ആലപ്പുഴ: മോഷ്ടിച്ച ബൈക്ക് കടത്തുന്നതിനിടെ അപകടത്തില്‍പ്പെട്ട് രണ്ട് യുവാക്കള്‍ മരിച്ചു. ഒരാള്‍ക്ക് ഗുരുതരമായി പരിക്കേറ്റു. ആലപ്പുഴ കൈചൂണ്ടിമുക്കില്‍ ഇന്ന് പുലര്‍ച്ചെ മൂന്ന് മണിയോടെയായിരുന്നു സംഭവം. മണ്ണഞ്ചേരി അടിവാരം സ്വദേശി മുഹമ്മദ് സബീന്‍ (17), റിന്‍ഷാദ് എന്നിവരാണ് മരിച്ചത്. മണ്ണഞ്ചേരി അമ്പനാകുളങ്ങര സ്വദേശി പ്രമോദിന്റെ ബൈക്കാണ് ഇവര്‍ മോഷ്ടിച്ചത്.

മണ്ണഞ്ചേരിയില്‍ നിന്ന് ആലപ്പുഴയിലേക്ക് രണ്ട് ബൈക്കുകളിലായി വന്ന മൂന്ന് യുവാക്കളാണ് അപകടത്തില്‍പ്പെട്ടത്. ഗുരുതരമായി പരിക്കേറ്റ ഒരാളെ ആലപ്പുഴ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. രാത്രി വീടിന് മുന്നില്‍ ലോക്ക് ചെയ്ത് വച്ചിരുന്ന ബൈക്കാണ് പ്രതികള്‍ മോഷ്ടിച്ചത്. ലോക്ക് പൊളിച്ചാണ് കൊണ്ടുപോയത്. പുലര്‍ച്ചെ നാല് മണിയോടെ നോര്‍ത്ത് പൊലീസ് ആര്‍സി ഉടമയെ കണ്ടെത്തി വിളിച്ചപ്പോഴാണ് ബൈക്ക് മോഷണം പോയ വിവരം പ്രമോദ് അറിയുന്നത്.

അമിത വേഗത്തിലെത്തിയ ബൈക്ക് റോഡിലൂടെ തെന്നിമറിഞ്ഞ് തീപ്പൊരി ചിതറിച്ച് ഉരഞ്ഞ് നീങ്ങുന്ന രീതിയിലാണ് സിസിടിവി ദൃശ്യങ്ങളും പുറത്തുവന്നിട്ടുണ്ട്. നായ കുറുകേ ചാടിയതാണോ അപകടകാരണമെന്നും സംശയിക്കുന്നുണ്ട്. രണ്ട് യുവാക്കളും അപകടസ്ഥലത്തുവച്ച് തന്നെ മരിച്ചു.