ന്യൂയോര്‍ക്ക്- 2026 ലോകകപ്പിന്റെ ആവേശകരമായ സെമിഫൈനല്‍ ലൈനപ്പ് പൂര്‍ത്തിയായിക്കഴിഞ്ഞു. ഫ്രാന്‍സ്, സ്‌പെയിന്‍, ഇംഗ്ലണ്ട്, അര്‍ജന്റീന എന്നീ വമ്പന്മാരാണ് ഇത്തവണ സെമിഫൈനലില്‍ അണിനിരക്കുന്നത്. ജൂലൈ 19-ന് ന്യൂയോര്‍ക്ക് ന്യൂജേഴ്സി സ്റ്റേഡിയത്തില്‍ നടക്കുന്ന മഹാപോരാട്ടത്തിനായി ഇനി സാധ്യമായത് നാല് ഫൈനല്‍ ചിത്രങ്ങള്‍ മാത്രമാണ്. സ്‌പെയിനും ഇംഗ്ലണ്ടും തങ്ങളുടെ രണ്ടാമത്തെ ലോകകിരീടം ലക്ഷ്യമിടുമ്പോള്‍, ഫ്രാന്‍സ് മൂന്നാം കിരീടവും, നിലവിലെ ചാമ്പ്യന്മാരായ അര്‍ജന്റീന കിരീടം നിലനിര്‍ത്തി നാലാം നക്ഷത്രം ജേഴ്‌സിയില്‍ തുന്നാനുമാണ് പൊരുതുന്നത്. 1958-ലും 1962-ലും ബ്രസീല്‍ തുടര്‍ച്ചയായി കിരീടം നേടിയതിന് ശേഷം ആ നേട്ടം ആവര്‍ത്തിക്കുന്ന ആദ്യ ടീമാകാനാണ് അര്‍ജന്റീന ഇറങ്ങുന്നത്.

1. ഫ്രാന്‍സ് - ഇംഗ്ലണ്ട് സ്വപ്ന പോരാട്ടം

ഫ്രാന്‍സ് സ്‌പെയിനെയും, ഇംഗ്ലണ്ട് അര്‍ജന്റീനയെയും പരാജയപ്പെടുത്തിയാല്‍ ന്യൂയോര്‍ക്കില്‍ ലോകകപ്പ് ചരിത്രത്തിലെ ആദ്യ ഫ്രാന്‍സ്-ഇംഗ്ലണ്ട് ഫൈനലിന് കളമൊരുങ്ങും. 1966-ല്‍ സ്വന്തം മണ്ണില്‍ ജര്‍മ്മനിയെ തോല്‍പ്പിച്ച് കിരീടം നേടിയതിന് ശേഷം ഇംഗ്ലണ്ട് ഫൈനലില്‍ എത്തിയിട്ടില്ല. മറുഭാഗത്ത് 2018, 2022 വര്‍ഷങ്ങള്‍ക്ക് ശേഷം ഫ്രാന്‍സിന്റെ തുടര്‍ച്ചയായ മൂന്നാം ഫൈനല്‍ പ്രവേശനമായിരിക്കുമിത്. റയല്‍ മഡ്രീഡ് സഹതാരങ്ങളായ കിലിയന്‍ എംബാപ്പെയും ജൂഡ് ബെല്ലിംഗ്ഹാമും നേര്‍ക്കുനേര്‍ വരുന്ന ഈ പോരാട്ടത്തില്‍ ബയേണ്‍ മ്യൂണിക്കിന്റെ ഹാരി കെയിനും മൈക്കല്‍ ഒലിസെയും പരസ്പരം പൊരുതും. 2022 ഖത്തര്‍ ലോകകപ്പ് ക്വാര്‍ട്ടറില്‍ തങ്ങളെ പുറത്താക്കിയ ഫ്രാന്‍സിനോട് പകരം ചോദിക്കാനുള്ള ഇംഗ്ലണ്ടിന്റെ സുവര്‍ണ്ണാവസരം കൂടിയാണിത്.

