അബുദാബി: യുഎഇയുടെ തലസ്ഥാന നഗരിയിലെ റിയല് എസ്റ്റേറ്റ് മേഖലയുടെ സ്ഥിരതയും സുസ്ഥിരതയും ഉറപ്പുവരുത്തുന്നതിനായി നിര്ണായക തീരുമാനവുമായി അബുദാബി റിയല് എസ്റ്റേറ്റ് സെന്റര് (ADREC). എമിറേറ്റിലുടനീളം വാടക നിരക്കുകള് വര്ദ്ധിപ്പിക്കുന്നത് താല്ക്കാലികമായി നിര്ത്തിവെച്ചതായി അധികൃതര് അറിയിച്ചു.
അടുത്ത അറിയിപ്പ് ഉണ്ടാകുന്നത് വരെ എല്ലാത്തരം ലീസ് കരാറുകളുടെയും വാടക മൂല്യം മാറ്റമില്ലാതെ തുടരുമെന്ന് ADREC പ്രസ്താവനയില് വ്യക്തമാക്കി. നിലവിലുള്ള വാടകക്കരാറുകള് പുതുക്കുന്നതിനും പുതുതായി ഒപ്പുവെക്കുന്ന കരാറുകള്ക്കും ഈ തീരുമാനം ബാധകമാണ്. ഇത് വാടകക്കാര്ക്കും ഭൂവുടമകള്ക്കും ഒരുപോലെ കൂടുതല് വ്യക്തതയും ആശ്വാസവും നല്കും.
ഒരു പ്രോപ്പര്ട്ടിയുടെ ഏറ്റവും പുതിയ ലീസ് കരാറില് വ്യക്തമാക്കിയിട്ടുള്ള വാടക തുകയായിരിക്കും ഇനി റഫറന്സ് മൂല്യമായി കണക്കാക്കുക. വിലക്ക് നിലനില്ക്കുന്ന കാലയളവില്, ഒടുവില് ഒപ്പുവെച്ച കരാറിലെ നിരക്കിനേക്കാള് കൂടുതല് വാടക ഈടാക്കാന് ഭൂവുടമകള്ക്ക് അനുവാദമുണ്ടായിരിക്കില്ല.
'റിയല് എസ്റ്റേറ്റ് വിപണിയില് കൃത്യമായ സന്തുലിതാവസ്ഥ നിലനിര്ത്തുന്നതിനും, സുതാര്യത വര്ദ്ധിപ്പിക്കുന്നതിനും, ഒപ്പം ഈ മേഖലയിലെ എല്ലാ ഗുണഭോക്താക്കളുടെയും താല്പ്പര്യങ്ങള് സംരക്ഷിക്കുന്നതിനുമുള്ള വിപുലമായ ശ്രമങ്ങളുടെ ഭാഗമായാണ് ഈ പുതിയ നടപടി.'
ADREC വക്താവ് പറഞ്ഞു.
ഈ വിലക്ക് താല്ക്കാലികം മാത്രമാണെന്നും പുതിയ നിര്ദ്ദേശം പുറപ്പെടുവിക്കുന്നത് വരെ ഇത് പ്രാബല്യത്തില് തുടരുമെന്നും അതോറിറ്റി കൂട്ടിച്ചേര്ത്തു. ഈ തീരുമാനം വാടകക്കാര്ക്ക് വലിയ ആശ്വാസം നല്കുന്നതോടൊപ്പം, വിപണിയിലെ സ്ഥിരതയും നിക്ഷേപകരുടെ ആത്മവിശ്വാസവും വര്ദ്ധിപ്പിക്കാന് സഹായിക്കുമെന്നാണ് വിലയിരുത്തപ്പെടുന്നത്.
Related News
