ടെഹ്റാന്: ഹോര്മുസ് കടലിടുക്ക് ഏഴ് ദിവസത്തിനുള്ളില് തുറന്നു നല്കാനുള്ള ഇറാന് നിര്ദ്ദേശത്തോടുള്ള അമേരിക്കന് പ്രസിഡന്റ് ഡൊണാള്ഡ് ട്രംപിന്റെ പ്രാരംഭ പ്രതികരണം ലഭിച്ചതായി ഇറാന് വിദേശകാര്യ മന്ത്രി അബ്ബാസ് അരാഗ്ചി. എന്നാല് മധ്യസ്ഥര് വഴി വാഷിംഗ്ടണിന്റെ ഔദ്യോഗിക നിലപാട് അറിയാന് കാത്തിരിക്കുകയാണെന്ന് അദ്ദേഹം വ്യക്തമാക്കി. ഔദ്യോഗിക വാര്ത്താ ഏജന്സിയായ ഐ.ആര്.എന്.എയോട് സംസാരിക്കുകയായിരുന്നു അദ്ദേഹം.
തന്ത്രപ്രധാനമായ ജലപാത വീണ്ടും തുറക്കുന്നതിനും ചര്ച്ചകള് പുനരാരംഭിക്കുന്നതിനുമുള്ള തങ്ങളുടെ വ്യവസ്ഥകള് ന്യൂയോര്ക്കില് നടന്ന ചര്ച്ചകളില് അവതരിപ്പിച്ചതായി അരാഗ്ചി പറഞ്ഞു. മധ്യസ്ഥര് മുഖേനയാണ് ഈ ആവശ്യങ്ങള് അമേരിക്കയ്ക്ക് കൈമാറിയത്. ഇറാന്റെ വ്യവസ്ഥകള് അംഗീകരിക്കാനാകില്ലെന്ന് വ്യക്തമാക്കി അമേരിക്കന് പ്രസിഡന്റ് ഡൊണാള്ഡ് ട്രംപ് രംഗത്തെത്തിയിരുന്നു. കടലിടുക്കിന്റെ പൂര്ണ്ണ നിയന്ത്രണം അമേരിക്കയുടെ കയ്യിലാണെന്നും, കനത്ത തിരിച്ചടി നേരിടുന്നതുകൊണ്ടാണ് ഇറാന് കരാറിന് ശ്രമിക്കുന്നതെന്നും വൈറ്റ് ഹൗസില് മാധ്യമപ്രവര്ത്തകരോട് സംസാരിക്കവെ ട്രംപ് അവകാശപ്പെട്ടു.
ഹോര്മുസ് കടലിടുക്കിലൂടെയുള്ള കപ്പല് ഗതാഗതം ഏഴ് ദിവസത്തിനകം സാധാരണ നിലയിലാക്കാന് ലക്ഷ്യമിട്ടുള്ള റോഡ്മാപ്പാണ് ഇറാന് മുന്നോട്ടുവെച്ചിരിക്കുന്നത്. മരവിപ്പിച്ച ഇറാനിയന് ആസ്തികള് മോചിപ്പിക്കുക, എണ്ണ ഉപരോധം പിന്വലിക്കുക, ഇറാനിയന് തുറമുഖങ്ങള്ക്ക് മേലുള്ള നാവിക ഉപരോധം അവസാനിപ്പിക്കുക തുടങ്ങിയ ആവശ്യങ്ങളും ഇറാന്ഡ മുന്നോട്ടുവെച്ചിട്ടുണ്ട്.
ജൂണ് മാസത്തിലെ ധാരണാപത്രത്തില് ഉള്പ്പെടുത്തിയിട്ടുള്ള ഈ ആവശ്യങ്ങള് അംഗീകരിച്ചാല് മാത്രമേ കടലിടുക്ക് തുറക്കുന്നത് സംബന്ധിച്ച ചര്ച്ചകളിലേക്ക് കടക്കാനാകൂ എന്ന് ഇറാന് ആവര്ത്തിച്ചു വ്യക്തമാക്കി.
പരമാധികാരവും അന്തസ്സും സംരക്ഷിച്ചുകൊണ്ടുള്ള നയതന്ത്ര ചര്ച്ചകള്ക്ക് മാത്രേമേ പ്രസക്തിയുള്ളൂവെന്നും, സമ്മര്ദ്ദങ്ങള്ക്ക് വഴിപ്പെട്ട് അവകാശങ്ങള് വിട്ടുകൊടുക്കില്ലെന്നും അരാഗ്ചി കൂട്ടിച്ചേര്ത്തു. മധ്യസ്ഥര് വഴി ലഭിക്കുന്ന അന്തിമ പ്രതികരണത്തിന്റെ അടിസ്ഥാനത്തിലായിരിക്കും ഇറാന്റെ അടുത്ത നടപടി.
.jpg)
Related News
