റിയാദ്: സൗദി അറേബ്യയിലെ മദീനയിലുള്ള 'തൈ്വബ' പവര്‍ ഡിസ്ട്രിബ്യൂഷന്‍ സ്റ്റേഷന് നേരെ യെമനിലെ ഹൂതി വിമതരുടെ ഡ്രോണ്‍ ആക്രമണം. ചൊവ്വാഴ്ച രാവിലെയാണ് ആക്രമണം നടന്നതെന്ന് യെമനിലെ നിയമപാലകരെ പിന്തുണയ്ക്കുന്ന അറബ് സഖ്യസേന അറിയിച്ചു.
ഭീരുത്വവും തീവ്രവാദപരവുമായ ഈ ആക്രമണം ഹൂതി മിലീഷ്യ ആസൂത്രണം ചെയ്തു നടപ്പിലാക്കിയതാണെന്ന് സഖ്യസേനയുടെ വക്താവ് തുര്‍ക്കി അല്‍-മാലികി വ്യക്തമാക്കി. ആക്രമണത്തിന്റെ ഉറവിടം കണ്ടെത്താന്‍ അധികൃതര്‍ വിശദമായ പരിശോധന നടത്തുകയും ഡ്രോണിന്റെ അവശിഷ്ടങ്ങള്‍ പരിശോധിക്കുകയും ചെയ്തിട്ടുണ്ട്.
ആക്രമണത്തെ തുടര്‍ന്ന് ഒരു ട്രാന്‍സ്‌ഫോര്‍മര്‍ പ്രവര്‍ത്തനരഹിതമായെങ്കിലും മൊത്തത്തിലുള്ള പവര്‍ ഗ്രിഡിനെ ഇത് ബാധിച്ചിട്ടില്ലെന്ന് അല്‍-മാലികി അറിയിച്ചു. മദീനയിലെ പ്രവാചക പള്ളിക്ക് (മസ്ജിദുന്നബവി) വൈദ്യുതി സേവനം നല്‍കുന്ന സിവിലിയന്‍ കേന്ദ്രത്തെയാണ് ആക്രമണകാരികള്‍ ലക്ഷ്യമിട്ടത്. വിശുദ്ധ ഹറമുകളെ ലക്ഷ്യമിടാന്‍ ഹൂതികള്‍ നിരന്തരം നടത്തുന്ന ശ്രമങ്ങളുടെ തുടര്‍ച്ചയാണിത്.
ഈ ആക്രമണങ്ങള്‍ ലോകമെമ്പാടുമുള്ള കോടിക്കണക്കിന് മുസ്ലീങ്ങളുടെ വികാരങ്ങളെ ബോധപൂര്‍വ്വം പ്രകോപിപ്പിക്കുന്നതിനുള്ള ശ്രമമാണെന്നും അദ്ദേഹം പറഞ്ഞു. കഴിഞ്ഞ മാസം മക്ക ലക്ഷ്യമിട്ട് ഹൂതികള്‍ തൊടുത്തുവിട്ട ഡ്രോണ്‍ സഖ്യസേന തടഞ്ഞിരുന്നു.
മിലീഷ്യകളുടെ ഇത്തരം നീക്കങ്ങളെ പ്രതിരോധിക്കാനും വിശുദ്ധ ഹറമുകളുടെ സംരക്ഷണവും സന്ദര്‍ശകരുടെ സുരക്ഷയും ഉറപ്പാക്കാനുമുള്ള കര്‍ശന നടപടികള്‍ സഖ്യസേന തുടര്‍ന്നും സ്വീകരിക്കുമെന്ന് അല്‍-മാലികി കൂട്ടിച്ചേര്‍ത്തു.
