ന്യൂഡല്‍ഹി: വോട്ടര്‍പട്ടികയിലെ ക്രമക്കേടുകള്‍ ആരോപിച്ച് ചീഫ് ഇലക്ഷന്‍ കമ്മീഷണര്‍ (സി.ഇ.സി) ഗ്യാനേഷ് കുമാര്‍ രാജി വെക്കുന്നതുവരെ സമരം തുടരുമെന്ന് പ്രഖ്യാപിച്ച് കോക്രോച്ച് ജനതാ പാര്‍ട്ടി (സി.ജെ.പി). ഞായറാഴ്ച ജന്തര്‍ മന്തറില്‍ വീണ്ടും പ്രതിഷേധ പ്രകടനം നടത്തുമെന്ന് പാര്‍ട്ടി അറിയിച്ചു. ശനിയാഴ്ച ജന്തര്‍ മന്തറിലേക്ക് സി.ജെ.പി ആഹ്വാനം ചെയ്ത പ്രതിഷേധ മാര്‍ച്ചില്‍ പങ്കെടുത്ത ഏകദേശം 3,000-ത്തോളം പേരെ പോലീസ് കസ്റ്റഡിയിലെടുത്തതിന് പിന്നാലെയാണ് സമരം കൂടുതല്‍ ശക്തമാക്കാന്‍ പാര്‍ട്ടി തീരുമാനിച്ചത്.

മുന്‍ മുഖ്യമന്ത്രിമാരായ അരവിന്ദ് കെജ്രിവാള്‍ (എ.എ.പി), മമത ബാനര്‍ജി (തൃണമൂല്‍ കോണ്‍ഗ്രസ്), പിണറായി വിജയന്‍, മണിക് സര്‍ക്കാര്‍ (ഇരുവരും ഇടത് കക്ഷികള്‍) തുടങ്ങിയ പ്രമുഖ നേതാക്കളും കസ്റ്റഡിയിലായവരില്‍ ഉള്‍പ്പെടുന്നു. കസ്റ്റഡിയിലെടുത്ത ഭൂരിഭാഗം പേരെയും ശനിയാഴ്ച രാത്രിയോടെ പോലീസ് മോചിപ്പിച്ചു. എന്നാല്‍ സി.ജെ.പി മുന്‍നിര നേതാക്കളായ അഭിജിത് ദിപ്‌കെ, സൗരവ് ദാസ്, അശുതോഷ് റാങ്ക എന്നിവര്‍ പോലീസ് കസ്റ്റഡിയില്‍ തുടരുകയാണ്.

അതേസമയം ഗുഡ്ഗാവിലെ വസതിയില്‍ നിന്ന് കസ്റ്റഡിയിലെടുത്ത പ്രമുഖ യൂട്യൂബര്‍ ധ്രുവ് രാഡിയെ ഞായറാഴ്ച പുലര്‍ച്ചെ ഗുഡ്ഗാവ് പോലീസ് മോചിപ്പിച്ചു. സി.ജെ.പി നേതാക്കള്‍ ഡല്‍ഹിയിലെത്തിയ ഉടന്‍ അവരെ കസ്റ്റഡിയിലെടുത്ത് അജ്ഞാത കേന്ദ്രത്തിലേക്ക് മാറ്റിയതായി പാര്‍ട്ടി ആരോപിച്ചു. ഇവരെ ഡല്‍ഹി കന്റോണ്‍മെന്റ് പോലീസ് സ്റ്റേഷനില്‍ എക്‌സിക്യൂട്ടീവ് മജിസ്‌ട്രേറ്റിന് മുന്നില്‍ ഹാജരാക്കുമെന്നാണ് സൂചന.

തന്റെ മകനെ ബന്ധപ്പെടാന്‍ സാധിക്കുന്നില്ലെന്നും പോലീസ് നുണ പറയുകയാണെന്നും അഭിജിത് ദിപ്‌കെയുടെ പിതാവ് ഭഗവാന്‍ ദിപ്‌കെ മാധ്യമങ്ങളോട് പറഞ്ഞു. സമാധാനപരമായി പ്രതിഷേധിച്ച നേതാക്കള്‍, വിദ്യാര്‍ത്ഥികള്‍, മാധ്യമപ്രവര്‍ത്തകര്‍, അഭിഭാഷകര്‍ എന്നിവരെ കൂട്ടത്തോടെ കസ്റ്റഡിയിലെടുത്ത ഡല്‍ഹി പോലീസിന്റെ നടപടിക്കെതിരെ സമര്‍പ്പിച്ച ഹര്‍ജി സുപ്രീം കോടതി ഞായറാഴ്ച പ്രത്യേക സിറ്റിംഗില്‍ പരിഗണിക്കും. കൂടാതെ, പ്രതിഷേധക്കാര്‍ തലസ്ഥാനത്തേക്ക് എത്തുന്നത് തടയാന്‍ പൊതുഗതാഗത സംവിധാനങ്ങളും മെട്രോ, റെയില്‍ സര്‍വീസുകളും കൂട്ടത്തോടെ നിര്‍ത്തിവെച്ച പോലീസിന്റെ നടപടിക്കെതിരായ കോടതിയലക്ഷ്യ ഹര്‍ജിയും കോടതി കേള്‍ക്കും.

കസ്റ്റഡിയിലായ അഭിഭാഷകരെ ചീഫ് ജസ്റ്റിസ് സൂര്യകാന്ത് ഇടപെട്ടതിനെത്തുടര്‍ന്ന് ശനിയാഴ്ച രാത്രിയോടെ മോചിപ്പിച്ചിരുന്നു. കൂടാതെ, ഡല്‍ഹിയില്‍ നടന്ന കൂട്ട അറസ്റ്റുകളില്‍ യു.എന്‍ മനുഷ്യാവകാശ ബോഡി (OHCHR) ആശങ്ക പ്രകടിപ്പിക്കുകയും കസ്റ്റഡിയിലുള്ളവരെ ഉടന്‍ മോചിപ്പിക്കണമെന്ന് ആവശ്യപ്പെടുകയും ചെയ്തിട്ടുണ്ട്. എന്നാല്‍ ഈ പ്രസ്താവന കേന്ദ്ര സര്‍ക്കാര്‍ തള്ളി.

നഗരത്തില്‍ കടുത്ത നിയന്ത്രണങ്ങള്‍

പ്രതിഷേധത്തിന് പോലീസ് അനുമതി നിഷേധിച്ചിട്ടുള്ളതിനാല്‍ ഡല്‍ഹിയില്‍ ക്രമസമാധാനം ഉറപ്പാക്കാന്‍ കര്‍ശന സുരക്ഷാ നടപടികളാണ് സ്വീകരിച്ചിരിക്കുന്നത്. ഒക്ടോബര്‍ 10-ന് നഗരത്തിലെ എട്ടോളം സ്‌പോര്‍ട്‌സ് കോംപ്ലക്‌സുകളും കമ്മ്യൂണിറ്റി സെന്ററുകളും താല്‍ക്കാലിക തടങ്കല്‍ കേന്ദ്രങ്ങളാക്കി മാറ്റിയിരുന്നു. പൊതുജനസുരക്ഷ മുന്‍നിര്‍ത്തി ഈ കേന്ദ്രങ്ങള്‍ക്ക് ചുറ്റുമുള്ള 500 മീറ്റര്‍ ചുറ്റളവില്‍ 10 മണിക്കൂര്‍ മൊബൈല്‍ ഇന്റര്‍നെറ്റ് സേവനങ്ങള്‍ ആഭ്യന്തര മന്ത്രാലയം വിച്ഛേദിക്കുകയും ചെയ്തു.