ന്യൂഡല്‍ഹി: നാടകവേദികളിലെ അഭിനയച്ചുവടുകളില്‍ നിന്ന് ഇന്ത്യന്‍ രാഷ്ട്രീയത്തിന്റെ മുന്‍നിരയിലേക്കും തെരുവുകളിലെ പ്രക്ഷോഭത്തീയിലേക്കും എത്തിയിരിക്കുകയാണ് ഇരുപത്തൊന്‍പതുകാരിയായ നേഹ ബോറ. നരേന്ദ്ര മോദി സര്‍ക്കാരിനെതിരെ രാജ്യത്ത് ശക്തമാകുന്ന യുവജന പ്രക്ഷോഭങ്ങളുടെ ഏറ്റവും പ്രമുഖമായ മുഖങ്ങളില്‍ ഒരാളായി ഈ ഡോക്ടറല്‍ വിദ്യാര്‍ത്ഥി മാറിത്തുടങ്ങിയിരിക്കുന്നു.
ഓള്‍ ഇന്ത്യ സ്റ്റുഡന്റ്സ് അസോസിയേഷന്‍ (ഐസ) ദേശീയ പ്രസിഡന്റായ നേഹ ബോറ, തിരഞ്ഞെടുപ്പ് പ്രക്രിയകളിലെ ക്രമക്കേടുകള്‍ക്കെതിരെ 'കോക്രോച്ച് ജനതാ പാര്‍ട്ടി'യുടെ നേതൃത്വത്തില്‍ നടന്ന സമരങ്ങള്‍ക്കിടെ അറസ്റ്റിലായതോടെയാണ് ദേശീയ തലത്തില്‍ കൂടുതല്‍ ശ്രദ്ധിക്കപ്പെടുന്നത്.
നാടകങ്ങളില്‍നിന്ന് രാഷ്ട്രീയത്തിലേക്ക്
ഉത്തരാഖണ്ഡില്‍ ജനിച്ച്, സൈനികനായ പിതാവിനൊപ്പം വിവിധ സ്ഥലങ്ങളില്‍ വളര്‍ന്ന നേഹ, ഡല്‍ഹി സര്‍വകലാശാലയിലെ പഠനകാലത്താണ് നാടകവേദികളുമായി അടുക്കുന്നത്. പിന്നീട് ജവഹര്‍ലാല്‍ നെഹ്റു സര്‍വകലാശാലയിലെ (ജെ.എന്‍.യു) സ്‌കൂള്‍ ഓഫ് ആര്‍ട്സ് ആന്‍ഡ് എസ്തറ്റിക്സില്‍ ഡോക്ടറേറ്റ് പഠനത്തിനെത്തി.
താന്‍ യാദൃശ്ചികമായി രാഷ്ട്രീയത്തിലെത്തിയതാണെന്ന് നേഹ പറയുന്നു. വ്യത്യസ്ത മനുഷ്യരുടെ ജീവിതങ്ങളിലേക്ക് ഇറങ്ങിച്ചെല്ലാന്‍ തന്നെ പഠിപ്പിച്ചത് നാടകമാണെന്ന് അവര്‍ ഓര്‍ക്കുന്നു. 2019-20 കാലഘട്ടത്തിലെ പൗരത്വ നിയമഭേദഗതിക്കെതിരെയുള്ള വിദ്യാര്‍ത്ഥി പ്രക്ഷോഭങ്ങളാണ് അവരുടെ രാഷ്ട്രീയ ജീവിതത്തില്‍ വഴിതിരിവായത്. പുസ്തകങ്ങളിലും സിനിമകളിലും മാത്രം കണ്ട ആശയങ്ങളെ തെരുവുകളിലെ രാഷ്ട്രീയ പ്രക്ഷോഭങ്ങളാക്കി മാറ്റാന്‍ തന്റെ തലമുറയിലെ വിദ്യാര്‍ത്ഥികള്‍ മുന്നോട്ടുവന്നത് നേഹയെ പ്രചോദിപ്പിച്ചു.