2. ഫ്രാന്‍സ് - അര്‍ജന്റീന: ഖത്തറിന്റെ തനിയാവര്‍ത്തനം

ലോക ഫുട്‌ബോള്‍ പ്രേമികള്‍ ഏറ്റവും കൂടുതല്‍ കൊതിക്കുന്ന സ്വപ്ന ഫൈനലുകളില്‍ ഒന്നാണിത്. ഖത്തറിലെ ഇതിഹാസ തുല്യമായ 2022 ലോകകപ്പ് ഫൈനലിന്റെ (3-3 സമനിലയ്ക്ക് ശേഷം പെനാല്‍റ്റിയില്‍ അര്‍ജന്റീന ജയിച്ചു) പുനരാവിഷ്‌കാരമാകും മൂന്നര വര്‍ഷങ്ങള്‍ക്ക് ശേഷം ന്യൂയോര്‍ക്കില്‍ നടക്കുക. 2018-ല്‍ റഷ്യയില്‍ ഫ്രാന്‍സ് അര്‍ജന്റീനയെ 4-3 ന് തോല്‍പ്പിച്ചപ്പോള്‍, 2022-ല്‍ മെസ്സിയും കൂട്ടരും അതിന് മറുപടി നല്‍കി. വീണ്ടും ലോകവേദിയില്‍ എംബാപ്പെയും ലയണല്‍ മെസ്സിയും തമ്മിലുള്ള പോരാട്ടം ഫുട്‌ബോള്‍ ചരിത്രത്തിലെ ഏറ്റവും ആവേശകരമായ മത്സരങ്ങളിലൊന്നാക്കി ഇതിനെ മാറ്റും.

3. സ്‌പെയിന്‍ - ഇംഗ്ലണ്ട്: യൂറോ കപ്പ് ഫൈനലിന്റെ പകരം വീട്ടല്‍

ഫ്രാന്‍സിനെ സ്‌പെയിനും അര്‍ജന്റീനയെ ഇംഗ്ലണ്ടും മറികടന്നാല്‍, അത് യൂറോ 2024 ഫൈനലിന്റെ ആവര്‍ത്തനമായി മാറും. അന്ന് ഇംഗ്ലണ്ടിനെ 2-1 ന് തോല്‍പ്പിച്ചാണ് സ്‌പെയിന്‍ കിരീടമുയര്‍ത്തിയത്. ആ തോല്‍വിക്ക് ലോകത്തിന്റെ ഏറ്റവും വലിയ വേദിയില്‍ ഹാരി കെയിനും സംഘത്തിനും പ്രതികാരം ചെയ്യാനുള്ള അവസരമാണ് ഇതിലൂടെ ലഭിക്കുന്നത്. ലോകകപ്പ് ചരിത്രത്തില്‍ 1950 ലും 1982 ലും മാത്രമാണ് ഇരുടീമുകളും ഇതിനുമുന്‍പ് ഏറ്റുമുട്ടിയിട്ടുള്ളത്. നീണ്ട 44 വര്‍ഷങ്ങള്‍ക്ക് ശേഷമുള്ള ഇവരുടെ ലോകകപ്പ് പോരാട്ടം ഫൈനലിലാകുന്നത് ചരിത്രമാകും.

4. സ്‌പെയിന്‍ - അര്‍ജന്റീന: മെസ്സി - യമാല്‍ നേര്‍ക്കുനേര്‍

സ്‌പെയിനും അര്‍ജന്റീനയും ഫൈനലില്‍ പ്രവേശിച്ചാല്‍ ലോകകപ്പ് ചരിത്രത്തില്‍ അപൂര്‍വ്വമായി മാത്രം സംഭവിക്കുന്ന ലാറ്റിന്‍-യൂറോപ്യന്‍ ക്ലാസിക് ഫൈനലായി അത് മാറും. യൂറോപ്യന്‍ ചാമ്പ്യന്മാരും ലോക ചാമ്പ്യന്മാരും തമ്മില്‍ ഒരു ലോകകപ്പ് ഫൈനലില്‍ ഏറ്റുമുട്ടുന്നത് ഇതാദ്യമായിരിക്കും. 1966 ലോകകപ്പിന് ശേഷം ഇരു ടീമുകളും ലോകവേദിയില്‍ ഏറ്റുമുട്ടിയിട്ടില്ല. സ്‌പെയിന്‍ ജയിച്ചാല്‍ അവര്‍ കിരീടനേട്ടത്തില്‍ ഫ്രാന്‍സിനൊപ്പമെത്തും. എന്നാല്‍ അര്‍ജന്റീനയ്ക്കാണ് വിജയമെങ്കില്‍ ജര്‍മ്മനിക്കും ഇറ്റലിക്കുമൊപ്പം നാല് കിരീടങ്ങളെന്ന നേട്ടത്തിലേക്ക് അവരെത്തിക്കും. ഇതിഹാസ താരം ലയണല്‍ മെസ്സിയും യുവ വിസ്മയം ലാമിന്‍ യമാലും തമ്മിലുള്ള തലമുറകളുടെ പോരാട്ടമാകും ഈ ഫൈനലിന്റെ പ്രധാന ആകര്‍ഷണം.