മനാമ: പ്രവാസി ലീഗല്‍ സെല്‍ (പി.എല്‍.സി.) ബഹ്റൈന്‍ ചാപ്റ്റര്‍ ഗവേണിംഗ് കൗണ്‍സില്‍ അംഗങ്ങള്‍ ബഹ്റൈനിലെ പുതിയ ഇന്ത്യന്‍ അംബാസഡര്‍ ഡോ. പ്രദീപ് സിങ് രാജ്പുരോഹിതുമായി കൂടിക്കാഴ്ച നടത്തി.
ബഹ്റൈനിലെ ഇന്ത്യന്‍ പ്രവാസി സമൂഹം നേരിടുന്ന വിവിധ പ്രശ്‌നങ്ങളും വെല്ലുവിളികളും കൂടിക്കാഴ്ചയില്‍ അംബാസഡറുടെ ശ്രദ്ധയില്‍പ്പെടുത്തി. പ്രവാസികളുടെ നിയമപരമായ അവകാശങ്ങള്‍, ക്ഷേമം, സുരക്ഷ, തൊഴില്‍ സംബന്ധമായ പ്രശ്‌നങ്ങള്‍ തുടങ്ങിയ വിഷയങ്ങള്‍ ചര്‍ച്ച ചെയ്യുകയും വിവിധ ആവശ്യങ്ങള്‍ ഉന്നയിച്ചുകൊണ്ടുള്ള നിവേദനം അംബാസഡര്‍ക്ക് സമര്‍പ്പിക്കുകയും ചെയ്തു.
പ്രവാസി ലീഗല്‍ സെല്ലിന്റെ നിയമസഹായ പ്രവര്‍ത്തനങ്ങള്‍, മാനുഷിക ഇടപെടലുകള്‍, നിയമബോധവല്‍ക്കരണ പരിപാടികള്‍, ദുരിതമനുഭവിക്കുന്ന പ്രവാസികള്‍ക്കായി നടപ്പിലാക്കിവരുന്ന വിവിധ സേവനങ്ങള്‍ എന്നിവയും പ്രതിനിധിസംഘം അംബാസഡറുമായി പങ്കുവെച്ചു.
പ്രവാസികളുടെ പ്രശ്‌നങ്ങള്‍ അനുഭാവപൂര്‍വം കേട്ട അംബാസഡര്‍, പ്രവാസി ലീഗല്‍ സെല്ലിന്റെ പ്രവര്‍ത്തനങ്ങളില്‍ പ്രത്യേക താല്‍പര്യം പ്രകടിപ്പിക്കുകയും ഇന്ത്യന്‍ പ്രവാസി സമൂഹത്തിന്റെ ക്ഷേമത്തിനും അവകാശസംരക്ഷണത്തിനുമായി സംഘടന നടത്തുന്ന പ്രവര്‍ത്തനങ്ങള്‍ക്ക് പൂര്‍ണ പിന്തുണയും സഹകരണവും ഉറപ്പുനല്‍കുകയും ചെയ്തു.
പ്രവാസി ലീഗല്‍ സെല്‍ ബഹ്റൈന്‍ ചാപ്റ്ററിന്റെ ഔദ്യോഗിക വാര്‍ത്താപത്രികയായ 'ദി ബ്രിഡ്ജിന്റെ' ഏറ്റവും പുതിയ പതിപ്പിന്റെ പ്രകാശനവും അംബാസഡര്‍ നിര്‍വഹിച്ചു. സംഘടനയുടെ സേവനപ്രവര്‍ത്തനങ്ങളും നിയമസഹായ രംഗത്തെ നേട്ടങ്ങളും മാനുഷിക ഇടപെടലുകളും ഉള്‍ക്കൊള്ളുന്നതാണ് വാര്‍ത്താപത്രിക.
പ്രവാസി ലീഗല്‍ സെല്‍ ഗ്ലോബല്‍ പി.ആര്‍.ഒയും ബഹ്റൈന്‍ ചാപ്റ്റര്‍ പ്രസിഡന്റുമായ സുധീര്‍ തിരുനിലത്ത്, ജനറല്‍ സെക്രട്ടറി ഡോ. റിതിന്‍ രാജ്, സീനിയര്‍ ഗവേണിംഗ് കൗണ്‍സില്‍ അംഗവും മീഡിയ കോര്‍ഡിനേറ്ററുമായ രാജി ഉണ്ണികൃഷ്ണന്‍, അസിസ്റ്റന്റ് സെക്രട്ടറിമാരായ മുഹമ്മദ് സലീം, ഫസീല ഖാലിദ്, ഇവന്റ് കോര്‍ഡിനേറ്റര്‍ സ്പന്ദന കിഷോര്‍ എന്നിവര്‍ കൂടിക്കാഴ്ചയില്‍ പങ്കെടുത്തു.
പ്രവാസി സമൂഹത്തിന്റെ ക്ഷേമത്തിനായി ഇന്ത്യന്‍ എംബസിയുമായും ബഹ്റൈനിലെ ബന്ധപ്പെട്ട അധികാരികളുമായും സഹകരിച്ച് കൂടുതല്‍ കാര്യക്ഷമമായ പ്രവര്‍ത്തനങ്ങള്‍ തുടരുമെന്ന് പ്രവാസി ലീഗല്‍ സെല്‍ ഭാരവാഹികള്‍ അറിയിച്ചു. കൂടിക്കാഴ്ചയ്ക്ക് അവസരമൊരുക്കിയതിനും സംഘടനയുടെ പ്രവര്‍ത്തനങ്ങള്‍ക്ക് പിന്തുണ ഉറപ്പുനല്‍കിയതിനും അംബാസഡര്‍ക്ക് പ്രവാസി ലീഗല്‍ സെല്‍ ബഹ്റൈന്‍ ചാപ്റ്റര്‍ നന്ദി രേഖപ്പെടുത്തി.
