ജിദ്ദ: തെരഞ്ഞെടുപ്പില് വര്ഗീയ വിഭാഗീയത സൃഷ്ടിച്ച് സ്വന്തം സ്ഥാനാര്ത്ഥിയെ വിജയിപ്പിക്കാന് 'കാഫിര്' സ്ക്രീന്ഷോട്ട് പ്രചരിപ്പിച്ചും, സമൂഹത്തില് അപകടകരമായ ഭിന്നിപ്പുണ്ടാക്കിയും നികൃഷ്ടമായ പ്രവര്ത്തനങ്ങള്ക്ക് നേതൃത്വം നല്കിയ സിപിഎമ്മിന്റെ പൈശാചികമായ അന്തര്നാടകങ്ങള് പൊളിച്ചടുക്കിയ അന്വേഷണ സംഘത്തെ ജിദ്ദ കെ.എം.സി.സി സെന്ട്രല് കമ്മിറ്റി ഭാരവാഹികളുടെ യോഗം അഭിനന്ദിച്ചു.
ഇന്ത്യയില് തന്നെ ഏറ്റവും ഉയര്ന്ന രാഷ്ട്രീയ പ്രബുദ്ധതയുള്ള സംസ്ഥാനമാണ് കേരളം. ഇവിടെ വികസനവും ജനക്ഷേമവും രാഷ്ട്രീയ വിഷയങ്ങളും ചര്ച്ച ചെയ്ത് വോട്ട് പിടിക്കുന്നതിന് പകരം, മത-ജാതി വിഷയങ്ങള് ഇളക്കിവിട്ട് ജനങ്ങളെ തമ്മിലടിപ്പിക്കാന് സിപിഎം നടത്തിയ ശ്രമങ്ങളെ പ്രബുദ്ധരായ വോട്ടര്മാര് അന്ന് തന്നെ തള്ളിക്കളഞ്ഞതാണ്. കാഫിര് സ്ക്രീന്ഷോട്ട് നിര്മ്മിച്ച് പ്രചരിപ്പിച്ചതിന് പിന്നില് പ്രവര്ത്തിച്ച സിപിഎം പ്രവര്ത്തകരെ ഇപ്പോള് അന്വേഷണ സംഘം കണ്ടെത്തിയിരിക്കുകയാണ്.
മുസ്ലിം സമൂഹത്തെ പ്രതിക്കൂട്ടില് നിര്ത്തി ഭൂരിപക്ഷ സമുദായത്തിന്റെ വോട്ട് നേടാം എന്ന മൂഢധാരണയില് അങ്ങേയറ്റം അപകടകരമായ പ്രവര്ത്തനങ്ങളാണ് സിപിഎം നടത്തിക്കൊണ്ടിരിക്കുന്നത്. കാഫിര് സ്ക്രീന്ഷോട്ട് വിവാദം, 'മാഷാ അള്ളാ' സ്റ്റിക്കര് വിവാദം, മലപ്പുറം വിരുദ്ധ പ്രചാരണം, വെള്ളാപ്പള്ളി നടേശനെ പ്രീണിപ്പിക്കാനുള്ള നീക്കം, പി.എം. ശ്രീ പദ്ധതിയില് ഒപ്പിടല് തുടങ്ങിയവയെല്ലാം ഇതിന്റെ ഭാഗമാണ്. എന്നാല്, മതേതരത്വത്തില് നിന്ന് മലയാളി സമൂഹത്തെ പിന്തിരിപ്പിക്കാന് ഒരു ശക്തിക്കും കഴിയില്ലെന്ന് കഴിഞ്ഞ തെരഞ്ഞെടുപ്പുകള് തെളിയിച്ചു കഴിഞ്ഞു.
അധികാരമേറ്റ പുതിയ യു.ഡി.എഫ് സര്ക്കാരിന്റെ നീക്കങ്ങള് ഏറെ പ്രതീക്ഷയുളവാക്കുന്നതാണ്. സമൂഹത്തില് വിപത്തുകള് വിതയ്ക്കുന്ന ലഹരി ഉല്പ്പന്നങ്ങള് പിടിച്ചെടുക്കാനും ലഹരി മാഫിയയെ അമര്ച്ച ചെയ്യാനും സര്ക്കാര് നടത്തുന്ന ശ്രമങ്ങളെ യോഗം പ്രത്യേകം അഭിനന്ദിച്ചു.
പ്രസിഡന്റ് അബൂബക്കര് അരിമ്പ്ര അധ്യക്ഷത വഹിച്ചു. സി.കെ. റസാഖ് മാസ്റ്റര്, എ.കെ. മുഹമ്മദ് ബാവ, ലത്തീഫ് മുസ്ല്യാരങ്ങാടി, ഹസ്സന് ബത്തേരി, ലത്തീഫ് കളരാന്തരി, ജലാല് തേഞ്ഞിപ്പാലം, ഹുസൈന് കരിങ്കറ, ഇസ്ഹാഖ് പൂണ്ടോളി, ശിഹാബ് താമരകുളം, സാബില് മമ്പാട്, സിറാജ് കണ്ണവം, സുബൈര് വട്ടോളി, ശക്കീര് മണ്ണാര്ക്കാട് എന്നിവര് ചര്ച്ചയില് പങ്കെടുത്തു. ജനറല് സെക്രട്ടറി വി.പി. മുസ്തഫ സ്വാഗതവും ട്രഷറര് വി.പി. അബ്ദുറഹ്മാന് നന്ദിയും പറഞ്ഞു.
.jpg)
Related News
