ബെംഗളൂരു: കര്‍ണാടകയിലെ ചീഫ് ഇലക്ടറല്‍ ഓഫീസറുടെ ഓഫീസില്‍ മുഖ്യമന്ത്രി ഡി.കെ. ശിവകുമാറിന്റെ നേതൃത്വത്തില്‍ കോണ്‍ഗ്രസ് പ്രതിഷേധിച്ചതോടെ നടപടികള്‍ പുനഃപരിശോധിക്കാന്‍ തയാറായി ഇലക്ഷന്‍ കമ്മീഷന്‍. മുഖ്യമന്ത്രി ഡി.കെ. ശിവകുമാറിന്റെ നേതൃത്വത്തില്‍ കോണ്‍ഗ്രസ് മന്ത്രിമാരും നേതാക്കളും അഞ്ചു മണിക്കൂറോളം ഇലക്ടറുടെ ഓഫീസിന് മുന്നില്‍ സമരം നടത്തിയിരുന്നു. വോട്ടര്‍പട്ടികയില്‍ നിന്ന് പേരുകള്‍ നീക്കം ചെയ്യുന്നതിനായി എ7 അപേക്ഷകള്‍ കൂട്ടത്തോടെ സമര്‍പ്പിച്ചതായി ആരോപിച്ചായിരുന്നു പ്രതിഷേധം. സംഭവത്തില്‍ എഫ്.ഐ.ആറും സമയബന്ധിതമായ അന്വേഷണവും വേണമെന്നായിരുന്നു ആവശ്യം.
തുടര്‍ന്ന് കര്‍ണാടക ചീഫ് ഇലക്ടറല്‍ ഓഫീസര്‍ വി. അന്ബുകുമാര്‍ സംസ്ഥാനത്തെ ജില്ലാ തിരഞ്ഞെടുപ്പ് ഉദ്യോഗസ്ഥര്‍ക്കും ഇലക്ടറല്‍ രജിസ്‌ട്രേഷന്‍ ഓഫീസര്‍മാര്‍ക്കും നിര്‍ദേശം നല്‍കി. ഫോം-6, 6 എ, 7, 8 എന്നിവയില്‍ ബോധപൂര്‍വം തെറ്റായ വിവരങ്ങളോ വ്യാജ പ്രഖ്യാപനങ്ങളോ നല്‍കിയതായി കണ്ടെത്തുന്നവര്‍ക്കെതിരെ നിയമനടപടി സ്വീകരിക്കണമെന്നാണ് നിര്‍ദേശം.
വോട്ടര്‍പട്ടികയില്‍ നിന്ന് പേര് നീക്കം ചെയ്യുന്നതിനുള്ള അപേക്ഷയാണ് ഫോം-7. കര്‍ണാടകയിലെ എസ്.ഐ.ആര്‍ നടപടിക്കിടെ വിവിധ മണ്ഡലങ്ങളില്‍ വലിയ തോതില്‍ എ7 അപേക്ഷകള്‍ സമര്‍പ്പിക്കപ്പെട്ടതായി റിപ്പോര്‍ട്ടുകള്‍ പുറത്തുവന്നിരുന്നു. ഇതിലേറെയും ന്യൂനപക്ഷ സമുദായംഗങ്ങളുടേതാണ്. ബെളഗാവി നോര്‍ത്തില്‍ ഏകദേശം 3,000, മുദിഗെരെയില്‍ 6,259, ഭാല്‍കിയില്‍ 2,285, ബാബലേശ്വറില്‍ 1,373 അപേക്ഷകള്‍ ലഭിച്ചതായി ശിവകുമാര്‍ ചൂണ്ടിക്കാട്ടി.
ചില അപേക്ഷകളില്‍ വോട്ടര്‍മാരുടെ പേരുകളും നമ്പറുകളും മുന്‍കൂട്ടി പ്രിന്റ് ചെയ്തിരുന്നു. ഈ വിവരങ്ങള്‍ എവിടെനിന്നാണ് ലഭിച്ചതെന്നും ആരാണ് അപേക്ഷകള്‍ തയ്യാറാക്കി വിതരണം ചെയ്തതെന്നും അന്വേഷിക്കണമെന്ന് ശിവകുമാര്‍ ആവശ്യപ്പെട്ടു. ചില മണ്ഡലങ്ങളില്‍ അപേക്ഷകള്‍ പിന്നീട് പിന്‍വലിച്ചതായും അദ്ദേഹം ആരോപിച്ചു.