മോണ്ടെറി, മെക്സിക്കോ: തങ്ങളുടെ പൂര്ണ്ണമായ കഴിവില് കളിച്ചാല് മൊറോക്കോയെ തടയാന് ആര്ക്കും കഴിയില്ലെന്നും, ലോകകപ്പില് വലിയൊരു കുതിപ്പിന് ടീം സജ്ജമാണെന്നും പരിശീലകന് മുഹമ്മദ് ഔവാബി. നെതര്ലന്ഡ്സിനെതിരായ ആവേശകരമായ പ്രീക്വാര്ട്ടര് പോരാട്ടത്തില് പെനാല്റ്റി ഷൂട്ടൗട്ടിലൂടെ വിജയം കൈവരിച്ചതിന് പിന്നാലെയാണ് ഔവാബിയുടെ പ്രതികരണം.
2022-ലെ ഖത്തര് ലോകകപ്പില് സെമിഫൈനലിലെത്തിയ അതേ ആത്മവിശ്വാസത്തോടെയാണ് മൊറോക്കോ ഇത്തവണയും കളിക്കുന്നത്. അന്നത്തെ ചരിത്രനേട്ടം മൊറോക്കന് ഫുട്ബോളിന്റെ മാനസികാവസ്ഥ തന്നെ മാറ്റിയെന്ന് ഔവാബി പറഞ്ഞു. കഴിഞ്ഞ വര്ഷം ചിലിയില് നടന്ന അണ്ടര്-20 ലോകകപ്പില് മൊറോക്കോയെ ജേതാക്കളാക്കിയ പരിശീലകനാണ് അദ്ദേഹം.
'ഖത്തര് ലോകകപ്പ് മൊറോക്കന് ടീമിന്റെ മനോഭാവത്തെ മാറ്റിമറിച്ചു. നാട്ടിലെ താരങ്ങളും ആരാധകരും ഇപ്പോള് നമ്മളെ വിശ്വസിക്കുന്നുണ്ട്. അത് വളരെ പ്രധാനപ്പെട്ടതാണ്. അവര്ക്ക് നമ്മളില് നിന്ന് വലിയ പ്രതീക്ഷകളുണ്ട്, കാരണം നമുക്ക് എത്രത്തോളം മുന്നേറാന് കഴിയുമെന്ന് അവര്ക്കറിയാം,' അദ്ദേഹം കൂട്ടിച്ചേര്ത്തു.
ക്വാര്ട്ടര് ഫൈനല് ലക്ഷ്യമിട്ട് കാനഡയ്ക്കെതിരെയാണ് മൊറോക്കോയുടെ അടുത്ത മത്സരം. എന്നാല് കാനഡയ്ക്കെതിരായ പോരാട്ടം എളുപ്പമായിരിക്കില്ലെന്ന് ഔവാബി മുന്നറിയിപ്പ് നല്കി. 'ഓരോ മത്സരവും ഗൗരവത്തോടെയാണ് കാണുന്നത്. കാനഡയ്ക്കെതിരായ മത്സരം കടുപ്പമായിരിക്കും. നമ്മള് അറിയുന്ന രീതിയില് ഫുട്ബോള് കളിച്ചാല് നമ്മളെ ആര്ക്കും തടയാനാവില്ല. എന്നാല്, ആരും തോല്പ്പിക്കാനാവാത്തവരല്ലെന്നും ഞാന് എന്റെ കളിക്കാരോട് പറയാറുണ്ട്. ചെറിയ പിഴവ് പോലും നമ്മളെ ടൂര്ണമെന്റില് നിന്ന് പുറത്താക്കും,' ഔവാബി വ്യക്തമാക്കി.
അതേസമയം, ആഫ്രിക്കന് ഫുട്ബോളിന്റെ ഗുണനിലവാരം ഉയര്ന്നു വരുന്നത് വ്യക്തമാണെന്ന് നെതര്ലന്ഡ്സ് പരിശീലകന് റൊണാള്ഡ് കോമാന് പറഞ്ഞു. 'ഈ ലോകകപ്പില് ആഫ്രിക്കന് ടീമുകള് തന്ത്രപരമായും കളിയുടെ ശൈലിയിലും വലിയ പുരോഗതി കൈവരിച്ചിട്ടുണ്ട്. മികച്ച യുവതാരങ്ങളെ വാര്ത്തെടുക്കുന്നതില് മൊറോക്കോ മുന്പന്തിയിലാണ്. അവരുടെ താരങ്ങള് യൂറോപ്പിലെ വന്കിട ക്ലബ്ബുകളില് ഇടംപിടിക്കുന്നുണ്ട്. അതുകൊണ്ട് തന്നെ നെതര്ലന്ഡ്സിനേക്കാള് ഉയര്ന്ന റാങ്കിംഗ് അവര്ക്കുണ്ടെന്നതില് അത്ഭുതമില്ല,' കോമാന് പറഞ്ഞു.
