അറാര്‍: ജോലിക്കിടെ അപകടത്തില്‍പ്പെട്ട് കഴിഞ്ഞ ദിവസം അറാറില്‍ മരണപെട്ട ഉത്തര്‍ പ്രദേശ് സ്വദേശി മുഹമ്മദ് തബാറക്കിന്റെ (40) മൃതദേഹം നടപടി ക്രമങ്ങള്‍ പൂര്‍ത്തികരിച്ചു നാട്ടില്‍ എത്തിച്ചു. സൗദിയിലെ മിക്ക പ്രവിശ്യയിലും ബ്രാഞ്ചുകളുള്ള നഖ യുനൈറ്റഡ് (Naqa Unaited Trading Establishment) കമ്പനിയില്‍ പ്ലംബിങ് തൊഴിലാളിയായിരുന്ന മുഹമ്മദ് തബാറക്ക് ആറ് വര്‍ഷമായി ഈ കമ്പനിയില്‍ ജോലി ചെയ്തു വരികയാണ്. ഒരു മാസം മുമ്പാണ് ലീവ് കഴിഞ്ഞു നാട്ടില്‍ നിന്നും എത്തിയത്.
സ്വിമ്മിംഗ് പൂളിന്റെ ജോലി ചെയ്തു കൊണ്ടിരിക്കുമ്പോള്‍ ചുമര് പൊളിഞ്ഞു വീണു അപകടം പറ്റിയാണ് മരണം സംഭവിച്ചത്. പ്രിന്‍സ് അബ്ദുല്‍ അസീസ് ആശുപത്രി മോര്‍ച്ചറിയില്‍ സൂക്ഷിച്ചിരുന്ന മൃതദേഹം നടപടി ക്രമങ്ങള്‍ പൂര്‍ത്തികരിക്കുന്നതിനു നേതൃത്വം നല്‍കിയ അറാര്‍ പ്രവാസി സംഘം രക്ഷാധികാരി സക്കീര്‍ താമരത്ത് ഏറ്റുവാങ്ങി അറാര്‍ എയര്‍ പോര്‍ട്ടില്‍ എത്തിച്ചു. രക്ഷാധികാരി സമിതി അംഗം സുനില്‍ മറ്റം, ജനറല്‍ സെക്രട്ടറി ഷാജി ആലുവ, ജോയിന്റ് സെക്രട്ടറി സഹദേവന്‍ കൂറ്റനാട്, കേന്ദ്ര കമ്മിറ്റി അംഗം സന്തോഷ് ആന്റണിയും കമ്പനിയിലെ സുഹൃത്തുക്കളും കൂടെ ഉണ്ടായിരുന്നു.
അറാറില്‍ നിന്നും ജിദ്ദ വഴി ലക്നൗവില്‍ എത്തിയ മൃതദേഹം സുന്നി സെന്‍ട്രല്‍ ജുമാമസ്ജിദ് ഖബര്‍ സ്ഥാനില്‍ മറവു ചെയ്തു. മുഹമ്മദ് വക്കീല്‍ പിതാവും, താജ് ബൂന്‍ ഭാര്യയും, തമന്ന പര്‍വീണ്‍ ഏക മകളുമാണ്. മാതാവ് തബാറാക്കിന് രണ്ട് വയസുള്ളപ്പോള്‍ മരണ പെട്ടതാണ്.
Related News
