കൊച്ചി: മുവാറ്റുപുഴയുടെ നഗരഹൃദയത്തിലൂടെ ഒഴുകുന്ന പുഴയ്ക്ക് കുറുകെ പുതിയൊരു നടപ്പുവഴി കൂടി പിറവിയെടുക്കുകയാണ്. നീണ്ട നാളത്തെ കാത്തിരിപ്പിനൊടുവില്‍ മൂവാറ്റുപുഴയുടെ അഭിമാനമായ തൂക്കുപാലത്തിന്റെ പണികള്‍ അന്തിമ ഘട്ടത്തിലേക്ക് കടന്നിരിക്കുന്നു. നഗരത്തിന്റെ മുഖച്ഛായ മാറ്റാന്‍ ലക്ഷ്യമിട്ടുള്ള പുഴയോര ടൂറിസം പദ്ധതിയുടെ ഏറ്റവും ആകര്‍ഷകമായ ഏടുകളിലൊന്നാണിത്. ഈ വര്‍ഷം തന്നെ പാലം പൊതുജനങ്ങള്‍ക്കായി തുറന്നുകൊടുക്കാനാകുമെന്ന പ്രതീക്ഷയിലാണ് അധികൃതര്‍.
നഗരസഭയുടെ നേതൃത്വത്തില്‍ 13 കോടി രൂപ മുതല്‍മുടക്കില്‍ രണ്ട് ഘട്ടങ്ങളായാണ് ഈ ബൃഹത്തായ വികസന പദ്ധതി നടപ്പാക്കുന്നത്. ഇതില്‍ ആദ്യപടിയായി, കേന്ദ്ര സര്‍ക്കാരിന്റെ അമൃതം പദ്ധതിയില്‍ ഉള്‍പ്പെടുത്തി അനുവദിച്ച അഞ്ച് കോടി രൂപ ചെലവഴിച്ചാണ് തൊടുപുഴയാറിന് കുറുകെ തൂക്കുപാലം പണികഴിച്ചിരിക്കുന്നത്. നഗരവാസികള്‍ക്കും സഞ്ചാരികള്‍ക്കും സുപരിചിതമായ ഡ്രീംലാന്‍ഡ് പാര്‍ക്കില്‍ നിന്നും പുഴ കടന്ന് പേട്ട ഭാഗത്തേക്ക് എത്തിച്ചേരുന്ന തരത്തിലാണ് പാലത്തിന്റെ ഘടന. നിലവിലുള്ള 'ലതാ' പാലത്തിന് തൊട്ടുസമാന്തരമായാണ് പുതിയ യാത്രാമാര്‍ഗ്ഗം യാഥാര്‍ത്ഥ്യമായിരിക്കുന്നത്
വിനോദസഞ്ചാര ഭൂപടത്തില്‍ മൂവാറ്റുപുഴയ്ക്ക് പുതിയൊരു മേല്‍വിലാസം നല്‍കാന്‍ പോന്നതാണ് പദ്ധതിയുടെ രണ്ടാം ഘട്ടം. കച്ചേരിത്താഴം വരെ നീളുന്ന മനോഹരമായ പുഴയോര നടപ്പാത, കാഴ്ചകള്‍ കാണാന്‍ വാച്ച് ടവര്‍, ചരിത്രവും സംസ്‌കാരവും ഒപ്പിയെടുക്കാന്‍ മ്യൂസിയം, സായാഹ്നങ്ങള്‍ ആസ്വദിക്കാന്‍ കഫെറ്റീരിയ എന്നിവയെല്ലാം പദ്ധതിയുടെ ഭാഗമായി വരുന്നുണ്ട്. ഒപ്പം, പുഴയിലൂടെയുള്ള ജലയാത്ര സഞ്ചാരികള്‍ക്ക് സമ്മാനിക്കാനായി സോളാര്‍ ബോട്ടുകളും സജ്ജമാക്കാന്‍ പദ്ധതിയുണ്ട്.
പ്രകൃതിയോട് ഇണങ്ങിനിന്നുകൊണ്ടുള്ള നിര്‍മ്മാണ ശൈലിയാണ് പദ്ധതിയുടെ മറ്റൊരു പ്രത്യേകത. ഇവിടുത്തെ സ്വാഭാവികമായ പാറക്കെട്ടുകളും മുളങ്കാടുകളും ചെറിയ കുന്നുകളുമൊന്നും നശിപ്പിക്കാതെയാണ് നാലര ഏക്കറിലധികം പരന്നുകിടക്കുന്ന ഡ്രീം ലാന്‍ഡ് പാര്‍ക്ക് 50 ലക്ഷം രൂപ ചെലവില്‍ നവീകരിക്കുന്നത്. തൂക്കുപാലത്തിന്റെ യാഥാര്‍ത്ഥ്യമാക്കല്‍ കൂടി പൂര്‍ത്തിയാകുന്നതോടെ, മൂവാറ്റുപുഴയാറിന്റെ സൗന്ദര്യം അതിന്റെ മുഴുവന്‍ തനിമയിലും അടുത്തറിഞ്ഞ് ആസ്വദിക്കാനുള്ള അവസരമാണ് സഞ്ചാരികള്‍ക്ക് മുന്നില്‍ തുറക്കപ്പെടുന്നത്.
Related News
