ജിദ്ദ: അക്ഷരം വായനവേദി സംഘടിപ്പിച്ച 'നാട്ടുവഴി' എന്ന സര്‍ഗവസന്തം വൈവിധ്യമാര്‍ന്ന പരിപാടികള്‍ കൊണ്ട് ശ്രദ്ധേയമായി. കവിതയും കഥയും ഗാനങ്ങളും പ്രമുഖ കവികളുടെ രചനകളുടെ ആലാപനവുമെല്ലാം കോര്‍ത്തിണക്കിയ ചടങ്ങ്, പ്രവാസലോകത്ത് മലയാള തനിമയുടെ വീണ്ടെടുപ്പായി മാറി.
അരുവി മോങ്ങം, ജസീന ബഷീര്‍, അമീന ബഷീര്‍ എന്നിവര്‍ ആശയസമ്പുഷ്ടവും കാലികപ്രസക്തവുമായ സ്വന്തം കവിതകള്‍ അവതരിപ്പിച്ചു. മലയാളത്തിന്റെ പ്രിയകവികളായ സുഗതകുമാരി, വൈലോപ്പിള്ളി എന്നിവരുടെ ശ്രദ്ധേയമായ കവിതകള്‍ ആലപിച്ചുകൊണ്ട് അബ്ദുലതീഫ് കരിങ്ങനാടും സി.എച്ച്. ബഷീറും സദസ്സിന് നവ്യാനുഭവമേകി.
അന്‍വര്‍ വണ്ടൂര്‍, ശിഹാബ് കരുവാരക്കുണ്ട്, റജിയ വീരാന്‍, എം. അഷ്‌റഫ് എന്നിവര്‍ തങ്ങള്‍ രചിച്ച കഥകള്‍ അവതരിപ്പിച്ചു. തുടര്‍ന്ന് സല്‍ജാസ്, നൗഷാദ് വണ്ടൂര്‍, സക്കീര്‍ ഹുസൈന്‍, ഡോ. മുഹമ്മദ് ഹാരിസ് എന്നിവര്‍ അവതരിപ്പിച്ച ജനപ്രിയ മലയാള ഗാനങ്ങള്‍ ചടങ്ങിന് മാറ്റ് കൂട്ടി. കഥയും കവിതയും സംഗീതവും സമന്വയിപ്പിച്ച 'നാട്ടുവഴി' പ്രേക്ഷകശ്രദ്ധ പിടിച്ചുപറ്റി. ചടങ്ങില്‍ എം. അഷ്‌റഫ് അധ്യക്ഷത വഹിച്ചു. ഇബ്രാഹീം ശംനാട് സ്വാഗതവും ലിയാന പ്രാര്‍ത്ഥനാഗീതവും ആലപിച്ചു.
Related News
