ജിദ്ദ: സ്ത്രീകളുടെ ശാക്തീകരണവും ഉന്നമനവും ലക്ഷ്യമാക്കി പ്രവര്‍ത്തിക്കുന്ന ജിദ്ദ സിജി വിമന്‍ കളക്ടീവ് (ജെ.സി.ഡബ്ല്യു.സി) ദ്വിദിന വനിതാ സംരംഭകത്വ ശില്‍പശാല സംഘടിപ്പിച്ചു. സിജി വിഷന്‍ 2030-ന്റെ ഭാഗമായി 'ഷീപ്രണര്‍' (SHEPRENEUR) എന്ന പേരില്‍ ജിദ്ദ വെല്‍വെറ്റ് ഹോട്ടലിലാണ് പരിപാടി സംഘടിപ്പിച്ചത്.
ജെ.സി.ഡബ്ല്യു.സി എച്ച്.ആര്‍ ഗ്രൂപ്പിന്റെയും ബിസിനസ് ഇനിഷ്യേറ്റീവ് ഗ്രൂപ്പിന്റെയും നേതൃത്വത്തില്‍ നടന്ന ശില്‍പശാലയ്ക്ക് പ്രമുഖ എഫിഷ്യന്‍സി ട്രെയിനറും ലൈഫ് കോച്ചുമായ നസ്ലീ ഫാത്തിമ നേതൃത്വം നല്‍കി. കുടുംബിനികളും വിവിധ മേഖലകളില്‍ ജോലി ചെയ്യുന്നവരുമായ അമ്പതോളം വനിതാ സംരംഭകരും സംരംഭകത്വ താല്പര്യമുള്ളവരും പരിപാടിയില്‍ പങ്കെടുത്തു.
പ്രായോഗിക ടാസ്‌കുകള്‍, വിനോദങ്ങള്‍, ചിന്തോദ്ദീപകമായ ചര്‍ച്ചകള്‍ എന്നിവ സമന്വയിപ്പിച്ചായിരുന്നു പരിശീലനം. പ്രവാസത്തിലെ പരിമിതികള്‍ക്കിടയിലും കൃത്യമായ ആസൂത്രണമുണ്ടെങ്കില്‍ സംരംഭക സ്വപ്നങ്ങള്‍ സാക്ഷാത്കരിക്കാന്‍ സാധിക്കുമെന്ന ആത്മവിശ്വാസം ശില്‍പശാല പകര്‍ന്നു നല്‍കിയതായി പങ്കെടുത്തവര്‍ അഭിപ്രായപ്പെട്ടു. നവയര്‍ ഈവന്റ്‌സുമായി സഹകരിച്ച് ജെ.സി.ഡബ്ല്യു.സി സംഘടിപ്പിച്ച ആദ്യ പരിപാടി കൂടിയാണിത്.
ചടങ്ങില്‍ ജെ.സി.ഡബ്ല്യു.സി പ്രസിഡന്റ് റഫ്‌സീന അഷ്ഫാക്, എച്ച്.ആര്‍ കോഡിനേറ്റര്‍ റൈഹാനത്ത് സഹീര്‍ എന്നിവര്‍ സ്വാഗതം ആശംസിച്ചു. ഫെബിന്‍, സഫാന എന്നിവര്‍ ഖിറാഅത്ത് നടത്തി. ശില്‍പശാല നയിച്ച പരിശീലക നസ്ലീ ഫാത്തിമയ്ക്ക് ജെ.സി.ഡബ്ല്യു.സി എക്‌സിക്യൂട്ടീവ് കമ്മിറ്റി ഉപഹാരം നല്‍കി ആദരിച്ചു.
ഫെബിന്‍, നുഫി ലത്തീഫ്, ജുബി, നിഹാല, ദിയ, സഫാന, ജെസ്സി, റിന്‍ഷി, സഫാ എന്നീ എക്‌സിക്യൂട്ടീവ് കമ്മിറ്റി അംഗങ്ങള്‍ പരിപാടിയുടെ വളണ്ടിയറിങ്ങിന് നേതൃത്വം നല്‍കി.
