കൊച്ചി: വടക്കന് പറവൂരില് യുവതിയെ ആണ്സുഹൃത്ത് കുത്തിക്കൊലപ്പെടുത്തി. ചൂണ്ടി സ്വദേശിനിയായ സുരമ്യ (26) ആണ് ക്രൂരകൃത്യത്തിന് ഇരയായത്. സംഭവവുമായി ബന്ധപ്പെട്ട് സുരമ്യയുടെ ആണ്സുഹൃത്തും തുരുത്തിപ്പുറം സ്വദേശിയുമായ ഷിബിനെ (34) വടക്കേക്കര പൊലീസ് കസ്റ്റഡിയിലെടുത്തു. പ്രണയബന്ധത്തില് നിന്ന് പിന്മാറാന് തീരുമാനിച്ചതാണ് കൊലപാതകത്തില് കലാശിച്ചതെന്നാണ് പ്രാഥമിക വിവരം.
ആറു വര്ഷമായി പ്രണയത്തിലായിരുന്ന ഇരുവരും തമ്മില് കുറച്ചുകാലമായി വഴക്കുകളും തര്ക്കങ്ങളും നിലനിന്നിരുന്നു. കൊടുങ്ങല്ലൂരിലേക്കു പോകാനെന്നു പറഞ്ഞ് ആലുവയിലെ വീട്ടില് നിന്നിറങ്ങിയ സുരമ്യ, ഷിബിന്റെ ആവശ്യപ്രകാരം പറവൂരില് ബസ് ഇറങ്ങുകയായിരുന്നു. തുടര്ന്ന് ഷിബിന് യുവതിയെ ബൈക്കില് വടക്കേക്കര മുറവന്തുരുത്തിലുള്ള തന്റെ വീട്ടിലെത്തിച്ചു.
രാവിലെ പത്തു മണിയോടെ ഷിബിന്റെ വീടിനുള്ളിലെ മുറിയിലിരുന്ന് ബന്ധം പിരിയുന്നതിനെക്കുറിച്ച് സംസാരിക്കുന്നതിനിടെ ഇരുവരും തമ്മില് വീണ്ടും വാക്കുതര്ക്കമുണ്ടായി. ഇതില് പെട്ടെന്ന് പ്രകോപിതനായ ഷിബിന്, വീട്ടിലുണ്ടായിരുന്ന കറിക്കത്തി ഉപയോഗിച്ച് സുരമ്യയെ ക്രൂരമായി ആക്രമിക്കുകയായിരുന്നു. ആക്രമണത്തില് ഷിബിന്റെ കൈയ്ക്കും പരിക്കേറ്റിട്ടുണ്ട്.
ഈ സമയം ഷിബിന്റെ മാതാപിതാക്കളും വീട്ടിലുണ്ടായിരുന്നുവെങ്കിലും പെട്ടെന്നുണ്ടായ സംഭവമായതിനാല് എന്താണ് സംഭവിച്ചതെന്ന് ഇവര്ക്ക് ആദ്യം മനസ്സിലായിരുന്നില്ല. ഗുരുതരമായി പരിക്കേറ്റ സുരമ്യയെ ഉടന് പറവൂര് താലൂക്ക് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. വിവരമറിഞ്ഞെത്തിയ വടക്കേക്കര പൊലീസ് സ്ഥലത്തെത്തി ഷിബിനെ കസ്റ്റഡിയിലെടുത്ത് ആശുപത്രിയില് പ്രവേശിപ്പിച്ചു.
Related News
