റിയാദ്: പ്രവാസി കേരളീയര്ക്കായി നോര്ക്ക റൂട്ട്സ് നടപ്പിലാക്കുന്ന ആരോഗ്യ ഇന്ഷുറന്സ്-സംരക്ഷണ പദ്ധതിയായ 'നോര്ക്ക കെയര് പ്ലസില്' അംഗത്വം നേടുന്നതിനുള്ള കാലാവധി ഒരു മാസം കൂടി നീട്ടണമെന്നാവശ്യപ്പെട്ട് ഒ.ഐ.സി.സി റിയാദ് സെന്ട്രല് കമ്മിറ്റി കേരള മുഖ്യമന്ത്രിക്ക് നിവേദനം നല്കി.
നിലവില് 2026 സെപ്റ്റംബര് 18 വരെയാണ് പദ്ധതിയില് എന്റോള് ചെയ്യുന്നതിനുള്ള സമയപരിധി. ഈ കാലാവധി ഒരു മാസം കൂടി നീട്ടണമെന്നാവശ്യപ്പെട്ട് ഒ.ഐ.സി.സി റിയാദ് സെന്ട്രല് കമ്മിറ്റി പ്രസിഡന്റ് സലിം കളക്കര, ജനറല് സെക്രട്ടറി ഷംനാദ് കരുനാഗപ്പള്ളി എന്നിവര് ചേര്ന്ന് മുഖ്യമന്ത്രിയും പ്രവാസി കേരളീയരുടെ കാര്യങ്ങളുടെ ചുമതലയുള്ള മന്ത്രിയുമായ വി.ഡി. സതീശന് ഇ-മെയില് മുഖേനയാണ് നിവേദനം അയച്ചത്.
പദ്ധതിയില് ചേരാന് പ്രവാസികള്ക്കിടയില് വലിയ താല്പര്യമുണ്ടെങ്കിലും, അര്ഹരായ നിരവധി പ്രവാസികള്ക്ക് ഇതുവരെ നോര്ക്ക ഐഡി കാര്ഡ് ലഭിച്ചിട്ടില്ലാത്തത് എന്റോള്മെന്റിന് പ്രധാന തടസ്സമാണെന്ന് നിവേദനത്തില് ചൂണ്ടിക്കാട്ടുന്നു. നോര്ക്ക കെയര് പ്ലസില് രജിസ്റ്റര് ചെയ്യുന്നതിന് ഐഡി കാര്ഡ് നിര്ബന്ധമായതിനാല്, ആദ്യം നോര്ക്ക ഐഡി നേടുകയും തുടര്ന്ന് ഇന്ഷുറന്സ് പദ്ധതിയില് അംഗത്വം നേടുകയും ചെയ്യേണ്ട സാഹചര്യമാണ് പലര്ക്കുമുള്ളത്. ഈ നടപടികള് പൂര്ത്തിയാക്കാന് നിലവിലെ സമയപരിധി അപര്യാപ്തമാണെന്നും കമ്മിറ്റി വ്യക്തമാക്കി.
അടുത്തിടെ ഒ.ഐ.സി.സി റിയാദ് സെന്ട്രല് കമ്മിറ്റിയുടെയും മലപ്പുറം ജില്ലാ കമ്മിറ്റിയുടെയും സംയുക്താഭിമുഖ്യത്തില് റിയാദിലെ ഒ.ഐ.സി.സി ഓഫീസ് 'സബര്മതി'യില് നോര്ക്ക കെയര് പ്ലസ് ഹെല്പ്പ് ഡെസ്ക് സംഘടിപ്പിച്ചിരുന്നു. പദ്ധതിയില് അംഗത്വം നേടാന് ആഗ്രഹിക്കുന്ന പ്രവാസികള്ക്ക് രജിസ്ട്രേഷന് നടപടികള് പൂര്ത്തിയാക്കുന്നതിനും സംശയങ്ങള്ക്ക് മറുപടി നല്കുന്നതിനുമായി പ്രത്യേക കൗണ്ടറുകളോടെയായിരുന്നു ഹെല്പ്പ് ഡെസ്ക് പ്രവര്ത്തിച്ചത്.
ഹെല്പ്പ് ഡെസ്കിന് പ്രവാസി സമൂഹത്തില് നിന്ന് മികച്ച പ്രതികരണമാണ് ലഭിച്ചതെന്ന് ഭാരവാഹികള് അറിയിച്ചു. എന്നാല് നോര്ക്ക ഐഡി കാര്ഡ് ഇല്ലാത്തതിനാല് പദ്ധതിയില് ചേരാന് താല്പര്യമുണ്ടായിരുന്ന നിരവധി പേര്ക്ക് എന്റോള്മെന്റ് പൂര്ത്തിയാക്കാന് കഴിഞ്ഞിരുന്നില്ല. ഇതിന്റെ പശ്ചാത്തലത്തിലാണ് കാലാവധി നീട്ടണമെന്ന ആവശ്യം ശക്തമാക്കിയത്.
വരും ആഴ്ചകളില് റിയാദിന്റെ വിവിധ ഭാഗങ്ങളില് നോര്ക്ക കെയര് പ്ലസ് എന്റോള്മെന്റ്, ബോധവല്ക്കരണ ക്യാമ്പുകള് സംഘടിപ്പിക്കാനും ഒ.ഐ.സി.സി റിയാദ് സെന്ട്രല് കമ്മിറ്റി പദ്ധതിയിടുന്നുണ്ട്. കൂടുതല് പ്രവാസികളിലേക്ക് പദ്ധതിയുടെ വിവരങ്ങള് എത്തിക്കുകയും അര്ഹരായവരെ പദ്ധതിയില് അംഗങ്ങളാക്കുകയുമാണ് ഇതിന്റെ ലക്ഷ്യം. കാലാവധി ഒരു മാസം കൂടി നീട്ടുന്നത് ഈ പ്രവര്ത്തനങ്ങള്ക്ക് ഏറെ സഹായകരമാകുമെന്നും കമ്മിറ്റി വിലയിരുത്തുന്നു.
പ്രവാസി കേരളീയരുടെ ക്ഷേമം മുന്നിര്ത്തി ഇത്തരം പദ്ധതികളുടെ പ്രയോജനം പരമാവധി പ്രവാസികളിലേക്ക് എത്തിക്കേണ്ടതുണ്ടെന്നും, അതിനായി നിലവിലെ എന്റോള്മെന്റ് സമയപരിധി നീട്ടുന്നത് അനുഭാവപൂര്വ്വം പരിഗണിക്കണമെന്നും നിവേദനത്തില് ആവശ്യപ്പെട്ടു. പ്രവാസി സമൂഹത്തിന്റെ വിശാലമായ താല്പര്യം മുന്നിര്ത്തി മുഖ്യമന്ത്രിയുടെ ഭാഗത്തുനിന്ന് അനുകൂലമായ നടപടി ഉണ്ടാകുമെന്നാണ് ഒ.ഐ.സി.സി റിയാദ് സെന്ട്രല് കമ്മിറ്റിയുടെ പ്രതീക്ഷ.
Related News
