തായിഫ്: സ്പോണ്സറുമായി ബന്ധപ്പെട്ട ചില സാങ്കേതിക പ്രയാസങ്ങളെ തുടര്ന്ന് കഴിഞ്ഞ രണ്ട് വര്ഷമായി നാട്ടില് പോകാന് കഴിയാതിരുന്ന മാസിന് കൊളോണം ഒടുവില് പ്രവാസഭൂമിയോട് വിടപറഞ്ഞ് ജന്മനാട്ടിലേക്ക് തിരിച്ചു.
തായിഫിലെ പച്ചക്കറിക്കടയില് ജോലിക്കെത്തിയ മാസിന് രണ്ട് വര്ഷമായി താമസരേഖയായ ഇഖാമയോ ഹെല്ത്ത് കാര്ഡോ ഉള്പ്പെടെയുള്ള ഔദ്യോഗിക രേഖകള് ലഭ്യമായിരുന്നില്ല. ഇതേത്തുടര്ന്ന് പ്രതിസന്ധിയിലായ മാസിന്റെ വിഷയം തായിഫ് ഐസിഎഫ് പ്രവര്ത്തകരുടെ ശ്രദ്ധയില്പ്പെടുകയായിരുന്നു. തുടര്ന്ന് റിയാദിലെ ലേബര് ഓഫീസുമായും ഇന്ത്യന് എംബസിയുമായും ബന്ധപ്പെട്ട് നടത്തിയ നിരന്തരമായ ശ്രമങ്ങള്ക്കൊടുവിലാണ് മാസിന് നാട്ടിലേക്ക് മടങ്ങാനുള്ള വഴിയൊരുങ്ങിയത്.
ഐസിഎഫ് ഭാരവാഹികളായ അബ്ദുല് കബീര് മുസ്ലിയാര്, ആര്.എം. ത്വല്ഹത്ത്, ഫിറോസ് കുറാര എന്നിവര് ഇതിനായുള്ള സഹായങ്ങള് ഏകോപിപ്പിച്ചു. റിയാദ് എംബസി തലത്തിലുള്ള ഔദ്യോഗിക കാര്യങ്ങള്ക്ക് ഇബ്രാഹിം കരീം, റസാക്ക് വയല്ക്കര എന്നിവര് നേതൃത്വം നല്കി. മാസിന് നാട്ടിലേക്കുള്ള വിമാന ടിക്കറ്റ് ഷാര 25 യൂണിറ്റ് പ്രസിഡന്റ് ഹാരിസ് പടിയൂരും സെക്രട്ടറി ബഷീര് കൊളോണവും ചേര്ന്ന് കൈമാറി.
നാട്ടിലേക്ക് മടങ്ങുന്ന മാസിന് ഐസിഎഫ് ഒരുക്കിയ യാത്രയയപ്പ് യോഗത്തില് നൗഷാദ് ഓച്ചിറ അധ്യക്ഷത വഹിച്ചു. അനസ് പടയങ്കോട് സ്വാഗതവും ഹംസ മംഗലാപുരം നന്ദിയും പറഞ്ഞു. വര്ഷങ്ങളായുള്ള കാത്തിരിപ്പിന് വിരാമമിട്ട് പ്രിയപ്പെട്ടവരിലേക്ക് മടങ്ങാന് കഴിഞ്ഞതിന്റെ സന്തോഷത്തിലാണ് മാസിന്.
Related News
