റിയാദ്: വി.ഡി. സതീശന്‍ മുഖ്യമന്ത്രിയായി അധികാരമേറ്റതിന് ശേഷം അവതരിപ്പിച്ച ആദ്യ സംസ്ഥാന ബജറ്റ് പ്രവാസി സൗഹൃദവും സാധാരണക്കാരന്റെ ക്ഷേമം മുന്‍നിര്‍ത്തിയുള്ളതുമാണെന്ന് റിയാദ് ഒ.ഐ.സി.സി പ്രസ്താവനയില്‍ അറിയിച്ചു. സാമ്പത്തിക അച്ചടക്കം പാലിച്ച് കൊണ്ടുതന്നെ സംസ്ഥാനത്തിന്റെ വികസനത്തിന് പുത്തനുണര്‍വ് നല്‍കുന്നതാണ് ബജറ്റ് നിര്‍ദ്ദേശങ്ങളെന്ന് റിയാദ് ഒ.ഐ.സി.സി നേതൃത്വം വിലയിരുത്തി.

പ്രവാസികള്‍ക്കായി ബജറ്റില്‍ പ്രഖ്യാപിച്ച സമഗ്ര പദ്ധതികളെ സംഘടന പ്രത്യേകം സ്വാഗതം ചെയ്തു. മടങ്ങിയെത്തുന്ന പ്രവാസികളുടെ പുനരധിവാസത്തിനായി കുറഞ്ഞ പലിശയില്‍ വായ്പകള്‍, നോര്‍ക്ക വഴിയുള്ള 'പ്രവാസി ഡിവിഡന്റ് സ്‌കീം', 'സാന്ത്വനം' പദ്ധതി എന്നിവ വലിയൊരു ആശ്വാസമാണ്. പ്രവാസികളെ വെറും പണം അയക്കുന്നവരായി കാണാതെ, കേരളത്തിന്റെ സമ്പദ്വ്യവസ്ഥയെ 'നിക്ഷേപാധിഷ്ഠിത സമ്പദ്വ്യവസ്ഥ'യായി മാറ്റാന്‍ ലക്ഷ്യമിട്ടുള്ള 'പ്രവാസി ഇന്‍വെസ്റ്റ്മെന്റ് ഫണ്ട്' രൂപീകരിക്കാനുള്ള തീരുമാനം വളരെ ദീര്‍ഘവീക്ഷണമുള്ളതാണ്. ഇതിനൊപ്പം വിദേശത്തുനിന്ന് തിരിച്ചെത്തുന്നവര്‍ക്കും നിക്ഷേപകര്‍ക്കുമായി 'പ്രവാസി വ്യവസായ പാര്‍ക്കുകള്‍' ആരംഭിക്കുന്നത് സംരംഭകര്‍ക്ക് മികച്ച അവസരമൊരുക്കും.

വിദേശ തൊഴില്‍ വിപണിയിലെ മാറ്റങ്ങള്‍ കൃത്യമായി നിരീക്ഷിക്കാനായി 2 കോടി രൂപ വകയിരുത്തി 'ഗ്ലോബല്‍ ജോബ് വാച്ച് ടവര്‍' സ്ഥാപിക്കാനുള്ള തീരുമാനത്തെയും സംഘടന അഭിനന്ദിച്ചു. കൂടാതെ, പ്രവാസികള്‍ക്ക് ഏറെ പ്രയോജനപ്പെടുന്ന നാല് വിമാനത്താവളങ്ങളുടെ ഏകോപിത വികസനത്തിനും ഏവിയേഷന്‍ ലോജിസ്റ്റിക്‌സ് ഹബ്ബിനുമായി 200 കോടി രൂപ അനുവദിച്ചത് വിമാനയാത്രാ രംഗത്ത് വലിയ മാറ്റങ്ങള്‍ കൊണ്ടുവരും. പ്രവാസി ക്ഷേമനിധി ബോര്‍ഡ് വഴി നല്‍കുന്ന പെന്‍ഷന്‍ തുകയിലും ചികിത്സാ സഹായത്തിലും വരുത്തിയ വര്‍ധനവും ഏറെ സ്വാഗതാര്‍ഹമാണ്.

കേരളത്തിന്റെ വികസന യാത്രയില്‍ പ്രവാസികളുടെ പങ്ക് വലുതാണെന്നും, സര്‍ക്കാര്‍ പ്രഖ്യാപിച്ച ഈ പദ്ധതികള്‍ സമയബന്ധിതമായും സുതാര്യമായും നടപ്പിലാക്കുമെന്ന വിശ്വാസമുണ്ടെന്നും റിയാദ് ഒ.ഐ.സി.സി പ്രസിഡന്റ് സലീം കളക്കര, ആക്റ്റിംഗ് ജനറല്‍ സെക്രട്ടറി സുരേഷ് ശങ്കര്‍, മീഡിയ കണ്‍വീനര്‍ അശ്‌റഫ് മേച്ചേരി എന്നിവര്‍ വ്യക്തമാക്കി. വരും നാളുകളില്‍ ഈ പദ്ധതികള്‍ കേരളത്തെ പുതിയൊരു വികസന പാതയിലേക്ക് നയിക്കുമെന്നും പ്രസ്താവനയില്‍ പറഞ്ഞു.