റിയാദ്: തലസ്ഥാന നഗരിയിലെ ഹരിതാഭ വര്‍ദ്ധിപ്പിക്കുന്നതിന്റെ ഭാഗമായി റിയാദിലെ അല്‍-ഖാദിസിയ, അല്‍-രിമാല്‍, അല്‍-മുന്‍സിയ എന്നിവിടങ്ങളില്‍ നിര്‍മ്മിക്കുന്ന മൂന്ന് പ്രധാന പാര്‍ക്കുകളുടെ പണി 85 ശതമാനത്തിലധികം പൂര്‍ത്തിയായതായി സൗദി പ്രസ് ഏജന്‍സി റിപ്പോര്‍ട്ട് ചെയ്തു. റോയല്‍ കമ്മീഷന്‍ ഫോര്‍ റിയാദ് സിറ്റിയുടെ മേല്‍നോട്ടത്തിലാണ് ഈ പാര്‍ക്കുകള്‍ വികസിപ്പിച്ചു വരുന്നത്.

കായിക പ്രേമികള്‍ക്കായി സ്‌പോര്‍ട്‌സ് കോര്‍ട്ടുകള്‍, ഫിറ്റ്‌നസ് ഏരിയകള്‍, വാട്ടര്‍-പ്ലേ ഫെസിലിറ്റികള്‍, സൈക്ലിംഗ് ട്രാക്കുകള്‍, സ്‌കേറ്റിംഗ് ട്രാക്കുകള്‍ എന്നിവ ഈ പാര്‍ക്കുകളുടെ പ്രധാന ആകര്‍ഷണമായിരിക്കും. പ്രദേശവാസികള്‍ക്ക് വിപുലമായ വിനോദപാഠങ്ങള്‍ നല്‍കാനാണ് ഇത് ലക്ഷ്യമിടുന്നത്.

550,000 ചതുരശ്ര മീറ്ററിലധികം വിസ്തൃതിയില്‍ പരന്നുകിടക്കുന്ന ഈ പാര്‍ക്കുകളില്‍ 65 ശതമാനവും ഹരിത ഇടങ്ങളാണ്. 585,000-ത്തിലധികം മരങ്ങളും ചെടികളും ഇവിടെ വെച്ചുപിടിപ്പിക്കും. നഗരത്തിലെ വായുവിന്റെ ഗുണനിലവാരം ഉയര്‍ത്താനും ചൂടിന്റെ ആഘാതം കുറയ്ക്കാനും താമസക്കാരുടെ ജീവിതനിലവാരം മെച്ചപ്പെടുത്താനും പദ്ധതി സഹായിക്കും.

2019-ല്‍ ആരംഭിച്ച ഗ്രീന്‍ റിയാദ് പദ്ധതിയിലൂടെ 2030-ഓടെ 7.5 ദശലക്ഷത്തിലധികം മരങ്ങള്‍ വെച്ചുപിടിപ്പിക്കാനാണ് ലക്ഷ്യമിടുന്നത്. നിലവില്‍ 4.5 ദശലക്ഷത്തിലധികം മരങ്ങള്‍ ഇതിനോടകം നട്ടുപിടിപ്പിച്ചിട്ടുണ്ടെന്ന് റോയല്‍ കമ്മീഷന്‍ അറിയിച്ചു.