റിയാദ്: രാജ്യത്തിനകത്തും പുറത്തുമുള്ള സംഘടിത സാഹസിക യാത്രകള്‍ (Adventure Travel) ക്രമീകരിക്കുന്നതിനായി സൗദി കായിക മന്ത്രാലയം 'അല്‍ റഹ്ഹാല' എന്ന പേരില്‍ പുതിയ ലൈസന്‍സിങ് സേവനം ആരംഭിച്ചു. 'റിയാദി' (Riyadi) ഡിജിറ്റല്‍ പ്ലാറ്റ്ഫോം വഴിയാണ് ഈ പുതിയ സേവനം ലഭ്യമാക്കിയിരിക്കുന്നത്. സാഹസിക യാത്രകളും പരിസ്ഥിതി പര്യവേക്ഷണവും സമന്വയിപ്പിക്കുന്ന ഇത്തരം യാത്രകള്‍ സുരക്ഷിതവും ഉത്തരവാദിത്തമുള്ളതുമായ രീതിയില്‍ നടപ്പിലാക്കാന്‍ ലക്ഷ്യമിട്ടാണ് നടപടി.

പുതിയ സംവിധാനം നിലവില്‍ വന്നതോടെ സാഹസിക യാത്രകള്‍ സംഘടിപ്പിക്കുന്നവര്‍ക്ക് റിയാദി പ്ലാറ്റ്ഫോം വഴി പെര്‍മിറ്റുകള്‍ക്കായി അപേക്ഷിക്കാം. യാത്രകള്‍ നിലവിലുള്ള നിയമങ്ങള്‍ പാലിക്കുന്നുണ്ടെന്ന് ഉറപ്പാക്കാന്‍ വിവിധ സര്‍ക്കാര്‍ ഏജന്‍സികളുടെ സഹകരണത്തോടെയാണ് അപേക്ഷകള്‍ പരിശോധിക്കുന്നത്. ലൈസന്‍സ് ലഭിക്കുന്ന സഞ്ചാരികള്‍ക്ക് മറ്റ് ബന്ധപ്പെട്ട സര്‍ക്കാര്‍ സ്ഥാപനങ്ങളുടെ സേവനങ്ങളും പിന്തുണയും ലഭ്യമാകും.

സുരക്ഷിതവും സുസ്ഥിരവുമായ സാഹസിക യാത്രകളുടെ ആഗോള കേന്ദ്രമായി സൗദിയെ മാറ്റാനും, ലൈസന്‍സുള്ള യാത്രക്കാര്‍ നടത്തുന്ന കായിക-സാംസ്‌കാരിക പര്യവേക്ഷണങ്ങള്‍ പ്രൊഫഷണല്‍ രീതിയില്‍ രേഖപ്പെടുത്തുന്നത് പ്രോത്സാഹിപ്പിക്കാനും ഈ പദ്ധതി വഴി മന്ത്രാലയം ഉദ്ദേശിക്കുന്നു.