മുംബൈ: ഐ.പി.എല്‍ 2027 സീസണിന് മുന്നോടിയായി പരിശീലക സംഘത്തില്‍ അഴിച്ചുപണി നടത്തി മുംബൈ ഇന്ത്യന്‍സ്. മുന്‍ ഇന്ത്യന്‍ താരം റോബിന്‍ ഉത്തപ്പയെ ബാറ്റിങ് പരിശീലകനായി നിയമിച്ചു. ന്യൂസിലന്‍ഡ് മുന്‍ പേസര്‍ മിച്ചല്‍ മക്ലെനഗനാണ് ബൗളിങ് പരിശീലകന്‍. ടി. ദിലീപ് ഫീല്‍ഡിങ് പരിശീലകനായും ധവാല്‍ കുല്‍ക്കര്‍ണി ഡെവലപ്‌മെന്റ് ബൗളിങ് പരിശീലകനായും ചുമതലയേല്‍ക്കും.
പുതിയ മുഖ്യ പരിശീലകന്‍ കീറോണ്‍ പൊള്ളാര്‍ഡിന്റെ നേതൃത്വത്തിലുള്ള പരിശീലക സംഘത്തിലേക്കാണ് ഇവരെ ഉള്‍പ്പെടുത്തിയത്. കഴിഞ്ഞയാഴ്ച മഹേല ജയവര്‍ധനെയ്ക്ക് പകരം പൊള്ളാര്‍ഡിനെ മുഖ്യ പരിശീലകനായി നിയമിച്ചിരുന്നു. ഇതിനു പിന്നാലെ ബൗളിങ് പരിശീലകരായ ലസിത് മലിംഗ, പരസ് മാംബ്രെ, ഫീല്‍ഡിങ് പരിശീലകന്‍ കാള്‍ ഹോപ്കിന്‍സണ്‍ എന്നിവരുമായുള്ള ബന്ധം അവസാനിപ്പിച്ചു.
ഉത്തപ്പയും മക്ലെനഗനും കളിക്കാരെന്ന നിലയില്‍ മുംബൈ ഇന്ത്യന്‍സിനായി പാഡണിഞ്ഞിട്ടുണ്ട്. 2008ലെ പ്രഥമ ഐ.പി.എല്‍ സീസണിലാണ് ഉത്തപ്പ മുംബൈക്കായി കളിച്ചത്. 14 മത്സരങ്ങളില്‍നിന്ന് 30.58 ശരാശരിയിലും 114.69 സ്‌െ്രെടക്ക് റേറ്റിലും 320 റണ്‍സാണ് നേടിയത്.
പിന്നീട് അഞ്ച് ഐ.പി.എല്‍ ടീമുകള്‍ക്കായി കളിച്ച ഉത്തപ്പ 2014ല്‍ കൊല്‍ക്കത്ത നൈറ്റ് റൈഡേഴ്‌സിനും 2021ല്‍ ചെന്നൈ സൂപ്പര്‍ കിങ്‌സിനുമൊപ്പം കിരീടം നേടി. ഐ.പി.എല്ലില്‍ ആകെ 205 മത്സരങ്ങളില്‍നിന്ന് 4,952 റണ്‍സാണ് സമ്പാദ്യം.
2015 മുതല്‍ 2019 വരെ അഞ്ച് സീസണുകളില്‍ മുംബൈയുടെ ഭാഗമായിരുന്നു മക്ലെനഗന്‍. 56 മത്സരങ്ങളില്‍നിന്ന് 71 വിക്കറ്റ് നേടിയ അദ്ദേഹം 2015, 2019 വര്‍ഷങ്ങളില്‍ മുംബൈ കിരീടം നേടിയ ടീമിലും അംഗമായിരുന്നു.
ധവാല്‍ കുല്‍ക്കര്‍ണിയും മുംബൈക്കായി വിവിധ കാലയളവുകളില്‍ കളിച്ചിട്ടുണ്ട്. 2008 മുതല്‍ 2013 വരെയും പിന്നീട് 2020, 2021 സീസണുകളിലുമായിരുന്നു ടീമിന്റെ ഭാഗമായത്. 2013ലും 2020ലും മുംബൈ ഐ.പി.എല്‍ കിരീടം നേടിയപ്പോഴും ടീമിലുണ്ടായിരുന്നു. ഇന്ത്യക്കായി 12 ഏകദിനങ്ങളിലും രണ്ട് ട്വന്റി20 മത്സരങ്ങളിലും കളിച്ചിട്ടുള്ള താരമാണ് കുല്‍ക്കര്‍ണി. 201213 ചാമ്പ്യന്‍സ് ലീഗിലും മുംബൈയെ പ്രതിനിധീകരിച്ചു.
മുന്‍ ഇന്ത്യന്‍ ഫീല്‍ഡിങ് പരിശീലകനായ ടി. ദിലീപ് 2021 മുതല്‍ 202425ലെ ബോര്‍ഡര്‍ഗവാസ്‌കര്‍ ട്രോഫി വരെയും പിന്നീട് 2025ല്‍ ഒരു വര്‍ഷക്കാലവും ദേശീയ ടീമിനൊപ്പം പ്രവര്‍ത്തിച്ചിട്ടുണ്ട്.
പുതിയ പരിശീലക സംഘത്തിന്റെ ആദ്യ പ്രധാന ദൗത്യം ഐ.പി.എല്‍ 2027 മിനി താരലേലമായിരിക്കും. ഡിസംബര്‍ 16ന് ഗോവയിലാണ് ലേലം നടക്കുക.