റിയാദ്: സ്വകാര്യ എഐ നിക്ഷേപത്തിന്റെ കാര്യത്തില്‍ ലോകത്തിലെ മുന്‍നിര 10 രാജ്യങ്ങളില്‍ ഒന്നായി സൗദി അറേബ്യ മാറിയതായി ലോക ബാങ്കിന്റെ പുതിയ റിപ്പോര്‍ട്ട്. 'ദി പ്രോമിസ് ഓഫ് ആര്‍ട്ടിഫിഷ്യല്‍ ഇന്റലിജന്‍സ്' എന്ന തലക്കെട്ടില്‍ പുറത്തിറക്കിയ ലോക ബാങ്ക് ഗ്രൂപ്പിന്റെ 2026 ലെ ലോക വികസന റിപ്പോര്‍ട്ടിലാണ് സൗദിയുടെ ഈ സുപ്രധാന നേട്ടം എടുത്തുപറഞ്ഞിരിക്കുന്നത്.

ആഗോള എഐ രംഗത്ത് രാജ്യം കൈവരിക്കുന്ന വളര്‍ച്ചയെയും നേതൃത്വത്തെയും റിപ്പോര്‍ട്ട് പ്രശംസിച്ചു. എഐ പ്രതിഭകളെ ആകര്‍ഷിക്കുന്നതിനുള്ള ആകര്‍ഷകമായ കേന്ദ്രമായും സര്‍ക്കാര്‍ ഡാറ്റ സംയോജന മാതൃകയായും സൗദി അറേബ്യ മാറിയതായി റിപ്പോര്‍ട്ടില്‍ വ്യക്തമാക്കുന്നു. വിഷന്‍ 2030-ന്റെ കീഴിലുള്ള സമഗ്രമായ ദേശീയ പദ്ധതികളാണ് ഈ നേട്ടങ്ങള്‍ക്ക് പിന്നില്‍.

നികുതി ഇളവുകളും പ്രത്യേക സാമ്പത്തിക മേഖലകളും വഴി ഡാറ്റാ സെന്ററുകളില്‍ വന്‍തോതില്‍ നിക്ഷേപം ആകര്‍ഷിക്കാന്‍ സൗദിക്കായി. രാജ്യത്തെ ഡാറ്റാ സെന്റര്‍ ശേഷി 2021-ല്‍ 68 മെഗാവാട്ട് ആയിരുന്നത് 2026-ന്റെ ആദ്യ പാദമായപ്പോഴേക്കും 467 മെഗാവാട്ടായി ഉയര്‍ന്നു. 4G, 5G നെറ്റ്വര്‍ക്ക് കവറേജ് 99 ശതമാനത്തിലെത്തി. സ്വിറ്റ്‌സര്‍ലന്‍ഡ്, ഓസ്‌ട്രേലിയ തുടങ്ങിയ രാജ്യങ്ങള്‍ക്കൊപ്പം എഐ പ്രൊഫഷണലുകളുടെ വരവില്‍ മുന്‍നിരയിലുള്ള സമ്പദ്വ്യവസ്ഥകളില്‍ ഒന്നായി 2025-ല്‍ സൗദി മാറി. രാജ്യത്തെ സാങ്കേതിക തൊഴില്‍ സേന 4.26 ലക്ഷമായി ഉയര്‍ന്നു. ഇതില്‍ ഐ.ടി രംഗത്തെ സ്ത്രീകളുടെ പങ്കാളിത്തം 35 ശതമാനമാണ്.

60-ലധികം സര്‍ക്കാര്‍ സ്ഥാപനങ്ങളുടെ ഡാറ്റാ സംയോജനം സാധ്യമാക്കുന്ന എസ്.ഡി.ഐ.എ.യുടെ പ്ലാറ്റ്ഫോം ലോക ബാങ്കിന്റെ പ്രശംസ നേടി. സര്‍ക്കാരിന്റെ ഡിജിറ്റല്‍ ഇക്കോണമി സംഭാവന ജി.ഡി.പിയുടെ 16 ശതമാനമായി ഉയര്‍ന്നിട്ടുണ്ട്. ലോക ബാങ്കിന്റെ 2025 ലെ ഗോവ്ടെക് മെച്ചൂരിറ്റി ഇന്‍ഡക്‌സില്‍ സൗദി ലോകത്ത് രണ്ടാമതെത്തി.

രാജ്യത്ത് ഭാവി സാങ്കേതികവിദ്യകള്‍ക്കും നവീകരണത്തിനും നല്‍കുന്ന പ്രാധാന്യത്തിന്റെ ഭാഗമായി 2026-നെ സൗദി അറേബ്യ 'എഐ വര്‍ഷമായി' പ്രഖ്യാപിച്ചിരുന്നു. ഈ അംഗീകാരം സൗദി വിഷന്‍ 2030-ന്റെ ലക്ഷ്യങ്ങള്‍ക്ക് കരുത്ത് പകരുന്നതാണെന്ന് റിപ്പോര്‍ട്ട് വ്യക്തമാക്കുന്നു.