കോഴിക്കോട്: ഖത്തറിലെ ദോഹയിലുള്ള കേരള മുസ്‌ലിം കള്‍ച്ചറല്‍ സെന്റര്‍ (കെ.എം.സി.സി) ഓഫീസില്‍നിന്ന് ഏകദേശം എട്ടു കോടി രൂപ കവര്‍ന്ന കേസില്‍ ബിജെപി നേതാവ് പൊലീസില്‍ കീഴടങ്ങി. കൊയിലാണ്ടി സ്വദേശിയായ പറപ്പില്‍ ബാലകൃഷ്ണനാണ് കൊയിലാണ്ടി പൊലീസില്‍ കീഴടങ്ങിയത്. 2025 സെപ്റ്റംബര്‍ 18ന് നടന്ന കവര്‍ച്ചയ്ക്ക് പിന്നാലെ ഒരു വര്‍ഷത്തോളമായി ഇയാള്‍ അന്വേഷണപരിധിയിലുണ്ടായിരുന്നുവെന്ന് പൊലീസ് അറിയിച്ചു.
ഇന്ത്യന്‍ യൂണിയന്‍ മുസ്‌ലിം ലീഗുമായി ബന്ധമുള്ള സാംസ്‌കാരികസാമൂഹിക ക്ഷേമസംഘടനയാണ് കെഎംസിസി. വിദേശത്തുള്ള മലയാളികളുടെ ക്ഷേമപ്രവര്‍ത്തനങ്ങള്‍ക്കായി സൂക്ഷിച്ചിരുന്ന 31 ലക്ഷം ഖത്തര്‍ റിയാലാണ് ദോഹയിലെ അല്‍ തുമാമയിലുള്ള ഓഫീസില്‍നിന്ന് കവര്‍ന്നത്. ഇന്ത്യന്‍ രൂപയില്‍ ഏകദേശം എട്ടു കോടി വരുമെന്നാണ് കണക്ക്.
കവര്‍ച്ചയ്ക്കായി നാലുപേരെ കേരളത്തില്‍നിന്ന് വിമാനമാര്‍ഗം ഖത്തറിലെത്തിച്ചതായാണ് പൊലീസിന്റെ പ്രാഥമിക വിവരം. മറ്റ് രണ്ടുപേര്‍ക്ക് ഖത്തറില്‍ താമസസൗകര്യം ഒരുക്കാനും കവര്‍ച്ച ആസൂത്രണം ചെയ്യാനും പങ്കുണ്ടെന്നാണ് ആരോപണം. മുറിയിലെ ജീവനക്കാരനെ കെട്ടിയിട്ടശേഷം ഗ്യാസ് കട്ടര്‍ ഉപയോഗിച്ച് പണം സൂക്ഷിച്ചിരുന്ന മുറിയും ലോക്കറും തകര്‍ത്താണ് സംഘം പണവുമായി കടന്നതെന്ന് പൊലീസ് പറയുന്നു.
സംഭവത്തിനുശേഷം ബാലകൃഷ്ണന്‍ കേരളത്തിലേക്ക് മടങ്ങിയിരുന്നു. തനിക്ക് വെല്‍ഡറായി ജോലി വാഗ്ദാനം ചെയ്താണ് ഖത്തറിലേക്ക് കൊണ്ടുപോയതെന്നും അവിടെ എത്തിയശേഷമാണ് ഗ്യാസ് കട്ടര്‍ ഉപയോഗിച്ച് ലോക്കര്‍ തുറക്കാന്‍ ആവശ്യപ്പെട്ടതെന്നും ഇയാളുടേതെന്ന് പറയപ്പെടുന്ന വിഡിയോയില്‍ അവകാശപ്പെടുന്നു. കവര്‍ച്ചയുടെ യഥാര്‍ഥ ഉദ്ദേശ്യം അറിയില്ലായിരുന്നുവെന്നും ഇയാള്‍ പറയുന്നു.
കേസില്‍ ഷാജി, അസൈനാര്‍, റാഷി പയ്യോളി, റോട്ടാന റസാഖ്, സാലിഹ് എന്ന ബാവ, കാക്കാച്ചി കമറു, നിസാര്‍ എന്നിവരെയും പ്രതിപ്പട്ടികയില്‍ ഉള്‍പ്പെടുത്തിയിട്ടുണ്ട്. ഇവരില്‍ ചിലര്‍ വിദേശത്താണെന്നാണ് പൊലീസ് പറയുന്നത്. ബാലകൃഷ്ണനെ ചോദ്യംചെയ്യുന്ന അന്വേഷണസംഘം മറ്റുള്ളവര്‍ക്കായി തിരച്ചില്‍ തുടരുകയാണ്. കെഎംസിസിയുമായി ബന്ധപ്പെട്ട ചിലര്‍ക്കും കവര്‍ച്ചയില്‍ പങ്കുണ്ടോയെന്ന കാര്യവും പരിശോധിക്കുന്നുണ്ട്.
കവര്‍ച്ച നടന്ന ഉടന്‍ പരാതി ലഭിക്കാത്തതിനാല്‍ അന്വേഷണം ആരംഭിച്ചിരുന്നില്ലെന്ന് പൊലീസ് വ്യക്തമാക്കി. ഖത്തര്‍ കെഎംസിസി വൈസ് പ്രസിഡന്റ് പി.കെ. അബ്ദുറഹീം ഈ വര്‍ഷം സെപ്റ്റംബര്‍ 15ന് കൊയിലാണ്ടി പൊലീസിനെ സമീപിച്ചതോടെയാണ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചത്.
കഴിഞ്ഞ തദ്ദേശ തെരഞ്ഞെടുപ്പില്‍ കൊയിലാണ്ടിയില്‍ ബി.ജെ.പി സ്ഥാനാര്‍ഥിയായി മത്സരിച്ച വ്യക്തിയാണ് ബാലകൃഷ്ണന്‍. സംഭവത്തില്‍ കേന്ദ്ര ഏജന്‍സി അന്വേഷണം വേണമെന്ന് ബിജെപിയുടെ പ്രാദേശിക നേതൃത്വം ആവശ്യപ്പെട്ടിട്ടുണ്ട്. കവര്‍ന്ന തുക 25 കോടിയാണെന്ന് സൂചിപ്പിക്കുന്നതായി പറയപ്പെടുന്ന ഓഡിയോയും പരിശോധനയിലുണ്ട്. ഔദ്യോഗികമായി സ്ഥിരീകരിച്ച കവര്‍ച്ചത്തുക 31 ലക്ഷം ഖത്തര്‍ റിയാലാണ്.