ന്യൂദല്ഹി: രാജ്യത്തെ ബാങ്ക് ജീവനക്കാരുടെ സംഘടനകള് പ്രഖ്യാപിച്ചിരുന്ന മൂന്ന് ദിവസത്തെ ദേശീയ പണിമുടക്ക് മാറ്റിവെച്ചു. ഇന്ത്യന് ബാങ്ക്സ് അസോസിയേഷനും യുണൈറ്റഡ് ഫോറം ഓഫ് ബാങ്ക് യൂണിയന്സും തമ്മില് വിവിധ വിഷയങ്ങളില് ധാരണയിലെത്തിയതിനെ തുടര്ന്നാണ് സമരം മാറ്റിവെച്ചത്. ബാങ്ക് ജീവനക്കാരുടെ പ്രധാന ആവശ്യങ്ങളില് ഒന്നായ ശേഷിക്കുന്ന ശനിയാഴ്ചകളെ അവധിദിനങ്ങളാക്കുന്നതില് ചര്ച്ചകള്ക്കായി അടിയന്തരമായി ഉന്നതതല സമിതി രൂപീകരിക്കാനും ധാരണയായി.
ബാങ്കുകളുടെ പ്രവര്ത്തനക്രമവുമായി ബന്ധപ്പെട്ട ദീര്ഘകാല ആവശ്യമാണ് എല്ലാ ശനിയാഴ്ചകളും അവധിയാക്കണമെന്നത്. നിലവില് മാസത്തിലെ രണ്ടാമത്തെയും നാലാമത്തെയും ശനിയാഴ്ചകളാണ് ബാങ്കുകള്ക്ക് അവധി. ഒന്നാമത്തെയും മൂന്നാമത്തെയും അഞ്ചാമത്തെയും ശനിയാഴ്ചകളില് സാധാരണ പ്രവര്ത്തനം തുടരുന്നു. ശേഷിക്കുന്ന ശനിയാഴ്ചകളും അവധിയാക്കണമെന്ന ആവശ്യം ജീവനക്കാരുടെ സംഘടനകള് ഏറെക്കാലമായി ഉന്നയിക്കുന്നുണ്ട്.
ഈ വിഷയത്തില് ഉന്നതതല സമിതി ഉടന് രൂപീകരിച്ച് വിശദമായ ചര്ച്ച നടത്തും. ആവശ്യത്തിന്റെ വിവിധ വശങ്ങള് പരിശോധിച്ച് തുടര്നടപടികള് തീരുമാനിക്കാനാണ് ധാരണ. സമരത്തില്നിന്ന് പിന്മാറാനുള്ള പ്രധാന കാരണങ്ങളിലൊന്നും ഈ ധാരണയാണ്.
ശമ്പളം, തൊഴില് സാഹചര്യങ്ങള്, ജീവനക്കാരുടെ ക്ഷേമം, ബാങ്കുകളുടെ പ്രവര്ത്തനസമയം തുടങ്ങിയ വിഷയങ്ങളില് സംഘടനകള് നേരത്തെ നിരവധി സമരങ്ങള് നടത്തിയിട്ടുണ്ട്.
മൂന്ന് ദിവസത്തെ പണിമുടക്ക് നടന്നിരുന്നെങ്കില് രാജ്യത്തെ ബാങ്കുകളുടെ സാധാരണ പ്രവര്ത്തനത്തെ അത് കാര്യമായി ബാധിക്കുമായിരുന്നു. പ്രത്യേകിച്ച് തുടര്ച്ചയായ അവധിദിനങ്ങളുമായി സമരം ചേര്ന്നാല് ശാഖകളിലെ ഇടപാടുകള്, ചെക്ക് ക്ലിയറന്സ്, പണം പിന്വലിക്കല്, നിക്ഷേപം തുടങ്ങിയ സേവനങ്ങളില് തടസ്സമുണ്ടാകാനുള്ള സാധ്യതയുണ്ടായിരുന്നു. എന്നാല് ഡിജിറ്റല് ബാങ്കിങ്, യുപിഐ, എ.ടി.എം. തുടങ്ങിയ സേവനങ്ങള് സാധാരണ നിലയില് തുടരാനുള്ള സാധ്യതയുമുണ്ടായിരുന്നു.
ധാരണയുടെ അടിസ്ഥാനത്തില് പണിമുടക്ക് മാറ്റിവച്ചതാണെന്നും ആവശ്യങ്ങള് പൂര്ണമായി പരിഹരിച്ചതായി ഇതിനെ കാണാനാകില്ലെന്നും ജീവനക്കാരുടെ സംഘടനകള് വ്യക്തമാക്കുന്നു.
Related News
