മനാമ- രാജ്യത്തെ സിവിലിയന്മാരെ ലക്ഷ്യമിട്ട് ഇറാന്‍ നിരന്തരമായി മിസൈലുകളും ഡ്രോണുകളും ഉപയോഗിച്ച് ശത്രുതാപരമായ ആക്രമണങ്ങള്‍ നടത്തുകയാണെന്ന് ബഹ്റൈന്‍ ഡിഫന്‍സ് ഫോഴ്‌സ് ജനറല്‍ കമാന്‍ഡ് അറിയിച്ചു. ജനവാസ മേഖലകള്‍ക്ക് നേരെയുള്ള ഇത്തരം ആക്രമണങ്ങള്‍ വഴി ഇറാന്‍ തങ്ങളുടെ ആവര്‍ത്തിച്ചുള്ള ശത്രുതാ മനോഭാവമാണ് വ്യക്തമാക്കുന്നതെന്നും ഔദ്യോഗിക പ്രസ്താവനയില്‍ പറയുന്നു.

ഇന്ന് രാവിലെ രാജ്യത്തിനു നേരെ ഉണ്ടായ നിരവധി ഇറാനിയന്‍ വ്യോമാക്രമണങ്ങളെ ബഹ്റൈന്‍ ഡിഫന്‍സ് ഫോഴ്‌സിന്റെ വ്യോമ പ്രതിരോധ സംവിധാനങ്ങള്‍ വിജയകരമായി പ്രതിരോധിക്കുകയും തകര്‍ക്കുകയും ചെയ്തതായി സൈനിക കമാന്‍ഡ് വ്യക്തമാക്കി. ഉന്നത പോരാട്ട വീര്യത്തോടെയും ആത്മവിശ്വാസത്തോടെയുമാണ് സൈന്യം ഇതിനെ നേരിട്ടത്. രാജ്യത്തെ സംരക്ഷിക്കാന്‍ എല്ലാ സൈനിക വിഭാഗങ്ങളും ആയുധങ്ങളും സദാ സജ്ജമാണെന്നും ബഹ്റൈന്‍ അറിയിച്ചു.

ആക്രമണത്തെ തുടര്‍ന്ന് വീണുകിടക്കുന്ന അപരിചിതമോ സംശയാസ്പദമോ ആയ വസ്തുക്കളോട് പൊതുജനങ്ങള്‍ ജാഗ്രത പാലിക്കണമെന്നും അവയില്‍ തൊടുകയോ അടുത്തുപോകുകയോ ചെയ്യരുതെന്നും ജനറല്‍ കമാന്‍ഡ് ആവശ്യപ്പെട്ടു. ഇത്തരം വസ്തുക്കള്‍ ശ്രദ്ധയില്‍പെട്ടാല്‍ ഉടന്‍ തന്നെ അധികൃതരെ അറിയിക്കണം. ഇവ സുരക്ഷിതമായി നീക്കം ചെയ്യാന്‍ റോയല്‍ ഫീല്‍ഡ് എഞ്ചിനീയറിംഗ് യൂണിറ്റ് പൂര്‍ണ്ണ സജ്ജമാണെന്നും ജനങ്ങളുടെ സുരക്ഷ ഉറപ്പാക്കുമെന്നും അധികൃതര്‍ വ്യക്തമാക്കി.

ജനങ്ങളെയും സ്വകാര്യ സ്വത്തുക്കളെയും ലക്ഷ്യമിട്ട് മിസൈലുകളും ഡ്രോണുകളും ഉപയോഗിക്കുന്നത് അന്താരാഷ്ട്ര മാനുഷിക നിയമങ്ങളുടെ കടുത്ത ലംഘനമാണെന്ന് ജനറല്‍ കമാന്‍ഡ് ചൂണ്ടിക്കാട്ടി. രാജ്യത്തോടുള്ള തങ്ങളുടെ കടമ നിര്‍വഹിക്കുന്നതില്‍ ബഹ്റൈന്‍ സൈനികര്‍ പ്രകടിപ്പിച്ച ഉയര്‍ന്ന ജാഗ്രതയിലും പോരാട്ട വീര്യത്തിലും അഭിമാനിക്കുന്നതായും കമാന്‍ഡ് കൂട്ടിച്ചേര്‍ത്തു.

രാജ്യത്ത് അടിയന്തര മുന്നറിയിപ്പ് സൈറണുകള്‍ മുഴക്കിയതായി ബഹ്റൈന്‍ ആഭ്യന്തര മന്ത്രാലയം സ്ഥിരീകരിച്ചു. ജനങ്ങള്‍ പരിഭ്രാന്തരാകാതെ ശാന്തത പാലിക്കണമെന്നും, എത്രയും പെട്ടെന്ന് സുരക്ഷിതമായ സ്ഥാനങ്ങളിലേക്ക് മാറണമെന്നും മന്ത്രാലയം ആവശ്യപ്പെട്ടു. ഔദ്യോഗിക ചാനലുകള്‍ വഴി പുറത്തുവരുന്ന വാര്‍ത്തകള്‍ മാത്രം ആശ്രയിക്കണമെന്നും മന്ത്രാലയം ജനങ്ങളോട് നിര്‍ദ്ദേശിച്ചിട്ടുണ്ട്.