകരര്‍ ആക്രമണം നടത്തിയ സൗദി അറാംകോയുടെ സിവില്‍ ഭരണനിര്‍വ്വഹണ കെട്ടിടം റിയാദ് മേഖല ഡെപ്യൂട്ടി ഗവര്‍ണര്‍ അമീര്‍ മുഹമ്മദ് ബിന്‍ അബ്ദുല്‍ റഹ്‌മാന്‍ ബിന്‍ അബ്ദുല്‍ അസീസ് സന്ദര്‍ശിച്ചു. ഭീകരാക്രമണത്തില്‍ കെട്ടിടത്തിനുണ്ടായ നിസ്സാര നാശനഷ്ടങ്ങള്‍ അദ്ദേഹം നേരിട്ട് വിലയിരുത്തി.
അറാംകോയിലെയും റിയാദ് പ്രവിശ്യയിലെയും ബന്ധപ്പെട്ട ഉദ്യോഗസ്ഥരില്‍ നിന്നും സുരക്ഷാ വിഭാഗങ്ങളില്‍ നിന്നും ഉടനടി സ്വീകരിച്ച സുരക്ഷാ-അടിയന്തര നടപടികളെക്കുറിച്ച് അദ്ദേഹം വിശദീകരണം തേടി.
സാധാരണക്കാരുടെയും സിവിലിയന്‍ സ്ഥാപനങ്ങളുടെയും സുരക്ഷയെ തകര്‍ക്കാന്‍ ശ്രമിക്കുന്ന ഹൂതി മിലിഷ്യകളുടെ യഥാര്‍ത്ഥ ഭീകരമുഖമാണ് ഈ ആക്രമണത്തിലൂടെ വീണ്ടും വെളിപ്പെട്ടിരിക്കുന്നതെന്ന് ഡെപ്യൂട്ടി ഗവര്‍ണര്‍ പറഞ്ഞു. അറാംകോ ജീവനക്കാരുടെ ദൗത്യങ്ങളും പ്രവര്‍ത്തനങ്ങളും കൂടുതല്‍ തടസ്സമില്ലാതെ വേഗത്തിലാക്കാന്‍ ആവശ്യമായ എല്ലാ വിഭവങ്ങളും സൗകര്യങ്ങളും ലഭ്യമാക്കാന്‍ അദ്ദേഹം ഉദ്യോഗസ്ഥര്‍ക്ക് നിര്‍ദ്ദേശം നല്‍കി. രാജ്യത്തിന്റെ സുരക്ഷയ്ക്കും സ്ഥിരതയ്ക്കും ഭരണകൂടം നല്‍കുന്ന കരുതലിന് നന്ദി അറിയിച്ച അദ്ദേഹം, ഏത് ഭീഷണിയെയും നേരിടാന്‍ സൗദി സുരക്ഷാ സേന പൂര്‍ണ്ണ സജ്ജമാണെന്നും കൂട്ടിച്ചേര്‍ത്തു.
മേഖലയിലെ പ്രമുഖ സുരക്ഷാ ഉദ്യോഗസ്ഥരും ഡെപ്യൂട്ടി ഗവര്‍ണര്‍ക്കൊപ്പമുണ്ടായിരുന്നു. സിവില്‍, മിലിട്ടറി, സുരക്ഷാ മേഖലകളിലെ ജീവനക്കാരുടെ വേഗത്തിലുള്ള ഇടപെടലുകളെ അദ്ദേഹം പ്രത്യേകം അഭിനന്ദിച്ചു.
Related News
