ലണ്ടന്‍: ബ്രിട്ടനിലെ ആര്‍.എ.എഫ് ഫയര്‍ഫോഡ് വ്യോമതാവളത്തിന് സമീപം കഴിഞ്ഞ വാരാന്ത്യത്തില്‍ ഉണ്ടായ ഗുരുതര സുരക്ഷാ സംഭവത്തില്‍ ഇറാന്‍ പങ്കുവഹിച്ചെന്നതിന് ശക്തമായ സൂചനകളുണ്ടെന്ന് ബ്രിട്ടിഷ് പ്രധാനമന്ത്രി ആന്‍ഡി ബേണ്‍ഹാം. സംഭവം ഇപ്പോഴും അന്വേഷണത്തിലാണെന്നും അമേരിക്കന്‍ അധികൃതരുമായി ബ്രിട്ടന്‍ അടുത്ത സഹകരണം തുടരുകയാണെന്നും അദ്ദേഹം വ്യക്തമാക്കി.
സംഭവത്തില്‍ ഇറാന്‍ പങ്കുവഹിച്ചതായി ശക്തമായ സൂചനകളുണ്ടെന്നും അന്വേഷണം തുടരുകയാണെന്നും ബേണ്‍ഹാം ബി.ബി.സിയോട് പറഞ്ഞു. സംഭവത്തില്‍ ഇറാനെ സംശയിക്കുന്നതായ ബ്രിട്ടിഷ് സര്‍ക്കാരിന്റെ ആദ്യ ഔദ്യോഗിക സ്ഥിരീകരണമാണിത്.
സെപ്റ്റംബര്‍ 27ന് പുലര്‍ച്ചെയാണ് വ്യോമതാവളത്തിന് സമീപം മൂന്ന് വാനുകള്‍ സംശയാസ്പദമായി കണ്ടെത്തിയത്. തുടര്‍ന്ന് അഞ്ച് ബ്രിട്ടിഷ് പൗരന്മാരെ ഭീകരവാദ, സ്‌ഫോടകവസ്തു സംബന്ധമായ സംശയങ്ങളില്‍ അറസ്റ്റ് ചെയ്തു. പിന്നീട് കര്‍ശന വ്യവസ്ഥകളോടെ ഇവരെ ജാമ്യത്തില്‍ വിട്ടെങ്കിലും അന്വേഷണം തുടരുകയാണ്.
പോലീസ് നടത്തിയ പരിശോധനയില്‍ വാനുകളില്‍ പെട്രോള്‍ കണ്ടെത്തിയെങ്കിലും പ്രവര്‍ത്തനക്ഷമമായ സ്‌ഫോടക ഉപകരണം കണ്ടെത്തിയില്ല. സംഭവത്തിന്റെ യഥാര്‍ഥ ലക്ഷ്യം എന്തായിരുന്നു, പ്രതികള്‍ക്ക് വിദേശരാജ്യവുമായി ബന്ധമുണ്ടായിരുന്നോ തുടങ്ങിയ കാര്യങ്ങള്‍ അന്വേഷണത്തിന്റെ ഭാഗമാണ്.
പിന്നില്‍ ഒരു 'വിദേശ ശക്തിയുടെ കൈ' ഉണ്ടെന്ന് അമേരിക്കന്‍ സ്‌റ്റേറ്റ് സെക്രട്ടറി മാര്‍ക്കോ റൂബിയോ നേരത്തെ സംഭവത്തിന് പറഞ്ഞിരുന്നു. എന്നാല്‍ അന്ന് ഇറാന്റെ പേര് നേരിട്ട് സ്ഥിരീകരിച്ചിരുന്നില്ല. ഈ വ്യോമതാവളം അമേരിക്കന്‍ വ്യോമസേന ഉപയോഗിക്കുന്ന പ്രധാന കേന്ദ്രമാണ്. ഇറാനെതിരായ സൈനിക നടപടികള്‍ക്കായി അടുത്ത കാലത്ത് അമേരിക്കന്‍ ബോംബറുകള്‍ ഇവിടെ ക്യാമ്പ് ചെയ്തിരുന്നു.
ഇറാന്‍ ആരോപണം നിഷേധിച്ചിട്ടുണ്ട്. അടിസ്ഥാനരഹിതവും ദുരുദ്ദേശപരവുമായ ഊഹാപോഹങ്ങള്‍ എന്നാണ് ലണ്ടനിലെ ഇറാന്‍ എംബസി ഇറാനെ സംഭവവുമായി ബന്ധിപ്പിക്കുന്ന ആരോപണങ്ങളെ വിശേഷിപ്പിച്ചത്.
അറസ്റ്റിലായവരെ ജാമ്യത്തില്‍ വിട്ടതിനെ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് വിമര്‍ശിച്ചിരുന്നു. എന്നാല്‍ ബ്രിട്ടിഷ് സുരക്ഷാ ഏജന്‍സികളുടെ നടപടിയില്‍ തനിക്ക് പൂര്‍ണ വിശ്വാസമുണ്ടെന്നും പ്രതികള്‍ കര്‍ശന നിരീക്ഷണത്തിലാണെന്നും ബേണ്‍ഹാം വ്യക്തമാക്കി.
Related News
