റിയാദ്: റിയാദിലെ അതിഖ ഈത്തപ്പഴ മാര്‍ക്കറ്റില്‍ എത്തുന്നവര്‍ക്ക് പരിചിതമായ ഒരു മുഖമുണ്ട് - മുഹമ്മദ് മബ്രൂക്ക്. പ്രായം ചെറിയതാണെങ്കിലും അഞ്ചു വര്‍ഷമായി കച്ചവട രംഗത്ത് സജീവമായ മുഹമ്മദ്, ഈ മേഖലയിലെ ഏറ്റവും പ്രായം കുറഞ്ഞ വ്യാപാരികളില്‍ ഒരാളാണ്.

ഏഴ് വയസ്സുള്ളപ്പോള്‍ തുടങ്ങിയതാണ് മുഹമ്മദിന്റെ കച്ചവട ജീവിതം. അഞ്ചു വര്‍ഷത്തെ പരിചയം കൊണ്ട് ഈത്തപ്പഴ വിപണിയുടെ ബാലപാഠങ്ങള്‍ ഇതിനകം പഠിച്ചുകഴിഞ്ഞു. ലേലത്തില്‍ പങ്കെടുത്താണ് മുഹമ്മദ് സാധനങ്ങള്‍ വാങ്ങുന്നത്. ഏകദേശം അഞ്ച് റിയാലിന് വാങ്ങുന്ന ഒരു പെട്ടി ഈത്തപ്പഴം പത്ത് റിയാല്‍ എന്ന നിരക്കില്‍ ഉപഭോക്താക്കള്‍ക്ക് വിറ്റഴിക്കുകയാണ് ഇദ്ദേഹത്തിന്റെ രീതി. ലാഭത്തിനൊപ്പം തന്നെ നഷ്ടങ്ങളും കച്ചവടത്തിന്റെ ഭാഗമാണെന്ന് ഈ ബാലന്‍ വ്യക്തമാക്കുന്നു.

മാര്‍ക്കറ്റില്‍ ചിലവഴിച്ച വര്‍ഷങ്ങള്‍ മുഹമ്മദിന് ഈത്തപ്പഴത്തിന്റെ വിവിധ ഇനങ്ങളെക്കുറിച്ചും അവയുടെ ഗുണനിലവാരത്തെയും വിലയെയും കുറിച്ച് നല്ല അറിവ് നല്‍കിയിട്ടുണ്ട്. ഈ അറിവ് ഉപയോഗപ്പെടുത്തി, സാധനങ്ങള്‍ വാങ്ങാന്‍ എത്തുന്ന ഉപഭോക്താക്കള്‍ക്ക് ഏറ്റവും അനുയോജ്യമായ ഈത്തപ്പഴങ്ങള്‍ തിരഞ്ഞെടുക്കാന്‍ മുഹമ്മദ് സഹായം നല്‍കാറുണ്ട്.

ഈ ജോലിയില്‍ തനിക്ക് വലിയ സന്തോഷമാണുള്ളതെന്ന് മുഹമ്മദ് പറയുന്നു. പ്രായം തടസ്സമല്ലെന്നും കഠിനാധ്വാനത്തിലൂടെ ഏത് കാര്യവും പഠിച്ചെടുക്കാമെന്നും തെളിയിക്കുകയാണ് ഈ കൊച്ചു വ്യാപാരി. അറിവും ആത്മവിശ്വാസവും കൈമുതലാക്കി മുന്നേറുന്ന മുഹമ്മദ് മബ്രൂക്ക് ഇതിനകം തന്നെ മാര്‍ക്കറ്റിലെ വ്യാപാരികള്‍ക്കിടയില്‍ വലിയ ശ്രദ്ധ പിടിച്ചുപറ്റിയിട്ടുണ്ട്.