ജിദ്ദ: മക്കയിലെ ഗതാഗതക്കുരുക്കിന് അറുതി വരുത്താന് ലക്ഷ്യമിട്ട് നിര്ണായക ചുവടുവെപ്പുമായി ഭരണകൂടം. മൂന്നാം റിംഗ് റോഡിലും പ്രിന്സ് സൗദ് അല് ഫൈസല് റോഡിലും പുതിയ പാതകള് ഔദ്യോഗികമായി ഗതാഗതത്തിനായി തുറന്നു. മക്ക സിറ്റി ആന്ഡ് ഹോളി സൈറ്റ്സ് റോയല് കമ്മീഷന് നടപ്പിലാക്കിയ ഈ പുതിയ റോഡ് വികസനം, നഗരത്തിലെ യാത്രാ രംഗത്ത് വന് മാറ്റങ്ങളാണ് സൃഷ്ടിച്ചിരിക്കുന്നത്.
പുതിയ പാതകള് തുറന്നതോടെ ഈ റൂട്ടുകളിലെ യാത്രാസമയം 90 ശതമാനത്തിലധികം കുറഞ്ഞതായി സൗദി പ്രസ് ഏജന്സി റിപ്പോര്ട്ട് ചെയ്തു. പ്രത്യേകിച്ച് ഹജ്ജ്, ഉംറ സീസണുകളില് എത്തുന്ന ലക്ഷക്കണക്കിന് തീര്ത്ഥാടകര്ക്കും സന്ദര്ശകര്ക്കും യാത്രാതടസ്സങ്ങള് ഒഴിവാക്കാന് ഇത് ഏറെ സഹായിക്കും. നഗരത്തിലെ പ്രധാന കവലകളെയും ഇടനാഴികളെയും ബന്ധിപ്പിക്കുന്നതോടെ തിരക്കേറിയ റോഡുകളിലെ ഗതാഗത ഭാരം ഗണ്യമായി കുറഞ്ഞു. യാത്രക്കാരുടെ സുരക്ഷ ഉറപ്പാക്കുന്നതിനൊപ്പം നഗരത്തിലെ അടിസ്ഥാന സൗകര്യങ്ങള് അന്താരാഷ്ട്ര നിലവാരത്തിലേക്ക് ഉയര്ത്താനും പദ്ധതി സഹായകരമാണ്.
മൂന്നാം റിംഗ് റോഡ്: പ്രിന്സ് മുതിബ്, ഗ്രാന്ഡ് മോസ്ക് കവലകളെ പ്രിന്സ് സുല്ത്താന് കവല വഴി ബന്ധിപ്പിക്കുന്ന പുതിയ 1.5 കിലോമീറ്റര് ഭാഗമാണ് ഇപ്പോള് യാഥാര്ത്ഥ്യമായത്. പ്രിന്സ് മുഹമ്മദ് ബിന് സല്മാന് ഇടനാഴിയെ പ്രിന്സ് നായിഫ് ബിന് അബ്ദുല് അസീസ് കവല വഴി അബ്ദുല് ഖാദിര് കൊഷാക് തെരുവുമായി ബന്ധിപ്പിക്കുന്ന അന്തിമ ഭാഗവും ഇപ്പോള് ഗതാഗതത്തിനായി ഉപയോഗിച്ച് തുടങ്ങി.
വിഷന് 2030 പദ്ധതികളുടെ ഭാഗമായി മക്കയിലെ റോഡ് ശൃംഖല കൂടുതല് ആധുനികവല്ക്കരിക്കുന്നതിന്റെ ഭാഗമായാണ് ഈ നിര്മ്മാണ പ്രവര്ത്തനങ്ങളെല്ലാം പൂര്ത്തിയാക്കിയിരിക്കുന്നത്. ഇത് മക്കയിലെ താമസക്കാര്ക്കും തീര്ത്ഥാടകര്ക്കും ഒരുപോലെ വലിയ അനുഗ്രഹമായി മാറിയിരിക്കുകയാണ്.
