ന്യൂഡല്‍ഹി: ജമ്മു കശ്മീര്‍ മുഖ്യമന്ത്രി ഉമര്‍ അബ്ദുല്ലയും മുതിര്‍ന്ന മാധ്യമപ്രവര്‍ത്തക നിധി റസ്ദാനും തമ്മിലുള്ള വിവാഹനത്തോടനുബന്ധിച്ച സോഷ്യല്‍ മീഡിയ പോസ്റ്റുകള്‍ വൈറലായി. വെള്ളിയാഴ്ച നടന്ന ചടങ്ങില്‍ ഇരുവരും വിവാഹിതരായ വിവരം ശനിയാഴ്ചയാണ് സമൂഹമാധ്യമങ്ങളിലൂടെ പങ്കുവെച്ചത്.
'ഒരു പുതിയ യാത്ര ആരംഭിച്ചു' എന്ന കുറിപ്പോടെയാണ് ഉമര്‍ അബ്ദുല്ല നിധിക്കൊപ്പമുള്ള ചിത്രം എക്‌സില്‍ പങ്കുവെച്ചത്. ഇതിന് പിന്നാലെ നിധി റസ്ദാനും വിവാഹചിത്രങ്ങള്‍ സ്വന്തം എക്‌സ് അക്കൗണ്ടില്‍ പോസ്റ്റ് ചെയ്തു. 'ഇറ്റ്‌സ് ഡണ്‍ ബ്രോ' (അതു കഴിഞ്ഞു, ബ്രോ) എന്നായിരുന്നു നിധിയുടെ രസകരമായ കുറിപ്പ്. ഇരുവരുടെയും പോസ്റ്റുകള്‍ സമൂഹമാധ്യമങ്ങളില്‍ ശ്രദ്ധ നേടി.
ഡല്‍ഹിയില്‍ വിവാഹസല്‍ക്കാരവും ഉണ്ടായി. രാഷ്ട്രീയരംഗത്തും മാധ്യമലോകത്തും ശ്രദ്ധേയരായ വ്യക്തികളായതിനാല്‍ വിവാഹവാര്‍ത്ത വലിയ ചര്‍ച്ചയായി.
എന്‍.ഡി.ടി.വിയില്‍ ദീര്‍ഘകാലം പ്രവര്‍ത്തിച്ച നിധി റസ്ദാന്‍ ദേശീയ രാഷ്ട്രീയവും സമകാലിക വിഷയങ്ങളും കൈകാര്യം ചെയ്തിരുന്ന പ്രമുഖ മാധ്യമപ്രവര്‍ത്തകയാണ്. പ്രമുഖ ജേണലിസ്റ്റ് ആര്‍.കെ റസ്ദാന്റെ മകളാണ് നിധി. രണ്ടാം വിവാഹമാണ് ഇത്.
ഉമര്‍ അബ്ദുല്ലയുടെ ആദ്യവിവാഹബന്ധം അവസാനിപ്പിക്കാന്‍ സുപ്രീംകോടതി തീരുമാനമെടുത്ത് ഏകദേശം മൂന്നുമാസത്തിനു ശേഷമാണ് പുതിയ വിവാഹം. പായലുമായുള്ള ഉമറിന്റെ വിവാഹബന്ധം പരസ്പര ധാരണയോടെ അവസാനിപ്പിക്കാന്‍ ഇരുവരും സമ്മതിച്ചതിനെ തുടര്‍ന്നായിരുന്നു കോടതിയുടെ നടപടി. 1994ലായിരുന്നു ഉമറും പായലും വിവാഹിതരായത്. ഇവര്‍ക്ക് സാഹിര്‍, സമീര്‍ എന്നീ രണ്ട് ആണ്‍മക്കളുണ്ട്. 2011ല്‍ ഇരുവരും വേര്‍പിരിഞ്ഞതായി ഉമര്‍ പ്രഖ്യാപിച്ചിരുന്നു. ജേണലിസ്റ്റ് നീലേഷ് മിശ്രയായിരുന്നു നിധിയുടെ ആദ്യ ഭര്‍ത്താവ്. 2005ലായിരുന്നു വിവാഹം, 2007ല്‍ വേര്‍പിരിഞ്ഞു.
Related News
