ബുറൈദ: സൗദി അറേബ്യയിലെ ബുറൈദയില്‍ താമസസ്ഥലത്തുണ്ടായ തീപിടിത്തത്തെ തുടര്‍ന്ന് പുക ശ്വസിച്ച് മരണമടഞ്ഞ തമിഴ്നാട് സ്വദേശികളായ അമ്മയുടെയും രണ്ടുവയസ്സുള്ള മകളുടെയും മൃതദേഹങ്ങള്‍ നാട്ടിലെത്തിച്ചു. തമിഴ്നാട് ചെന്നൈ സ്വദേശികളായ ജയഭാരതി (37), മകള്‍ കാര്‍ത്തിക ശ്രീ (2) എന്നിവരുടെ മൃതദേഹങ്ങളാണ് ഇന്ത്യന്‍ എംബസിയുടെയും കനിവ് ജീവകാരുണ്യ വിഭാഗത്തിന്റെയും ഇടപെടലിലൂടെ നിയമപരമായ യാത്രാനടപടികള്‍ പൂര്‍ത്തിയാക്കി നാട്ടിലെത്തിച്ചത്. റിയാദില്‍ നിന്നും എയര്‍ ഇന്ത്യ വിമാനത്തില്‍ ചെന്നൈ എയര്‍പോര്‍ട്ടില്‍ എത്തിച്ച മൃതദേഹം ബന്ധുക്കള്‍ ഏറ്റുവാങ്ങി.
ഗോകുല്‍ രാജാണ് ജയഭാരതിയുടെ ഭര്‍ത്താവ്. മരണപ്പെടുന്നതിന് ഒരാഴ്ച മുമ്പാണ് സന്ദര്‍ശന വിസയില്‍ കുടുംബം സൗദിയിലെത്തിയത്. ജൂലൈ 21-നായിരുന്നു ദാരുണമായ സംഭവം. ബുറൈദയിലെ സഫറക്കടുത്തുള്ള താമസസ്ഥലത്ത് രാത്രി ഉറങ്ങിക്കിടക്കുന്നതിനിടെയാണ് അപകടമുണ്ടായത്. ചന്ദനത്തിരിയില്‍ നിന്ന് തീ പടര്‍ന്ന് കാര്‍പെറ്റില്‍ ഭാഗികമായി തീപിടിക്കുകയും തുടര്‍ന്ന് മുറിയില്‍ പുക നിറയുകയുമായിരുന്നു. പുക ശ്വസിച്ചതിനെ തുടര്‍ന്നാണ് ജയഭാരതിയും മകളും മരണപ്പെട്ടത്. അപകടസമയത്ത് ഗോകുല്‍ രാജ് തൊട്ടടുത്ത മുറിയില്‍ ജോലി കഴിഞ്ഞ് ഉറങ്ങുകയായിരുന്നു. പുകയുടെ ഗന്ധം അനുഭവപ്പെട്ട് ഉണര്‍ന്നപ്പോഴാണ് ഭാര്യയും മകളും മരണപ്പെട്ട വിവരം അദ്ദേഹം അറിയുന്നത്.
പ്രവാസി താമസയിടങ്ങളിലും വീടുകളിലും അശ്രദ്ധയും അജ്ഞതയും മൂലം ഇത്തരം ദുരന്തങ്ങള്‍ ആവര്‍ത്തിക്കാതിരിക്കാന്‍ എല്ലാവരും പ്രത്യേകം ജാഗ്രത പുലര്‍ത്തണമെന്ന് കനിവ് ജീവകാരുണ്യ വിഭാഗം കണ്‍വീനറും സാമൂഹിക പ്രവര്‍ത്തകനുമായ ഹരിലാല്‍ പറഞ്ഞു. ഉറങ്ങുന്നതിന് മുമ്പ് തീപിടിത്തത്തിന് സാധ്യതയുള്ള വസ്തുക്കളും ഉപകരണങ്ങളും സുരക്ഷിതമാണെന്ന് ഉറപ്പാക്കുകയും വീടുകളില്‍ പുക അലാറം, അഗ്‌നിശമന ഉപകരണം തുടങ്ങിയ അടിസ്ഥാന സുരക്ഷാ സംവിധാനങ്ങള്‍ നിര്‍ബന്ധമായും ഒരുക്കുകയും വേണം. ഒരു ചെറിയ അശ്രദ്ധ പോലും വിലപ്പെട്ട ജീവനുകള്‍ നഷ്ടപ്പെടാന്‍ ഇടയാക്കുമെന്ന് ബോധ്യം ഓരോ പ്രവാസി കുടുംബത്തിനും ഉണ്ടാകണമെന്നും അദ്ദേഹം പറഞ്ഞു.
-ഇക്ബാല്‍ പള്ളിമുക്ക്
Related News
