ടൊറന്റോ: ഫുട്‌ബോളിലെ സാങ്കേതികവിദ്യയുടെ അമിതമായ ഇടപെടലുകള്‍ കളിയുടെ ആവേശം കെടുത്തുകയാണെന്ന് ക്രൊയേഷ്യന്‍ പരിശീലകന്‍ സ്ലാറ്റ്‌കോ ഡാലിക്. പോര്‍ച്ചുഗലിനെതിരായ ലോകകപ്പ് മത്സരത്തില്‍ ക്രൊയേഷ്യയുടെ അവസാന നിമിഷ സമനില ഗോള്‍ VAR (വീഡിയോ അസിസ്റ്റന്റ് റഫറി) നിഷേധിച്ചതിന് പിന്നാലെയാണ് ഡാലിക്കിന്റെ രൂക്ഷവിമര്‍ശനം.

മത്സരത്തിന്റെ 13-ാം മിനിറ്റ് ഇഞ്ചുറി ടൈമില്‍ ജോസ്‌കോ ഗ്വാര്‍ഡിയോള്‍ വല ചലിപ്പിച്ചപ്പോള്‍ ക്രൊയേഷ്യ സമനില പിടിച്ചെന്ന് ആരാധകര്‍ കരുതിയിരുന്നു. എന്നാല്‍ പന്തില്‍ ഘടിപ്പിച്ചിരുന്ന ചിപ്പ് ഉപയോഗിച്ച് നടത്തിയ പരിശോധനയില്‍, ഗോളിലേക്കുള്ള നീക്കത്തിനിടെ പന്ത് ക്രൊയേഷ്യന്‍ താരം ഇഗോര്‍ മാറ്റാനോവിച്ചില്‍ സ്പര്‍ശിച്ചതായും, ആ സമയം മറ്റൊരു താരം മാരിയോ പസാലിക് ഓഫ്സൈഡ് സ്ഥാനത്താണെന്നും തെളിഞ്ഞു. ഇതോടെ ഗോള്‍ നിഷേധിക്കപ്പെടുകയായിരുന്നു. മത്സരം 2-1-ന് പോര്‍ച്ചുഗല്‍ സ്വന്തമാക്കി.

ആവേശം കൊലചെയ്യുന്നു
'മത്സരത്തിനിടയിലെ വൈകാരികമായ നിമിഷങ്ങളെ VAR എങ്ങനെയാണ് ഇല്ലാതാക്കുന്നതെന്ന് നിങ്ങള്‍ക്ക് കാണാന്‍ സാധിക്കും. ഇത്തരം തീരുമാനങ്ങള്‍ ഫുട്‌ബോളിന്റെ ആസ്വാദനത്തെ തന്നെ ബാധിക്കുന്നു. VAR ചിലപ്പോള്‍ സഹായിച്ചേക്കാം, എന്നാല്‍ ഇത് കളിക്കാരിലെയും ആരാധകരിലെയും ആവേശത്തെ പൂര്‍ണ്ണമായും കൊലപ്പെടുത്തുകയാണ്,' ഡാലിക് പറഞ്ഞു.

അതേസമയം, റെഫറിമാരുടെ തീരുമാനം തികച്ചും ശരിയാണെന്ന നിലപാടാണ് പോര്‍ച്ചുഗല്‍ പരിശീലകന്‍ റോബര്‍ട്ടോ മാര്‍ട്ടിനെസ് സ്വീകരിച്ചത്. 'ഇവിടെ തര്‍ക്കത്തിന് വകയില്ല. പന്തിലെ ചിപ്പ് ഉപയോഗിച്ചുള്ള പരിശോധനയില്‍ മാറ്റാനോവിച്ചിന്റെ സ്പര്‍ശനം വ്യക്തമാണ്. അതുകൊണ്ടാണ് പസാലിക് ഓഫ്സൈഡായതും ഗോള്‍ നിഷേധിക്കപ്പെട്ടതും. ഇവിടെ ഭാഗ്യനിര്‍ഭാഗ്യങ്ങളില്ല, സാങ്കേതികവിദ്യ കൃത്യമായ തീരുമാനമാണ് നല്‍കിയത്,' മാര്‍ട്ടിനെസ് കൂട്ടിച്ചേര്‍ത്തു.

നേരത്തെ സ്വീഡന്‍-ടുണീഷ്യ മത്സരത്തിലും സമാനമായ സാങ്കേതികവിദ്യ ഉപയോഗിച്ച് ഗോള്‍ നിഷേധിക്കുകയും പിന്നീട് അത് തിരുത്തുകയും ചെയ്തിരുന്നു.