റിയാദ്: സൗദി അറേബ്യയുടെ വടക്കന് അതിര്ത്തി മേഖലയില് കരിങ്കല് ക്രഷര് മെഷീനുള്ളില് ഒളിപ്പിച്ച നിലയില് കടത്താന് ശ്രമിച്ച 14 ലക്ഷത്തിലധികം ആംഫെറ്റാമിന് ഗുളികകള് അധികൃതര് പിടികൂടി. സംഭവത്തില് മയക്കുമരുന്ന് കടത്താന് നേതൃത്വം നല്കിയ ഒരു വിദേശി അടക്കം നാല് പേരെ ജനറല് ഡയറക്ടറേറ്റ് ഓഫ് നാര്ക്കോട്ടിക്സ് കണ്ട്രോള് അറസ്റ്റ് ചെയ്തു.
പിടിയിലായവരില് ലഹരി വസ്തുക്കള് കടത്തിയ ജോര്ദാന് സ്വദേശിയും, അത് കൈപ്പറ്റാനെത്തിയ മൂന്ന് സൗദി പൗരന്മാരും ഉള്പ്പെടുന്നു. രാജ്യത്തിന്റെ സുരക്ഷയെയും യുവതലമുറയെയും ലക്ഷ്യമിട്ടുള്ള ലഹരി കടത്തിനെതിരെ ആഭ്യന്തര മന്ത്രാലയം നടത്തുന്ന കര്ശന നടപടികളുടെ ഭാഗമായാണ് ഈ റെയ്ഡ്.
ജൂണ് മാസത്തില് മാത്രം നിരവധി വലിയ മയക്കുമരുന്ന് കടത്തുകളാണ് സൗദി സുരക്ഷാ ഏജന്സികള് തകര്ത്തത്. ഇന്റലിജന്സ് വിവരങ്ങള് കൈമാറി ലെബനന് അധികൃതരുമായി ചേര്ന്ന് 39 ലക്ഷം ഗുളികകള് പിടിച്ചെടുത്തിരുന്നു. രഹസ്യാന്വേഷണ വിവരങ്ങളുടെ അടിസ്ഥാനത്തില് യുഎഇയില് ഒരു ക്രിമിനല് സംഘത്തെ തകര്ക്കുകയും 2,67,300 ഗുളികകള് പിടിച്ചെടുക്കുകയും ചെയ്തു. കാര്ഡ്ബോര്ഡ് ഷീറ്റുകള്ക്കുള്ളില് ഒളിപ്പിച്ച 8,45,087 ഗുളികകള് ജൂണ് തുടക്കത്തില് കിഴക്കന് മേഖലയില്നിന്ന് പിടികൂടിയിരുന്നു. രാജ്യത്തെ ലക്ഷ്യമിട്ടുള്ള കുറ്റവാളി സംഘങ്ങളെ മേഖലയിലെ പങ്കാളികളുമായി ചേര്ന്ന് പൂര്ണ്ണമായും തുടച്ചുനീക്കുമെന്ന് ആഭ്യന്തര മന്ത്രാലയ വക്താവ് ബ്രിഗേഡിയര് ജനറല് തലാല് ബിന് അബ്ദുള് മൊഹ്സന് ബിന് ഷല്ഹൂബ് വ്യക്തമാക്കി.
Related News
