ജിദ്ദ: സൗദി അറേബ്യയില് ഈ വര്ഷത്തെ വേനല്ക്കാലത്ത് രാജ്യത്തുടനീളം താപനില സാധാരണയേക്കാള് ഉയര്ന്നേക്കുമെന്ന് ദേശീയ കാലാവസ്ഥാ നിരീക്ഷണ കേന്ദ്രത്തിന്റെ (NCM) മുന്നറിയിപ്പ്. അതേസമയം, വിവിധ പ്രദേശങ്ങളില് മഴയുടെ അളവ് സാധാരണ നിലയിലോ അതില് കുറവോ ആയിരിക്കുമെന്നും കാലാവസ്ഥാ പ്രവചന റിപ്പോര്ട്ടില് പറയുന്നു.
ദേശീയ കാലാവസ്ഥാ നിരീക്ഷണ കേന്ദ്രം പുറത്തുവിട്ട സീസണല് കാലാവസ്ഥാ റിപ്പോര്ട്ട് പ്രകാരം ജൂണ് മാസത്തില് രാജ്യത്തുടനീളം സാധാരണ നിലയിലുള്ള മഴ ലഭിക്കാനാണ് സാധ്യത. എന്നാല് ജിസാന്, ബാഹ, മക്ക, അസീര്, മദീന, റിയാദ്, ഖസീം, ഹായില്, തബൂക്ക് എന്നീ പ്രദേശങ്ങളില് താപനില സാധാരണയേക്കാള് 1.5 ഡിഗ്രി സെല്ഷ്യസ് വരെ ഉയര്ന്നേക്കാം.
ജൂലൈ, ഓഗസ്റ്റ് മാസങ്ങളില് ജിസാന്, ബാഹ, അസീര്, മക്കയുടെ ചില ഭാഗങ്ങള് എന്നിവിടങ്ങളില് താപനില സാധാരണയേക്കാള് 1.6 ഡിഗ്രി സെല്ഷ്യസ് വരെ വര്ദ്ധിക്കാന് സാധ്യതയുണ്ട്. ജൂലൈ മാസത്തില് ജിസാന്, ബാഹ, അസീറിന്റെ ചില ഭാഗങ്ങള്, മക്ക, നജ്റാന്, കിഴക്കന് പ്രവിശ്യകള് (ഈസ്റ്റേണ് റീജിയന്) എന്നിവിടങ്ങളില് സാധാരണയേക്കാള് കുറഞ്ഞ മഴയേ ലഭിക്കൂ. എന്നാല് രാജ്യത്തിന്റെ മറ്റ് ഭാഗങ്ങളില് മഴ സാധാരണ നിലയിലായിരിക്കും.
വേനല്ക്കാലത്തെ നേരിടുന്നതിനായുള്ള മുന്കരുതലുകള് സ്വീകരിക്കുന്നതിനും കൃത്യമായ ആസൂത്രണങ്ങള് നടത്തുന്നതിനുമായി ഔദ്യോഗിക ചാനലുകള് വഴി പുറപ്പെടുവിക്കുന്ന കാലാവസ്ഥാ റിപ്പോര്ട്ടുകളും അപ്ഡേറ്റുകളും നിരന്തരം പിന്തുടരണമെന്ന് കാലാവസ്ഥാ നിരീക്ഷണ കേന്ദ്രം വിവിധ സര്വീസ്-ഓപ്പറേഷണല് മേഖലകളോട് അഭ്യര്ത്ഥിച്ചു.
Related News