ജയിലറയിലും അടിയുറച്ച പോരാട്ടം
കഴിഞ്ഞ ശനിയാഴ്ച ദല്‍ഹിയിലെ ജന്തര്‍മന്തറിലേക്ക് മാര്‍ച്ച് നടത്തിയ പ്രക്ഷോഭകരെ പൊലീസ് തടഞ്ഞതിനെ തുടര്‍ന്ന്, ദില്ലി ഹാട്ടില്‍ ഒത്തുകൂടാന്‍ നേഹ പ്രവര്‍ത്തകര്‍ക്ക് നേതൃത്വം നല്‍കി. 'ഇന്ന് ജന്തര്‍മന്തര്‍ ദില്ലി ഹാട്ട് ആണ്' എന്ന് എക്സില്‍ കുറിച്ചുകൊണ്ട് അവര്‍ സമരമുഖത്തേക്ക് മുന്നേറി. തുടര്‍ന്ന് പൊലീസിന്റെ കസ്റ്റഡിയിലായെങ്കിലും, 'ഞാന്‍ കസ്റ്റഡിയിലാണ്, എന്നാല്‍ പ്രക്ഷോഭം അവസാനിക്കുന്നില്ല' എന്ന സന്ദേശമടങ്ങിയ വീഡിയോയിലൂടെ അവര്‍ പ്രതിഷേധം തുടരാന്‍ അനുയായികളോട് ആഹ്വാനം ചെയ്തു.
പരീക്ഷാ ചോദ്യപേപ്പര്‍ ചോര്‍ച്ച, തൊഴിലില്ലായ്മ, തിരഞ്ഞെടുപ്പ് കമ്മീഷണറുടെ നടപടികള്‍ തുടങ്ങി നിരവധി വിഷയങ്ങളില്‍ സര്‍ക്കാരിനെതിരെ ശക്തമായ നിലപാടാണ് നേഹ സ്വീകരിക്കുന്നത്. സംസാരിക്കുമ്പോള്‍ ശാന്തയാണെങ്കിലും, മൈക്കിന് മുന്നില്‍ അവര്‍ നല്‍കുന്ന പ്രഭാഷണങ്ങള്‍ ഹിന്ദിയിലും ഇംഗ്ലീഷിലുമായി വലിയ തോതില്‍ ഓണ്‍ലൈനില്‍ പ്രചരിക്കാറുണ്ട്. ഭരണഘടനാപരമായ അവകാശങ്ങളെക്കുറിച്ചും സമത്വത്തെക്കുറിച്ചും സംസാരിക്കുന്ന നേഹയുടെ വാക്കുകള്‍ ഇന്ന് ഇന്ത്യന്‍ യുവത്വത്തിന് വലിയ പ്രചോദനമാണ്.
'ഭയം പടരുന്നതുപോലെ തന്നെ പ്രത്യാശയും പടരുന്ന ഒന്നാണ്' എന്ന് വിശ്വസിക്കുന്ന നേഹ ബോറ, വര്‍ഷങ്ങളായി ജനങ്ങള്‍ ഉള്ളിലൊതുക്കിയ പ്രതിഷേധവും നിരാശയുമാണ് ഇന്നത്തെ തെരുവ് സമരങ്ങളില്‍ പ്രതിഫലിക്കുന്നതെന്ന് വ്യക്തമാക്കുന്നു. ആവര്‍ത്തിച്ചുള്ള അറസ്റ്റുകളും തടസ്സങ്ങളും വകവെയ്ക്കാതെ ഇന്ത്യന്‍ യുവത്വത്തിന്റെ അവകാശങ്ങള്‍ക്കായി ശബ്ദമുയര്‍ത്തുന്ന നേഹ ബോറ, പുതിയൊരു രാഷ്ട്രീയ മുന്നേറ്റത്തിന്റെ പ്രതീകമായി മാറിക്കഴിഞ്ഞു.
