റിയാദ്: റിയാദിലെ അടിസ്ഥാന സൗകര്യ വികസന പ്രവര്‍ത്തനങ്ങള്‍ കൃത്യമായി നിയന്ത്രിക്കാനും നിലവാരവും സുരക്ഷയും ഉറപ്പാക്കാനുമായി റിയാദ് ഇന്‍ഫ്രാസ്ട്രക്ചര്‍ പ്രോജക്ട്‌സ് സെന്റര്‍ (RIPC) ഈ വര്‍ഷം ഇതുവരെ 141,000-ത്തിലധികം പെര്‍മിറ്റുകള്‍ അനുവദിച്ചു. അംഗീകൃത മാനദണ്ഡങ്ങള്‍ പാലിച്ചുകൊണ്ട് പദ്ധതികള്‍ വേഗത്തിലാക്കുകയാണ് ഇതിലൂടെ ലക്ഷ്യമിടുന്നത്.

ആഗസ്റ്റ് മാസത്തിലെ പ്രവര്‍ത്തന റിപ്പോര്‍ട്ട് അനുസരിച്ച്, ആഗസ്റ്റില്‍ മാത്രം 19,000-ത്തിലധികം ഇന്‍ഫ്രാസ്ട്രക്ചര്‍ പെര്‍മിറ്റുകളാണ് കേന്ദ്രം നല്‍കിയത്. ഇതില്‍ 10,100 എണ്ണം നിലവില്‍ പുരോഗമിച്ചുകൊണ്ടിരിക്കുന്ന പദ്ധതികള്‍ക്കായുള്ള സജീവ പെര്‍മിറ്റുകളാണ്.

വര്‍ഷത്തിന്റെ തുടക്കം മുതല്‍ ഇതുവരെ 190,000-ത്തിലധികം റിപ്പോര്‍ട്ടുകളും പരാതികളും കേന്ദ്രത്തിന് ലഭിച്ചു. ആഗസ്റ്റില്‍ മാത്രം 8,000-ത്തിലധികം പരാതികള്‍ ലഭിച്ചു. റോഡ് താഴ്ന്നുപോകല്‍ (29%), വെള്ളക്കെട്ട് (26%), മൂടിയില്ലാത്ത മാന്‍ഹോളുകള്‍ (11%) എന്നിവയാണ് പ്രധാനമായും ലഭിച്ച പരാതികള്‍.
മതിയായ മുന്നറിയിപ്പ് ലൈറ്റുകളും താല്‍ക്കാലിക ബാരിയറുകളും ഇല്ലാത്തതും, നിര്‍മ്മാണ സ്ഥലങ്ങളിലെ വൃത്തിഹീനതയും ഫീല്‍ഡ് ടീമുകള്‍ കണ്ടെത്തിയിട്ടുണ്ട്.

പദ്ധതികളുടെ ഗുണനിലവാരം ഉയര്‍ത്താനും പൊതുജനങ്ങളുടെ സുരക്ഷ ഉറപ്പാക്കാനും നിര്‍മ്മാണ കമ്പനികള്‍ കര്‍ശനമായ മാനദണ്ഡങ്ങള്‍ പാലിക്കണമെന്ന് RIPC
ആവശ്യപ്പെട്ടു. ഈ കൃത്യമായ നിരീക്ഷണങ്ങളും റിപ്പോര്‍ട്ടുകളും റിയാദ് നഗരത്തിലെ ജീവിതനിലവാരം ഉയര്‍ത്താനും അടിസ്ഥാന സൗകര്യങ്ങള്‍ കൂടുതല്‍ മെച്ചപ്പെടുത്താനും സഹായിക്കുമെന്നാണ് അധികൃതരുടെ വിലയിരുത്തല്‍.