മക്ക: മക്കയിലെ ഗ്രാന്ഡ് മസ്ജിദിന്റെ (മസ്ജിദുല് ഹറം) ദശാബ്ദങ്ങള് പഴക്കമുള്ള വികസന ചരിത്രവും സേവനങ്ങളും വിളിച്ചോതുന്ന അപൂര്വ പുരാവസ്തുക്കളുടെ പ്രദര്ശനം സന്ദര്ശകര്ക്ക് വേറിട്ട അനുഭവമാകുന്നു. 'എക്സിബിഷന് ഓഫ് ദി ടു ഹോളി മോസ്ക്സ് ആര്ക്കിടെക്ചര്' ആണ് ചരിത്രരേഖകളും അപൂര്വ വസ്തുക്കളും പ്രദര്ശിപ്പിച്ചുകൊണ്ട് സന്ദര്ശകരുടെ അനുഭവം സമ്പന്നമാക്കുന്നത്.
മുന്കാലങ്ങളില് ഹജറുല് അസ്വദിന് (കറുത്ത ശില) സമീപം സ്ഥാപിച്ചിരുന്ന, മാര്ബിള് അടിത്തറയോട് കൂടിയ ഒരു മരപ്പീഠം ഈ പ്രദര്ശനത്തിലെ പ്രധാന ആകര്ഷണങ്ങളിലൊന്നാണ്. കഅബയെ വലംവെക്കുന്ന (ത്വവാഫ്) തീര്ത്ഥാടകരുടെ തിരക്ക് നിയന്ത്രിക്കാനും സുഗമമായ സഞ്ചാരം ഉറപ്പാക്കാനുമായി സുരക്ഷാ ഉദ്യോഗസ്ഥര് നിന്നിരുന്നത് ഈ പീഠത്തിന്മേലായിരുന്നു. ആധുനിക സാങ്കേതികവിദ്യകളും അത്യാധുനിക സംവിധാനങ്ങളും നിലവില് വരുന്നതിന് മുന്പ്, ജനക്കൂട്ടത്തെ നിയന്ത്രിക്കാന് ഉപയോഗിച്ചിരുന്ന ആദ്യകാല പ്രായോഗിക മാര്ഗ്ഗങ്ങളെ ഈ പുരാവസ്തു എടുത്തുകാണിക്കുന്നു. വന്തിരക്കുള്ള സമയങ്ങളില് ഉംറ തീര്ത്ഥാടകരുടെയും മറ്റ് സന്ദര്ശകരുടെയും സുഗമമായ നീക്കത്തിന് ഈ സംവിധാനം എത്രത്തോളം സഹായകരമായിരുന്നുവെന്ന് എക്സിബിഷന് സന്ദര്ശകര്ക്ക് വിശദീകരിച്ചുനല്കുന്നുണ്ട്.
മസ്ജിദുല് ഹറാമിന്റെയും മസ്ജിദുന്നബവിയുടെയും ചരിത്രം കൃത്യമായി രേഖപ്പെടുത്തുക, കാലാകാലങ്ങളായി അവിടെയുണ്ടായ വാസ്തുവിദ്യാ-സേവന വികസനങ്ങള് പുരാവസ്തുക്കള്, ചിത്രങ്ങള്, ചരിത്രരേഖകള് എന്നിവ പൊതുജനങ്ങളിലേക്ക് എത്തിക്കുക എന്നതാണ് പ്രദര്ശന ലക്ഷ്യം.
.jpg)
Related News
